Sinhvazse Baekging ndwen 10 ngoenz 17 dienh Youq mwh raen vwnzva Yangjsauz caeuq gaujgujyoz daihneix Cungguek ndaej 100 hopbi, Cunghgung Cunghyangh cungjsuhgi、guekgya cujsiz、Cunghyangh Ginhveij cujsiz Siz Ginbingz fak saenq cukhoh, daiqbiuj Dangjcunghyangh cukhoh caeuq camnai gyoengq boux- guhhong gaujguj daengx guek.

Siz Ginbingz ceijok, 100 bi doxdaeuj, geij daih vunz gannanz cauhguh、roengzrengz mbouj soeng, aeundaej cingzcik gaujguj baenzroix, langhbaij le gij goekgaen Cunghvaz vwnzmingz、megloh hwngfat、cingzcik ronghlwenq caeuq doiq seiqgyaiq vwnzmingz gung’yen hungnaek, vih engq ndei roxnaj Cunghvaz vwnz- mingz goek gyae rag raez、gvangq- langh naeklaeg fatok le cozyung youqgaenj.

Siz Ginbingz maqmuengh gyoengq bouxguhhong gaujguj gyalai roxnyinh sawjmingh caeuq cwzyin lizsij, fatyiengz gij cienzdoengj ndei siujsim caen guh、ganhoj buekguh、gyaezhong okrengz, laebdaeb damqra giz caengz rox、biengjloh goekrag, roengzrengz hwnjguh aen gaujgujyoz miz daegsaek Cungguek、miz funggek Cungguek、miz baijdaeuz Cungguek, engq ndei langhbaij yienghndei Cunghvaz vwnzmingz, fatyiengz gij vwnzva cienzdoengj maenhndei Cunghvaz, vih saedyienh aen siengj- muengh Cungguek Cunghvaz Minzcuz fukhwng hungmbwk langh’ok rengz hung moq.

Aen Hoih Geiqniemh Raen Vwnzva Yangjsauz Nem Gaujgujyoz Daihneix Cungguek Ndaej 100 Hopbi ngoenz 17 youq Hoznanz Swngj Sanhmwnzyaz Si haimuq, youz Cungguek Sevei Gohyozyen、Guekgya Vwnzvuz Giz、Hoznanz Swngj Yinz- minz Cwngfuj caezcaemh cawjbanh. Bi 1921 ndwen 10, Hoznanz Swngj Menjciz Yen vat dieggeq Yangjsauz, hainduj le gaujgujyoz daihneix Cung- guek.