Mbat banringzgvaq seizcou ndeu, gou gag youq dieg lienhndang guhcaemz, gou song fwngz gaem suenggangq, bibuengq le song mbat, lumj duzlingz iq nei, bi bae naj, caiq diuq roengzdaeuj, an’onj roengz dieg.

“Ai! Caen mbwq ha! Gyoengq siujbaengzyoux bae gizlawz liux? Guhlawz mbouj miz vunz caeuq gou guhcaemz?”

“Danghnaeuz daxmeh ndaej buenx gou guhcaemz couh ndei lai lo, hoeng daxmeh lij guh hong, mbouj ndaej buenx gou guhcaemz.”

“Danghnaeuz Senhsenh youq gizneix couh ndei lai lo, hojsik de gaenq caeuq boux lwgmbwk biz- bodbod wnq baenz baengzyoux ndei, mbouj caeuq gou guhcaemz lo, ai!”

Baez naemj daengz gienh saeh neix, gou ndawsim yaepyet couh siengsim, raemxda doek lo, menhmenh gyangznaek mbat ndeu.

Sawqmwh, gou yawjraen youq gwnz roen henz aen laerod iq miz boux lwgmbwk gwih danci ndeu. De naj luenzlwd, byoem dinjdet daengz goek rwz, lwgda hunghwd、sawdikdik, gak da miz di goz doxhwnj, yawj hwnjbae dwg vunz caemcingh.

“Gou caeuq de guh baengzyoux ndaej lwi？”

“Aen ci de ciq hawj gou gwih yaep ndeu ndaej lwi？”

“Danghnaeuz de mbouj ei, gou yienghneix mbouj dwg mbouj miz danaj, ai! Mbouj guenj lo, vih mbouj boux dog baenzneix mbwq, gou lijdwg cawjdoengh di ba.”

Gou miz di najmong buet gvaqbae caeuq de naeuz：“Gou ciq aen ci mwngz gwih yaep ndeu ndaej lwi？”

“Ndaej ha.” Dah haenx dapwngq gou sangjswd. Gou gwih youq gwnz aen danci saekmaeq de, song ga caij ci riengjret, gwih bae coh baihnaj riengjret. De youq baihlaeng gyaep gou, gou caeuq de itloh angqyangz riu cung bae coh baihnaj .

“Bung!” Boihseiz, de laemx lo. Gou guhmuengz gwih doxdauq, mwh caj gou gwih daengz henz de, de gaenq ndwn hwnjdaeuj lo. “In mbouj in ha? Ok lwed law?” Gou guhmuengz cam de baenzlawz yiengh, “mbouj miz saeh, mbouj miz saeh, dan log di naeng.” De sing daemq naeuz. Gou caeuq de couh yienghneix baenz baengzyoux ndei lo.

Daj seizhaenx le, dou ngoenz- naengz cuengqhag cungj doxcaez guh- caemz. Dou miz haujlai gyaezmaij doxdoengz, lumjbaenz vehveh, byaenj naezgau……Song dou daegbied gyaez byaenj duzgungjlungz iq caeuq duzngwz iq, dou lij doxcaez yawj ceksaw veh gungjlungz, doxcaez raiz cozyez, doxcaez dingq gojgaeq.

Miz ngoenz ndeu cuengqhag, gou bae ranz de ra de guhcaemz. Gou youq rog cueng heuh: “Yiz Siujgyauh, vaiq okdaeuj guhcaemz!” Aen cueng hai okdaeuj, boux daxbuz sienh ndeu doiq gou naeuz: “Gyauhgyauh gaenq buen ranz lo, seizneix dwg gou caeuq daxda de youq gizneix.” Gou dingq le ndawsim youq hoj dangqmaz, ngaem gyaeuj doeknaiq byaij baedauq. Gou daeuj daengz baihnaj aen laerod, hainduj dauqngeix gij saeh angqyangz gaxgonq dou.

“De guhlawz couh buen ranz lone?”

“De guhlawz mbouj caeuq gou naeuz ne？”

“De lumz gou bae lwi？”

“De dwk dienhvah hawj gou lwi？”

Dauq daengz ranz le, gou coemj haeuj ndaw rungj daxmeh bae daej, gou lwnh gienh saeh neix hawj daxmeh. Daxmeh doiq gou naeuz: “Gyauhgyauh buen ranz bae aen hagdangz wnq hwnj hag lo, gvaqlaeng aiq mbouj dauqma lo.” Daxmeh lij doiq gou naeuz, ciuhvunz moix boux cungj miz haujlai baengzyoux ndei, gou gvaqlaeng lij miz bouxdoih moq. Mwh bouxdoih youq doxcaez, itdingh aeu insik gij cingzngeih song vunz！

（Baekging Si Haijden Gih Vujyiz Siujyoz ngeih nienzgaep Coj Swjyi boux lauxsae son’gyauq Vei Gaij）