Bonjbauq gicej(Maj Veiyungz /马慧蓉) Cibbet Daih Aendangj dox- daeuj, Nanzningz Si hopndaet diuz sienqmeh cukmaenh gij eiqsik caez- caemh Cunghvaz Minzcuz, geiqmaenh gij daengqdak Siz Ginbingz cungj- suhgi, genhciz yungh caez yungh ndei yungh lix gij cwngcwz minzcuz, fugsaeh dieg minzcuz hwngfat ndaej caetliengh sang. Baezneix, raeuz bae daengz Nanzningz Si Sanglinz Yen Cinhih Yauzcuz Yangh, yawjyawj dieg minzcuz dwg baenzlawz saedguh gij cwngcwz minzcuz aendangj.

Cehgenh Banggungz Youq Bakranz

Vihliux hawj vunzlai ndaej senj- ranz、miz hong guh、caez baenzmiz, bi 2017, aen cwngfuj Cinhih Yauzcuz Yangh caeuq giyez doxgap, guh doengh aen hanghmoeg “cehgenh banggungz daengz lajmbanj”, youq Mbanjbaizhungz、Mbanjlungzgvei、Mbanjyangzcau、Mbanjfuzswj daengj laebdaeb hwnq cehgenh, sou le buek bouxgungzhoj bae guhhong, vunzlai daegbied dwg doenghboux mehmbwk henranz laeng bakranz couh ra ndaej hong, mbangj boux ok rog bae dajgoeng de rox le caemh dauqma ranzmbanj guhhong.

Aen diemjanhci senjdieg Cinhih Yauzcuz Yangh gungh miz 208 hoh 795 vunz, Loz Cunhli ranz de couh- dwg ndawde ranz ndeu. Bi 2021, Nanzningz Cunghhoz Sienghbauh Youjhan Gunghswh youq aen diemj- anhci neix hai fwnhcangj. Guh sienghbauh mbouj miz gijmaz gisuz cix mbouj caz naeuz miz mbouj miz vwnzva, aeu vunz lai, hong soengset heih hag heih guh. Guh gijneix ndaej canh di ngaenz, gizde liz ranz hix gyawj, vunzlai cungj nyinhnaeuz neix dwg saehndei. Ndigah, aen cehgenh neix baez hai, haujlai mehmbwk caeuq doengh boux mbouj miz hong guh de foenfoen haeuj cangj guhhong. “Gou ndaej rom di ngaenz he boujdiep ndawranz, gizde liz ranz mbouj gyae, hix ndaej ciuqgoq ndawranz.” Dingq- nyi gicej cam de, Loz Cunhli miz di nyaenqnyuq, hoeng gangj daengz gijneix, de cix gangj cix riu.

Aen cehgenh neix gaenq miz 3 diuz swnghcanjsienq. Cangj de gigen aeu, vihhong gihdung, bouxlauxhangz de it ndwen bingzyaenx cungj ndaej 2500 maenz doxhwnj. Cangj de lij suenq naeuz dawz mbangj hong soujgoeng fat daengz ndawranz bae, hawj vunz guhhong lingzvued, daiq- doengh bouxndaejhoengq camgya swnghcanj dem.

Canjnieb Hoengh Mbanj Vunz Baenzmiz

Cinhih Yauzcuz Yangh dwg gexlueg rin lai youq laeng baihsaebaek Sanglinz. Bya rin lai, reihnaz noix, vunzlai caenh gag baengh ndaem haeuxnaz caeuq haeuxyangz gvaq ndwenngoenz. Canjnieb mbouj lai, hwngfat mbouj hwnjdaeuj, aeu baenz- lawz guh vunzmbanj cijndaej gvaq hwnj saedceij ndei ne?

Vihneix, yangh de douz le 350 fanh maenz hwnq le 4 aen suen yienghbanj aeu canjnieb daegsaek bangrex mbanjgungzhoj, couz le 398 fanh maenz youq Mbanjyangzcau caeuq Mbanjfuzswj gak hwnq le aen dieggiek swnghcanj gij raet ndaej gwn. Linghvaih, gak aen danhvei bangrex caemh gaenxmaenx bang gyoengqde. Miz canjnieb lo, hoeng, baenzlawz gai、gai hawj byawz youh hawj gyoengqvunz veiznanz lo.

“Mbanj dou ciengj gonq hwnq le Aen Camhfuzvu Densangh Banggungz Mbanjyangzcau, aeu hozcozse+gungh- swh+ranzgungzhoj bae baucang caeuq gai gij doxgaiq miz daegsaek de.” Bouxsuhgi daih’it Nanzningz Si Cwnghez baijcap Mbanjyangzcau Maj Liyoz geqnaeuz. Bi 2019, caiq miz gij cwngcwz aeu siuyungh banggungz. Neix caen dwg raq fwn gib ha, gyoengq ganbu cungj angq raeuh. Aen camhfuzvu banggungz baez hai dou, bouxsuhgi daih’it couh guhdaeuz gai huq. Doxgaiq couh yienghneix gai okbae lo, vunzmbanj cungj roxnyinh saedceij engq miz muengh lo.

Byawz rox, bi de nienzdaej, sawqmwh miz binghraq bwtndat lo. Seizde gij roenloh gai huq cienzdoengj ca mbouj geijlai cungj gai mbouj bae, aeu baenzlawz guh ne? Mboujnex sawq youq gwnzmuengx gai? Ganbu ndawmbanj couh hai le aen veihsin siujcwngzsi “Huqdoj Yangzcau”, guh najna youq baengzyouxgenh、aen ginz segih cawx doxgaiq gai haeuxbeg、youzduhdoem、raetnae、raetmoegngaex daengj. Yienghneix doxgaiq dauq siu ndaej vaiq. Miz binghraq doxdaeuj, mbanj de gungh gai le 70 buek “huqdoj”, canh le 45 fanh maenz. Daengz bi 2020 nienzdaej, aen camh- fuzvu canh le 300 fanh maenz.

Gohgi Ciengx Mou Vunqsik Ndei

Bi 2019 gaxgonq, Mbanjfuzswj dwg yangh de gij mbanj gig gungzhoj ndawde aen ndeu, doeklaeng dauq aenvih aeu gohgi ciengx mou okmingz.

Fanz Binhbinh gaxgonq youq rog guh gyadienh seng’eiq, de dingjlingz rox, caenh ciengx mou ne, ndaw- yangh ndawyienh couh miz ngaenz boujdiep! De gag ngeix, guekgya baenzlai yawjnaek hangzdajciengx, riengz cwngcwz byaij mbouj loek law. Bi 2019, de ma mbanj cienmonz ciengx mou, lij laeb le Yangzfanz Hozcozse. De youq gwnzmuengx gaghag、youq veihsinginz cam conh- gyah, camgya gij ban son baenzlawz gohyoz ciengx mou cwngfuj hai de. Bi de, saehndei gag daeuj ra de. Nanzningz Si Cwnghez aen danhvei bangrex Mbanjfuzswj douz le 80 fanh maenz bang hozcozse hwnq ndei gij sezsih dieg ciengx mou, hozcozse caiq gag ok 60 fanh maenz cawx roknda. Aen dieg ciengx mou Sinhhihcangh Mbanjfuzcwj couh guh baenz lo. Aen de caenh aeu song boux vunz couh ndaej guenj ndei 1000 duz mou lo! Neix dwg baenzlawz guh daengz ne?

Ranzmou fung liux, cang miz lai aen conzganjgi caeuq gij roknda liz gyae gungci swdung haenx, 35 aen sezsiengdaeuz gizgiz、lai gok、seizseiz gamhaed. Fanz Binhbinh geqnaeuz:“Youq aen gvanjlij hidungj ciengx mou neix ndaej cazyawj、diuzcingj ranzmou dwg hwng roxnaeuz liengz、mbaeq roxnaeuz hawq, liz gyae couh ndaej gueng raemx gueng liuh. Yienghneix duzmou mbouj gaenh vunz, caemh ndaej fuengzre Mouraq Feihcouh cienz haeujdaeuj, duz mou caemh mbouj baenz bingh geijlai lo.”

Ciengx mou lij daiqdoengh le gizyawz canjnieb hwngfat dem. Baih henz dieg ciengx mou lij guh le aen dieggiek dajndaem byaek youjgih, gij haex nyouh mou baez cawqleix couh ndaej aeu bae dwk go’byaek, neix mboujdan gaijgez gij vwndiz haex nyouh uqlah, lij ndaej“bienq rwix baenz ndei”.

Nungz Vwnz Lij Yungzhab Hwngfat

Roensuijniz yawj mbouj raen gyaeuj, yied gyawj mbanj, roen couh yied bingz, song henz dwg benqbenq nazhaeux roxnaeuz gaiqgaiq dieg haeuxyangz、dieg gonengznuengx vangraeh doxgap, yaep yawj gvaqbae, dauqcawq heusausau、hoenghfwdfwd. Neix couhdwg Mbanjbaizbah laeng Cinhih Yauzcuz Yangh Baizhungz Cunh. Bi 2017, mbanj de ndaej bingzguh“Aen Mbanj Miz Gij Daegsaek Siujsoq Minzcuz Cungguek”.

Caengz raen vunz couh dingqnyi sing gonq, ngamq haeuj bakmbanj couh ndaejnyi singgyong, yaep gaenj yaep menh, seiz sang seiz daemq. Gij vwnzva yangh de naekna, “gyong- byayauz” dwg gij yozgi cienzdoengj Yauzcuz dieg de, neix daj Sungqciuz cienz daengz seizneix, gaenq miz saek cien bi lizsij lo. Mbanjbaizbah couhdwg aen mbanj dienjhingz ndeu. Mbanj de vunz Yauzcuz ciemq soq vunz daengx mbanj 84%. Baez daengz Mbanjbaizbah, vunzmbanj eu fwen Yauzcuz daeuj coux dou, diuh fwen ndeidingq rwenz raeuh. Bouxdonz- cangj Yauzsanhgoh Yisuzdonz Baiz- hungz Cunh Luz Cwngz naeuz dou nyi：“Daihgya comz youq giz ndeu gangj saeh roxnaeuz raen naj dongx vunz cungj eu fwen. Ngoenznaengz cawj- daeuz eu gij cwngcwz leihminz aendangj、ndwenngoenz vuenyungz moq aendangj lingjdauj daengj.”

Luz Cwngz dwg bouxciepcienz feihyiz fwen Yauzcuz, de naeuz:“Bi 2009 mbanj dou couh gag laeb le aen Yauzsanhgoh Yisuzdonz, seizneix miz 30 lai vunz, daihgya cungj dwg aenvih gag haengjheiq doxcomz youq giz ndeu.” Haidaeuz, baez daengz ndawmbanj roxnaeuz seiq henz gyawj guh laeuj、guh sam nyied sam、ciet Daznuj daengj hozdung, donz de couh bae biujyienj, menhmenh couh okmingz le, couh ciengzseiz miz vunz iu gyoengqde okrog bae biujyienj, gij vwnzva gaeuqgeq neix couh yiengh- neix byaij daengz dangqnaj vunzlai.

Miz gij cwngcwz minzcuz aendangj bangrex, gyawj geij bi neix Mbanjbaizbah bienqvaq gig daih. Baezlaeng, yangh de lij aeu byaij diuz roen nungzyez、vwnzva caeuq lijyouz doxgap de, mboujduenh gyamaenh gij hongbaenz gunggeng duetgungz, doidoengh lajmbanj hwnghoengh, cauhguh aen Mbanjyauz minzcuz doxgiet、huzndei vuenyungz ndeu.