“Bouxvahvaj, ndaej gaj caeggeq Yizbwnj”, hot fwen neix riuzcienz youq Gyanghsuh、Cezgyangh, haenh Vajsi Fuhyinz bouxyinghyungz Bouxcuengh hoenx Yizbwnj. Vajsi Fuhyinz heuhguh Cwnz Vah, dwg dahlwg bouxcihcouh Gveihsuncouh（seizneix Gvangjsih Cingsih Si）Cwnz Cangh, mehyah bouxhakdoj Denzcouh（seizneix Denzdungh Yen）Cwnz Mungj.

Seizde, caeggeq Yizbwnj daeuj ciemq Gyanghsuh、Cezgyangh, henz haij geij cien leix cungj bauq naeuz cingzgvang gaenjgip muengh ciuzdingz vaiqdi okbing. Seizde, Vajsi Fuhyinz yaek ndaej roekcib bi, de doq cingjgouz hawj de guhdaeuz daiq bouxlaenj iq okciengq. Ciuzdingz hawj de aen ginhhanz “Guenvunzmeh Canhcieng Cungjbingh”, daiq roek cien lai boux binghak Gvangjsih buetrem cien leix bae dwk caeggeq Yizbwnj. Vajsi Fuhyinz daiq gyoengq bing youq gak dieg laebdaeb hoenxciengq, ceiq gyae baihdoeng daengz Sanghaij Yen、baihsae daengz Gyanghhingh Fuj、baihnamz daengz Ginhsanh Vei、baihbaek daengz Guhsuh Cwngz, hoenx gvaq cib lai ciengz ciengq, lumjbaenz Ginhsanh Vei、Vangzgyangh Gingh、Luzgingh Ba、Celinz、Sanghhih daengj ciengq. Gyoengqde youq Ciengzciengq Ginhsanh Vei gaj le seiq cien lai boux vunzdig, hawj vunzlai henz haij engq miz gietsim bae dingjhoenx caeggeq Yizbwnj. Vajsi Fuhyinz “hoenx sam baez hingz sam baez”, goenglauz yienhda, ciuzdingz heuh de guh “Ciengqvunzmeh Sigdaengx”, caiq fung de guh “Ngeihbinj Fuhyinz”.

Vajsi Fuhyinz mboujdan dwg bouxyinghyungz Bouxcuengh mizmingz ndeu, caemhcaiq dwg mehyinghyungz hoh gya henz guek ciuhgeq Cungguek. Daengz seizneix vunzlai cungzlij haenhdanq caeuq boiqfug de youq mwh minzcuz miz nanh seiz ndaej ndwn okdaeuj. Raeuz aeu daihdaih ciepcienz gij cingsaenz gyaez guek de.

（Gvangjsih Minzcuz Yenzgiu Cunghsinh hawj gauj）