Denhdwngj Yen Cinyenj Yangh gunghyi ringaek lizsij gyaenanz, dwg “aen yangh canghrin canghdiet” daengx yienh mizmingz. Gij saw geiqsij lizsij Denh- dwngj geiqmiz, cienzgangj youq byai bi Hanzfungh Cingciuz aen yienh neix couh miz vunz okrog bae gai rengz ra ngaenz, cawjdaeuz dwg canghngaenz Gizlunz Dujcouh caeuq canghrin、canghdiet Cinyenj Dujcouh haemq lai. Gizgyawj de daengz ranghdieg henzhamq Dahcojgyangh、Dahyougyangh, gizgyae de daengz Yinznanz Swngj, engq gyae cix daengz Yeznanz caeuq Laujvoh doengh aen guekgya neix dem. Ndigah, gij dinfwngz soujgunghyi ringaek Cinyenj youq Cingciuz gaenq hwngfat ndaej gig ndei lo.

Canghrin Cinyenj dinfwngz cingmaed naeklaeg youh daegbied. Gij fuengfap deu rin Cinyenj miz deufouz、deuluenz、deulouj, ndawde cinyenj deuluenz guh ndaej ceiq ndei. Gyoengqde ndaej deu ok saeceij rin、ma rin、ciengh rin、muh rin、rum rin、sigbei……Hingzsik lai yiengh, yienghceij boeksaed miz funggek ciuhgeq, deu ndaej saeqnaeh, yawj aen yiengh de, gij hung de viyiemz sekda, gij iq de gyaqciq gyaeundei. Moix bi cungj miz haujlai ringaek gai daengz ndaw guek rog guek, hawj bouxdeuyaenq ndaej canh di ngaenz he.

Mbanjnganzcau couhdwg aen mbanj guh gij dinfwngz guh ringaek gig miz daibyaujsing ndeu. Mbanj de gaek sigbei gaek ndaej ceiq lai, caemhcaiq baengh gij doz lai、soujfap lai、gaek ndaej saeqnaeh okmingz, dwg “aen mbanj deugaek” gyawj gyae cungj mizmingz ndeu. Ndaw mbanj lij miz geij aen ndoeng beimoh ce ndaej ndeicaez、daengjsoh caezcingj. Doengh aen ndoeng beimoh noix goj miz bak lai gep bei, lai cix miz seiq haj bak gep bei. Doengh gij beimoh neix cungj dwg aeu rinyienh gaek baenz, gwnzde gaek miz cihsaw, gyaeujbei miz luenz miz seiqfueng, mbangj gaek raizfwj, mbangj gaek song duz lungz, yawj hwnjbae lumj gij caen dahraix, roxnaeuz gaek miz “seiqdaih hwnghoengh” “gij ndei cienz bak daih” doengh cih saw neix dem. Cihsaw gwnz bei gaek ndaej miz rengz raixcaix, haeuj rin laeg, lij yawj ndaej cingcuj dangqmaz. Gaiqgaiq dinbei cungj miz gaiq demh ndeu, caeuq gepbei nem youq gaenjdwt, yienznaeuz gaenq deng rumz haenq fwn rwed ndit dak haujlai nanz, hoeng gepgep cungj ndeilaeklaek.

Mwh gaek de, aeu youq gwnz sa veh doz okdaeuj gonq, liux le aeu faenjbit roxnaeuz danq ciuq doz youq gwnz rin veh ok gij yiengh cij hainduj gaek. Bouh daih’it dwg genj liuh, ceiq ndei dwg aeu cungj rin mbouj miz geh mbouj miz raiz rinlauz, mwh vat rin noix aeu roxnaeuz mbouj aeu ywbauq bae caq aeu, fuengzre dwk rin vaih; bouh daihngeih dwg aeu dag ndei gij cikconq gepbei caeuq gaiqdemh, daihgaiq gaek ok gij yiengh de; bouh daihsam cij sijsaeq gaek, seizde aeu daj giz ceiq hoj guh de roengz fwngz, daegbied dwg giz conq congh, giz de aeu daj ndaw gaek doxok; bouh daihseiq couh dwg muz rin caeuq ngadngaeuz.

Lingz Gizgan canghrin neix youq bi 1945 okseng, de daj 20 sigij 60 nienzdaih couh hainduj hag gaek rin. “Gou baenz seiqvunz cungj caeuq rin miz gvanhaeh, ringaek mboujdan dwg gij dinfwngz gou aeu bae ra gwn gvaq ndwenngoenz, caemh dwg gij gyaezmaij gou. Vat rin ndaej caiq daj dingjbya daeh rin roengzma, lij aeu heh rin、muz rin dem, mwh muz de, seiqhenz cungj boenqfoenxfoenx.” Yienznaeuz guh neix hoj lai, hoeng gij dinfwngz conzdungj neix youq mwhhaenx cix dwg gij hong cawjdaeuz Lingz Gizgan ra gwn gvaq ndwenngoenz de. “Mboujdan vat rin hoj, gaek rin caemh aeu miz naihsim cij ndaej. Gaek song duz ma rin aeu gaek 10 ngoenz baedauq, gaek gep bei ndeu aeu yungh gaek ndwen ndeu.” Lingz Gizgan naeuz, siengj hag ndei faenh dinfwngz guh ringaek neix, aeu da raeh、naih ndaej, de maqmuengh miz vunz ndaej swnjcienz faenh dinfwngz neix roengzbae. “Hoeng hong deugaek hoj guh caemhcaiq ndaej ngaenz noix, seizneix bouxcoz cungj haengj okrog bae dajgoeng ra cienz, mbouj miz vunz nyienh hag gij neix lo. Gyoengq canghrin mbanj dou nienzlingz sang lo, da raiz lai, gaenq mbouj miz rengz laebdaeb bae gaek rin, gij dinfwngz neix aiq yaek saetcienz lo.”

Moix gaiq ringaek, cungj dwg gij hongbaenz canghrin genhciz guh ndaej haenx. Doengh boux canghrin Nganzcau nienzlingz laux haenx caeuq gij dinfwngz roebdaengz yaek saetcienz caeuq gij goj gangj mbouj liux gyoengqde, couh lumj diemj rongh ndaw laepngau, hawj vunz maezlienh youh hawj vunz ngeix laeg.

Vihliux baujhoh gij dinfwngz conzdungj Cinyenj neix, dangjveij、yinzminz cwngfuj caeuq yienh vwnz- dijgiz diegde guenjleix caeuq gamduk dazyinx vunzlai ciepcienz caeuq hwngfat gij dinfwngz guh ringaek, loengh cingcuj gij cingzgvang de, cazyawj gij dinfwngz ringaek conzdungj neix dwg daj seizlawz hainduj miz、youh dwg baenzlawz hwngfat, caz cingcuj gij daegdiemj fuengfap gi’gyauj ringaek caeuq gij gyaciz de, caemhcaiq miz suenqveh、miz bouhloh bae baujhoh de. Bi 2012, gij dinfwngz guh ringaek Denhdwngj Cinyenj ndaej senj haeuj buek daihseiq swcigih gaep feihvuzciz vwnzva yizcanj hanghmoeg mingzloeg.