Ndwen 10 ngoenz 15 daengz ngoenz 17, 2021 Cungguek-Dunghmungz Bozlanjvei Lijyouzcanj（baih- laj heuhguh “lijyouzcanj”） youq Gveilinz Si banh sat. Gaiq lijyouzcanj neix yungh gij hingzsik langhbaij “ndaw bouq baij+gwnz muengx baij lijyouz”, ndaw bouq langhbaij gveihmoz dwg 2.5 fanh bingzfuengmij, gungh miz 50 aen gihgou youq Cungguek guekgya caeuq dieg rog guek、15 aen swngj（swcigih、cizyazsi） ndaw guek、Gvangjsih 14 aen si comz vunz camgya langhbaij, Dunghmungz cib guek cienzbouh daeuj camgya langhbaij.

Ciuq cam rox, gaiq lijyouzcanj neix daegbied cingj bouxcawx mauhgvaq 300 boux, ndawde bouxcawx ndaw guek daj 23 aen swngj(swcigih、cizyazsi) daeuj, gwnz muengx bouxcawx rog guek daj 20 aen guekgya caeuq dieg daeuj. Ndaw bouq laebnda miz aen guenj cawjdaez “rangh ndeu loh ndeu”、aen guenj cingbinj lijyouz rog guek、aen guenj cingbinj lijyouz ndaw guek、aen guenj cangboiq lijyouz canjnieb、aen guenj sawjcienz lijyouz caeuq aen guenj huq lijyouz gozci daengj 7 aen guenj hung, baugvat yienghsiengq lijyouz、sawjcienz lijyouz、huq lijyouz、cangboiq lijyouz canj- nieb、coengmingz lijyouz、vwnzboz vwnzcang 6 aen loihhingz.

Ciuq cam rox, gaiq lijyouzcanj neix engq doedok le langhbaij sawjcienz lijyouz, gyalai najdieg langhbaij dieg sawjcienz, gungh laebnda miz cangboiq lijyouz canjnieb、sawjcienz lijyouz caeuq huq lijyouz gozci sam aen guenj langhbaij sawjcienz lijyouz, doengzseiz cujciz giyez camgya langhbaij doiok lai hangh banhfap sawjcienz lijyouz hawj beksingq ndaej leih, gyavaiq doidoengh dauqfuk lijyouz ginghci caeuq lijyouzyez hwngfat youh ndei youh vaiq. Youq yawhfuengz guenj- hanh binghraq lajde ok rengzhoengh hawj sawjcienz lijyouz、dauqfuk ginghci; diuzcingj laeb aen guenj sawjcienz cangboiq lijyouz, doenggvaq aen bingzdaiz langhbaij lijyouz haiguh canjnieb ciu seng’eiq, yinx ndaej engq lai giyez cangboiq lijyouz haeujsim、an’gya Gveilinz Si; Gugungh Bozvuzyen、Guekgya Duz- suhgvanj、Cungguek Meijsuzgvanj daengj aen guenj mizmingz Cungguek camgya lijyouzcanj, yienh’ok vwnzva yenzsu doxhab.(Ciengj Yauz)