Byacwx youq laeng Baihdoengbaek Vuj- mingz, vunz heuhguh“bya gyaeu baihnamz, diegsien gwnzbiengz”, dwg ceh cawndongq heu laeng gwnz bwzveizgveihsen. Gij swhyenz doenghduz doenghgo de lai raeuh, funghgingj hix ndei,“dujva seizcin、raemxgienghdat seizhah、fwjmok seizcou、nae seizdoeng”dwg gij gingjsaek seiq geiq de. Hwnj sang dawzneuz, bya goengq dem goengq humxhob, fwjmok geujheux, mbangj- baez nditndat cik daengz fwjmok, lij cik ok gvaengxrongh miz saek daeuj, caemhcaiq miz “gvaengxrongh riengz vunz doeng, duzngaeuz youq ndaw gvaengx”gij gingjsiengq geizheih neix dem.

Bonj saw geiq gij lizsij Vujmingz Yen sij naeuz, Byacwx “goengqbya ceiq sang de heuhguh ‘Mozyez’, dawzneuz gizgyae. Hwnj gwnz sang bae, bya goengq dep goengq. Giz gemh miz aen diegdangz gwnz mbwn ndeu, bet ndaek rinsangj, caet aen rincauq, cenghseuq mbouj miz ngawhrin, seiqhenz doengh gocaz geq”mwncumcum, neix couhdwg ‘hawsien’”. Gij neix dwg gangj bet aen diegdangz gwnz mbwn laeng Byacwx. Gwnz- biengz cienznaeuz gizde dwg gizdieg fangz- baed iu’gvaiq、bouxsien Bouxcuengh gaeuqgeq doenghbaez ciengzseiz doxcomz couh baenz haw de.

Gij cienzgangj Byacwx gig lai, gij goj Daeggud dwg ndawde aen haemq mizmingz ndeu. Cingciuz《Dozgingh Vujyenz Yen》gienj daihsam geiq miz：“Miuhyahlungz laeng lajmbanj ndaw- yienh raen lai raeuh.”Daj gij saw neix couh rox, youq Cingciuz couh seizhwng buizcaeq Yahlungz. Cienznaeuz, daj haujlai nanz gaxgonq, youq aen mbanj laeng laj din Byacwx miz yahmaiq gungzhoj ndeu. De ciengzseiz bae gwnz ndoi vat byaekcwx. Miz baez seizdoeng nitnit, de bae ndoi ma ranz, raen duz ngwz iq maj ndaej gig geizheih ndeu, duz de youh rox rongh dem. Duz ngwz iq gutgungq youq henz roen, yaek dai lo. Yahmaiq gig hojlienz de, couh dawz duz de gip ma ranz cuengq youq henz cauq bangh raeuj, gueng duz de gwn doxgaiq, duz ngwz iq neix couh menhmenh ndei lo.

Yahmaiq ciengx duz de youq ranz, dangq bouxlwg swhgeij nei bae ganq duz de. Duz ngwz menhmenh maj hung le, aen ranzhaz Yahmaiq gaenq cang mbouj roengz de lo, diuz rieng de iet okrog bae baenz dingzlai. Yahmaiq naeuz duz ngwz gangj, donj ok hoh ndeu diuz rieng cij mbouj rox bienq raez. Duz ngwz ngaekgyaeuj lo, Yahmaiq couh aeu caxbyaek raemj ok gyaengh rieng iq. Duz ngwz de couh mbouj miz byairieng lo. Vahcuengh heuhguh“gud”. Yahmaiq couh an coh“Daeggud”hawj de, vunzmbanj couh ciuq gvenq heuh Yahmaiq guh Mehgud.

Diuz rieng Daeggud yienznaeuz mbouj rox bienq raez, hoeng aen ndang lij ciemh baez ciemh hung, de yied gwn yied lai, ranzhaz cungj yaek deng de caenx vaih lo. Yahmaiq ciengx mbouj hwnj le couh dawz duz de cuengq haeuj dah bae, hawj de gag bae ra gwn.

Daeggud deuz le, bakdou Mehgud ciengzseiz sawqmwh miz bya a mak a, vunzmbanj cungj naeuz guj dwg Daeggud soengq de. Gij ndwenngoenz Mehgud ciemhciemh ndei hwnj- daeuj, de caemhcaiq guhsien, vunzlai cungj gig aeueiq de. Doeklaeng, Mehgud laux le fat bingh couh dai le, vunzmbanj yaek caeuq de guh begsaeh, dumdeng raq rumzhaenq ndeu ci gvaqdaeuj, byajlingh byajraez youh fwndoek. Doq raen ndaek lungz loet ronghgim ronghgim ndeu ngiengx gyaeuj baet rieng daj gwnz mbwn mbin roengzdaeuj, dawz Mehgud ram daengz Byacwx bae haem lo. Daj neix doxbae, vunzlai caemh heuh goengq bya de guh Mohmehgud.

Mehgud roengz namh le, Daeggud bibi sam nyied sam gonqlaeng cungj mbin daengz Byacwx sauq moh Mehgud. It baez de sauqmoh ne, Byacwx couh rumz ci fwn doek, byajraez rumx- rumx. Fwn doek dingz le, megbya Byacwx couh dauqcawq miz raemxgienghdat cung doxroengz, vunz cungj naeuz neix dwg diuzdiuz ciengqhau Daeggud caeuq daxmeh venj de. Doengxhaemh raemxgienghdat raemx bongh rumxrumx dwg Daeggud guh aen yizsiz“nauh dienhlungz”caeq mehciengx. Ndigah, gyoengqvunz youq laeng seiqhenz Byacwx ciengzseiz naeuz “dai cij ram hwnj Byacwx bae”coenz vah neix, couhdwg miz vunz dai le, Bouxcuengh dieg de couh cingj goengdauh caeuq goengsae bae niemhging guhsang, dawz bouxdai haem youq Byacwx couhdwg soengq gij hoenz de ma Byacwx goengq byasaenz cojgoeng neix, neix couhdwg “hoenz dauq Byacwx”.

（Swhliu daj gwnzmuengx aeu, gij doz daj gwnzmuengx Byacwx Gvangjsih aeu.）