It

Luz cujyin mboengqneix cungj gag sim angqfwngfwng. Daj cwngfuj laeb aen Mbanjhangxrek neix guh sawqdiemj gaijcauh gij yiengh laj- mbanj le, de “ngoenz laep ok laep haeuj, ngaemgyaeuj nyaengq mbouj dingz, yienghyiengh hong gvaqsim, doengxhwnz ninz mbouj onj. Daengx mbanj caez doenghning, gauj sam cing sam cek, duzvaiz baez daep ek, mbouj ndaej yiet saekseiz.” Ndaej yangh cwngfuj gunghcozdui、cunhveij ganbu caeuq gyoengq vunzmbanj doengzcaez haenq guh buenq bi lai, gij hong gaijcauh gij yiengh Mbanjhangxrek ndaej baiz youq baihnaj daengx yangh, aen mbanj dajcang ndaej lengjluplup. Boux Liuz duicangj gunghcozdui yangh cwngfuj caegcaeg lwnh Luz cujyin nyi, naeuz sam gya banhswj ndaw yangh haihoih doxyaeng gvaq lo, yaek bingzsenj de Luz cujyin guh boux cunhgan maenhndei, heuh de bwh di caizliu gangjvah, daengz seiz yaek bae camgya daengx yangh aen byaujcangh daihhoih, aeu hwnjdaiz bae gaisau gingniemh. Dangyienz, de haengjdingh hix ndaej bit ngaenzciengj haemq na ndeu dem……

“Boux ganbu cunhveij, ndaej ngaenz noix dangqmaz, hong lai baenz maetma, dangq guh ya guh hoengq.” Luz cujyin guh gij hong de caeuq gij ngaenz ndaej lingx de mbouj baenz cingqbeij, “ndaej ngaenz ndwen cien bet, guh gij hong ndwen bet cien.” Guh dai guh lix lij dwg souhaeuj daemq haenx. Ndigah Luz cujyin caen maqmuengh ndaej bingz hwnj boux cunhgan maenhndei, yienghneix, de mboujdanh ndaej ngaenzciengj, daengz nienzdaej hix ndaej lingx ngaenz cizyau it gaep dem. Byawz mbouj siengj?

Ngeih

Mwh Cinz suhgi roengz mbanj daeuj genjcaz gij hong gaijcauh gij yiengh lajmbanj, Vangz Yinswh cingq dawz luek youq ndaw suen henz daemz bakmbanj gvaix raemx rwed byaek. Cinz suhgi yeu bak dongx naeuz:“Beixlaux, rwed byaek ha?”

“W, rwed byaek.” Vangz Yinswh han.

Doengh ndaw yangh buenx Cinz suhgi daeuj haenx cungj doxcanj naeuz Vangz Yinswh:“Yenveij Cinz suhgi daeuj yawj mbanj sou lo.”

Vangz Yinswh cuengqcak aen luek byaij ok suenbyaek, naeuz:“Angqcoux suhgi daeuj mbanj dou genjcaz guhhong.”

Cinz suhgi naeuz:“Mbanj sou ginzcung cungj boiqhab cwngfuj guhhong ndaej gig ndei. Sou roxnyinh gij hong gaijcauh gij yiengh lajmbanj neix guh ndaej habhoz lwi?”

“Guh ndaej ndei!” Vangz Yinswh naeuz.

Seizneix, boux senhveij ndaw yangh guhmuengz gaisau naeuz:“Boux beix neix heuhguh Vangz Yinswh, rox naemj saeh, cikeiq lai, de dwg boux ‘cungj sezgiswh’ ndaw mbanj bw!”

“O, yienghneix ha, vunzcaiz bo.” Cinz suhgi gaem fwngz Vangz Yinswh haenh naeuz.

“Suhgi ha, gou miz aen naemjfap ndeu. Mbanj dou ndoi lai dieg gvangq, gingjsaek gyaeundei, miz ndoenglueg yezdai yijlinz, miz raemxdiuqdan byaidah, miz vaengzrizvaiz lumj dieg- sien, lij miz dieggaeuq muhraemx nienj haeux ciuhgonq. Dou dajsuenq comz ngaenz haifat guh baenz aen diegguhcaemz ndeu, hawj vunz baih- rog daeuj youz!”

“Aen naemjfap neix ndei, yiengh- neix guh vunzlai doengzcaez souh’ik, doengzcaez baenz fouq, doengzcaez byaij hwnj loh siujgangh!” Cinz suhgi gangj daengz neix, youh naeuz, “ya, ngoenzneix nyaengq lai, baezlaeng gou cienmonz daeuj byaij mbat ndeu, yawjyawj gij gingjsaek gyaeundei mbanj sou.”

Sam

Luz cujyin naengh ndaw ranz- banhgoeng cunhveij, ndawsim gag vansisi.

Vangz Yinswh byaij haeujdaeuj, naeuz:“Cujyin ha, bang gou gaeb mbat gunghcangh ndeu vei.”

Luz cujyin ciep mbaw “baugau” Vangz Yinswh gvaqdaeuj yawj, neix dwg mbaw ceij daj bonjbouh cozyez lwgnyez sik okdaeuj, baihgwnz “saw raiz mbeujmbetmbet, lumj gaeq vet ra nengz, coij sanq coij doxnem, cih deng cih youh loek”. Luz cujyin yiuq haujlai nanz cij yawj ndaej ok raiz maz——

Yangh yinzminz cwngfuj：

Mbanjhangxrek dou dajsuenq baengh gij gingjsaek gyaeundei dajcauh aen dieg- guhcaemz lajmbanj, daegdaengq cingjgouz cwngfuj bued ngaenz daeuj bangcoengh

……

Luz cujyin najsaep lo, de ceiq fanjdoiq doenghboux doeng ngeix sae siengj guh gij saeh sai ngaenz sai rengz. De guh cujyin geij bi neix, ndaej ok baihrog bae byaij lai lo, “mbouj ndaej gwn nohmou, hix raen mou byaij loh, doengxngoenz ninz guhloq, yawz rox guh mbouj baenz. Ndaw lueg haz nyanyat, gaeugat geuj faexndoeng, byaij yamq mbouj raen roen, nyungz ndoeng dwksiegsieg. Gijmaz raemxdiuqdan, dwg vunzbamz gag haenh, mbwn rengx ciengz duenh raemx, lij luenh naemj sam ciengz. Gijmaz vaengzrizvaiz, gumz raemxdai gyang lueg, gizsaed aen dinghgyuek, uekcuek gvaq maz bae. Caiq naeuz suijmuh gaeuq, mbanj lawz mbouj gag miz, langh yaek bae daeqriz, gizgiz cungj ndaej guh.”

De ndeindei lwnh Vangz Yinswh naeuz:“Mwngz gangj gij ‘gingjdiemj’ neix gou doenghbaez cang nyaen cang roeg cungj ndaej bae gvaq lai lo, ciuq gou yawj mbouj daih dijndaej haifat guh diegguhcaemz……”

Vangz Yinswh miz di hozgaek, naeuz:“Baenzlawz mbouj dijndaej? Gou veibau hawj yenveij Cinz suhgi gvaq lo, de lij haenh gou rox naemj ne.”

Luz cujyin raen Vangz Yinswh mbouj angq lo, couh lox de naeuz:“Mbaw baugau couh camh ce gizneix, caj gou anbaiz vwnzsuh bang sou gaij baenz aen baugau gojhengzsingq le vaeh soengq hwnj baihgwnz bae. Mwngz couh baema gonq lo, miz maz siusik caiq dwk dienhvah hawj mwngz.”

Raen Luz cujyin oetak mbaw “baugau” haeuj ndaw doengjdaiz bae le, Vangz Yinswh lumj miz di cuengq- sim mbouj roengz, hoeng youh mbouj ndei gangj maz, bak mbwtmbeuj byaij deuz lo.

Seiq

Vangz Yinswh sij baugau gouz baihgwnz bued ngaenz daeuj haifat guh diegguhcaemz gienh saeh neix daengx mbanj cungj cienz gvaq doh lo. Hoeng nanznanz mbouj raen doengh- cingh, miz vunz couh ngeiz:“Cunhveij aiq vut faenh baugau haenx roengz doengjnyapnyaj bae lo, yaek dwg cigciep bae ra yenveij Cinz suhgi cij ndaej ho.”

Dwg ha, guhlawz cungj ngeix mbouj daengz bae ra Cinz suhgi ne? Cunhveij suenq maz, mbouj leix couh mbouj leix, yenveij Cinz suhgi leix couh ndaej lo. Vangz Yinswh “ukmboek ndi cikeiq, deng coenzheiq dwk ndiu”, Cinz suhgi cungj gangj- dangdang naeuz aen naemjfap neix ndei, ndaek Luz cujyin cunhveij neix cix naeuz mbouj cig ndaej haifat, nanzdauh de lij lai ak gvaq Cinz suhgi bae?

Vangz Yinswh couh dapci bae yienhsingz ra Cinz suhgi.

Ndaw hongh gvangqnyum yen- veij, dieg banhgoeng gak bouhmonz lai raixcaix, Vangz Yinswh cam gvaq geij boux vunz cij ra ndaej daengz fungh ranzbanhgoeng Cinz suhgi.

Vangz Yinswh byaij daengz bakdou fungh ranzbanhgoeng Cinz suhgi, Cinz suhgi cingq caeuq boux bizbwd ndeu doxyaeng saeh. Boux bizbwd haenx miz di najsug, ngeix mbouj hwnj youq gyawz raen gvaq.

“Suhgi ha, mwngz lij geiq ndaej gou lwi?” Vangz Yinswh baez yamq haeuj dou couh hemq naeuz, “gou dwg Vangz Yinswh Mbanjhangxrek, boux naemj gauj dieglijyouz lajmbanj haenx ha!”

“O, Lauj Vangz Mbanjhangxrek ha, geiq ndaej, geiq ndaej!” Cinz suhgi naeuz, “aen naemjfap sou ndei lailai, mwngz caen dwg boux vunzcaiz.”

Vangz Yinswh heiqhwnj fofo naeuz:“Hoeng, cunhveij Luz cujyin mbouj haeujcoengh dou cixbah, lij buet raemx gyoet hawj dou dem.”

Cinz suhgi ndaejnyi Vangz Yin- swh yienghneix gangj le, riuhaha coh boux bizbwd haenx naeuz:“Mwngz yawj, miz vunz daeuj gauqsangh gij ganbu lajfwngz mwngz lo.” Gangj le gaisau boux bizbwd hawj Vangz Yinswh, “ne, neix dwg Linz fuyangh- cangj aen yangh sou, miz maz cingz- gvang ndaej cigciep caeuq de gangj.”

Boux bizbwd haenx baez riumbw, naj nding rwz dit mbouj rox gangj maz cij ndei.

Cinz suhgi lij riu naeuz:“Mwngz dauqbae le, hawj yanghcangj camcam yawj dwg maz cingzgvang.”

Haj

Couh yaek daengz ngoenz daengx yangh haihoih byaujcangh cunhgan maenhndei lo, Luz cujyin naengh youq ndaw ranzbanhgoeng cunhveij gag muywtywt, de cingq raiz faenh sawgauj gangjvah ndeu, de siengj youq dangq- naj gyoengq cunhganbu daengx yangh angj naj mbat ndeu, biujyienh ok gij suijbingz sang gangjvah de.

Seizneix, gunghcozdui boux Liuz duicangj ndaw yangh haeujdaeuj, Luz cujyin guhmuengz lumj nyez iek raen meh nei, naeuz:“Duicangj ha, mwngz daeuj ndaej ngamj lo, bang gou yawjyawj faenh sawgauj gangjvah neix baenzlawz yiengh?”

Liuz duicangj cix mbouj yawj mbaw sawgauj Luz cujyin, de riumbw vaehvaeh naeuz:“Baez bingzsenj neix, deng lauqgvaq lo. Mbouj gvaq mbouj youqgaenj, gihvei lij miz lai, raeuz baezlaeng caiq ceng’aeu……”

Luz cujyin simgyoet daengz baihlaeng bae, sing saeq gag nam gag naeuz:“Yaeuh hawj vunz roengzrengz, naeuz ndaej ceng ‘mauhnyangj’, yaeuh hawj vunz sim’angq, gangjgangj cix gvaq ndwi.”