It

“Vek——vek——”, haetromh, bakdou ngaenzhangz couh miz sing mou hung heuh, nyex ndaej boux bae boux dauq cungj humx gvaqdaeuj yawj geizheih.

Bouxsai daenj buhraizva gen- donh, gwnz naj mumh ndaemndatndat he cam:“Geij duz mou hung neix yaek gai geijlai ngaenz?”

Bouxsai ga’ndiengj, daenj geu buhgek moq ndeu byaij ok gyang vunzlai daeuj, naeuz:“Song duz mou neix dwg dawz daeuj soengq vunz, mbouj gai ni!”

Daengz seiz hwnjban, ngaenz- hangz hai dou lo, boux baujanh ndeu gvaqdaeuj naeuz:“Vei, vei, sou mbouj ndaej daeuj neix guh gaicawx bw, vaiq dawz gij doxgaiq sou buen gvaq gizwnq bae, youq gizneix guh gaicawx git vunz daeuj ngaenzhangz banhsaeh bw.”

Bouxsai ga’ndiengj naeuz:“Dou mbouj guh gaicawx ni, song duz mou neix caeuq gij mak neix dwg dawz daeuj soengq hawj ngaenzhangz.”

Ngaenzhangz hangzcangj dwg bouxsai ndang byom sang ndeu, aiq dwg baujanh gaenq lwnh de nyi bakdou miz gij saeh neix ba, de byaij ok bakdou ngaenzhangz, riu cam bouxsai ga’ndiengj:“Dingqnaeuz mwngz yaek soengq gij doxgaiq neix hawj ngaenzhangz?”

Bouxsai ga’ndiengj naeuz:“Dwg vei, hoeng mbouj dwg gou boux ndeu soengq, dwg gyoengq vunzmbanj guhdoih soengq, gyoengqde naeuz geij bi neix, ngaenzhangz bang dou lailai, seizneix mbanj dou ranzranz fatcaiz lo, ndaw mbanj yienghyiengh bienq ndei, mbouj rox aeu maz daeuj bauqdap ngaenzhangz, cieng yaek daengz lo, daihgya gietdingh soengq di neix hawj sou.”

Hangzcangj dingq daengz neix, roxnyinh gig ndeiriu youh gamj- doengh. De naemj: Vunz soengq ngaenz soengq laeuj, soengq haeux soengq ien, caengz raen vunz soengq mou lix gvaq bw!

Hangzcangj naeuz:“Bang raeuz lajmbanj gaijbienq diegyouq, bang boux gungzhoj duetgungz baenzfouq, gijneix cungj dwg hong duh dou, aen sim sou dou lingx lo, doxgaiq dou mbouj ndaej sou, mwngz dawz dauq- bae ba!”

Bouxsai ga’ndiengj mbouj roxnaj hangzcangj, de naeuz:“Caeuq mwngz gangj vah mbouj suenqsoq, mwngz heuh Siujvangz caeuq Siujliuz gvaq- daeuj, gou roxnaj gyoengqde, gou heuh gyoengqde sou roengzdaeuj.”

Hangzcangj du bak riu dwk, cienq ndang byaij haeuj ndaw ngaenz- hangz bae lo.

Ngeih

Bouxsai ga’ndiengj heuhguh Maj Yungzdau. Maj Yungzdau ndaej seiq- cib lai bi, ndang byom noh nyangq- nyat, gwnz naj san rim riznyaeuq. De seng ok dungx meh couh ga’gvez, byaij loh ndiengjngak ndiengjngak, guh mbouj ndaej hong naek, bingzseiz couh guh di hong dajsan gai aeu ngaenz daeuj ciengx mingh.

Maj Yungzdau dinfwngz ak, de san gij lozcuk、geicuk、ndijcuk aenaen baenzyawj youh ndeiyungh, doengh- baez dawz daengz gwnz haw, cuengq roengz mbaq yaep he couh miz vunz cawx aeu seuqsat.

Dahnaenj ndaw mbanj dwg bouxngoemx ndeu, seng ok dungx meh couh mbouj rox gangj vah, bohmeh de raen Maj Yungzdau miz dinfwngz, gig naemj hawj Dahnaenj haq de.

Maj Yungzdau naemj: Ngaenz noix ciengx hoiq gvez, lozlez mbouj lw bakvauq. Gou ndanggoek yienghneix, aeu dahsau ndei hix mbouj ndaej, couh Dahnaenj ba.

Ndawranz song boux cungj dwg ndang gyad, guhgya youh ciengx lwg, ndawranz yied ngoenz yied gungzhoj.

Cin daengz doenghgo maj, mbwn raeuj bak va hai. Guekgya guh cingh- cunj fuzbinz, ranz Maj Yungzdau ndaej dingh baenz ranzgungzhoj, cwngfuj siengj banhfap daeuj bangcoh de. Maj Yungzdau ndaej baihgwnz haj fanh maenz ngaenzbangfuz, de couh daengz gwnz bo bakmbanj guh ranz- mou ciengx mou.

Haj fanh maenz ngaenz ngamq guh ndaej song baiz ranzmou, cawx ndaej cib duz moumeh, ngaenz couh yungh sat lo. Lij ndei, Maj Yungzdau ciengx mou bi he couh miz roek duz moumeh roengz lwg, de gai moulwg canh di ngaenz, cungjsuenq miz di souhaeuj lo.

Maj Yungzdau ndang gyad sim mbouj gyad, de naemj: Danghnaeuz moumeh seng geijlai moulwg cungj ciengx baenz mounoh cij gai, mbouj engq ndaej canh ngaenz ha?

Naemj daengz neix, de couh yawjraen baihnaj engq miz rongh, couh yawjraen swhgeij gaenq duet- gungz baenzfouq lo, de angq raixcaix. Yaep ndeu aen naj riu de youh caemrwg roengzdaeuj lo. De sim hung rengz mbouj cuk, naemj guh daihsaeh ra boux bang mbouj miz.

Ngoenzneix ranz ronghcingx le, Maj Yungzdau couh ok dou naemj bae ranzmou guhhong. Doengxhaet de ok ranz le couh cigsoh bae ranzmou, haetneix de daeuj daengz bakmbanj couh caiq mbouj yamqdin lo.

Sam

“Lauxgo, mwngz youq neix guh maz ni?” Maj Yungzdau boux ndeu naemj saeh sibsib, sawqmwh dingqnyi miz vunz dongx de, de ngeuxgyaeuj bae yawj, daegsai caeuq dahmbwk ndeu cingq byaij daeuj coh de.

Maj Yungzdau naeuz:“Gou bungz daengz gienh saeh hoj guh he lo, seizneix gaenq dwg feiz doek gwnz din, mbouj rox baenzlawz guh ndei.”

Bouxsai vix dahmbwk haenx naeuz:“De dwg Siujliuz, gou dwg Siujvangz, dou song boux dwg youq ngaenzhangz guhhong, ngoenzneix roengz mbanj daeuj, dwg yawjyawj gag boux vunzmbanj miz maz aeu dou bang, hab bang dou couh bang.”

Maj Yungzdau dingq le, angq- vauvau naeuz:“Ndei lai lo, ndei lai lo. Sou dwg soengq saehndei daeuj hawj gou ha!”

Maj Yungzdau muengz dawz gij simsaeh de lwnh hawj Siujvangz caeuq Siujliuz dingq. De naeuz:“Ciengx mounoh, couh aeu lai yungh ngaenz, seizneix gou ngaenz mbouj gaeuq, gou couhdwg vih gienh saeh neix simnyap lo.”

Siujvangz naeuz:“Dou ngoenz- neix couhdwg soengq ngaenz daeuj hawj mwngz, gaej you lo, bae, raeuz guhdoih bae yawj gij mou mwngz gonq.”

Geij boux doq gangj doq byaij coh ranzmou Maj Yungzdau bae. Ranzmou de faen guh sam lied, lied he, ciengx gij moumeh caengz roengz lwg, lied he ciengx gij moumeh cingq cij moulwg, lied he ciengx moulwg. Seizneix ndaw ranzmou miz hajcib geij duz moulwg, duzduz naeng hoengz noh oiq, yaek baenz gai lo.

Maj Yungzdau naeuz:“Gou couh naemj daj buek moulwg neix hwnj, baez miz moulwg couh ciengx baenz mounoh cij gai, yienghneix, guh ranzmou、cawx swzliu、cawx yw、caux gij doxgaiq sawjyungh, mbouj miz cib fanh bet fanh maenz ngaenz baenzlawz guh ndaej.”

Siujvangz caeuq Siujliuz caenda raen Maj Yungzdau ciengx mou, youh dingq daengz de baenzneix dajsuenq, song boux doxyaeng yaep he, Siuj- vangz naeuz:“Lauxgo, mwngz gaej you, ngoenzlaeng mwngz bae ngaenz- hangz gwnz haw banh daigvanj ba, dou gietdingh hawj cib fanh maenz daigvanj hawj mwngz ciengx mounoh.”

Siujvangz song boux nai Maj Yungzdau geij coenz le, couh gvaq gizwnq bae lo.

Seiq

Miz vah naeuz “Ciengx mou mbouj ndaej ngaenz hix ndaej haex, ndaem faex mbouj baenz saeu hix ndaej fwnz”. Ndaej ngaenzhangz daigvanj bangcoh, Maj Yungzdau ciengx mou lai lo, haex mou hix lai lo, de dawz gij haex mou soengq hawj bouxndaemmak bae dwk gomak, gij bomak gaenh ranzmou de haenx, gomak youh hung youh cangq, mak giet aen sejrubrub. Maj Yungzdau ciengx mou ndaej ngaenz lo, vunz- mbanj ndaem mak hix ndaej ngaenz lo. Vunzmbanj bouxboux hwnj ranz moq, ndaw mbanj loh bingz luengq seuq, daengx vunzmbanj gyo’mbaiq gungcanjdangj cwngcwz ndei, boux- boux naemj bauqdap miz ngangzhangz bangcoh, baenzneix couh miz gij saeh baihgonq lo.