Haicin daengz ndwenngeih

Nuengx bae reih ndaem faiq

Ndwensam raih ok ngaz

Gouj haet ra dok mbaw

Nuengx dawz geuz bae lat

Nuengx dawz gvak bae ndai

Ndwenhaj hai ciemz rum

Faiq lwg maj baenz cumh

Ndwencaet vunz daihwngq

Go faiq hwnj baenz aen

Ndwenbet raen mbwn sauj

Dauqcawq faiq hausak

……

Faiq ndaek gienj baenz gaem

Daz baenz mae baenz sienq

Dawz daeuj cienq raemx yw

Dawz bae cw ndaw ongq

Dawz bae longj raemx saw

Dawz ma lajroq dak

Rag bae hoij gaqfaex

Seiq gyaengh ding seiq gok

Daz ndaw youh daz rog

Haeujok baenq mbouj dingz

Geuj le gvingz dem gvingz

Baenz baiz ing baihrog

Dawz bae hwnj gaqrok

Congzrok baij gyang ranz

Yienghyiengh an ndei liux

Aendaeuq biu ok fwngz

Daemj gvaq samcib ngoenz

Baenz baengzhoengz baengzhau

Baengz moq bau baenz ndaek

Diuzdiuz geij cungj saek

Baenzlai saek lae yiengh

Bajliuz ciengj daeuj ngonz

Beixnuengx comz daeuj yawj