Lungz Byauh cingq yaek haibak caiq gienq daxmeh de, fwt nyengh lo, rog ranz miz gij sing yamqdin luenhnyaengnyaeng, de aj bak veq gyaeuj, haeujsim nyengrwz dingq gij doenghdanh baihrog.

Meh de hix ndaejnyi lo, baez fanndang, simvueng naengh hwnj- daeuj.

“Gaej ok sing!” De rex daxmeh dauq ninz roengzdaeuj, laebdaeb sijsaeq dingq.

Dwg gij sing yamqdin, lukluk liklik, hunghung iqiq, daj henz ranz de byaij gvaqbae, ndawde lij cab miz song sam sing ae dem, menhmenh bienq iq、mbouj miz lo.

“Byaij coh laeng bya!” Gij sing daxmeh de saenzdwddwd gangj, “caeuq bihaenx doxdoengz, gyoengq- de hix dwg daj gwnz bya roengzdaeuj hane.”

“Meh! Gaej lau, gyoengqde gaenq byaij lo!”

“Mbouj rox ranz Cinz Dayenz dwg mbouj dwg caen deng——”

“Seizneix gou ndaej okbae yawj- yawj luba?”

“Caj daengz ranzrongh le caiq okbae hix mbouj nguh ha, simgip maz?”

Lungz Byauh euq mbouj gvaq daxmeh de, cijndei caj daengz ranzrongh, sawqmwh, miz saek sing daejnganga daj ranz Cinz Dayenz cienz okdaeuj lo.

“Cuet lo, caen dwg ranz Cinz Dayenz deng ciengjgiep dahraix lo.” Daxmeh de swenj hwnjdaeuj.

“Seizneix caiq mbouj bae yawj, saedcaih gangj mbouj ndaej bae lo.” Lungz Byauh fid fwngz daxmeh, mboujguenj daxmeh eiq mbouj eiq, cigsoh buet coh ranz Cinz Dayenz.

“Ah Gwnh ha…… Ah Gwnh ha……”

Sing daej coegrwz daj gyang- hongh ranz Cinz Dayenz cienz okdaeuj, vunzmbanj gaenq miz haujlai vunz humx youq bakdou hung ranz Cinz Dayenz, luenhcaengcaeng gangj:

“Vaiqdi bae ndaw singz bauqanq ha!”

“Gaenq bae lo!”

“Daegseiq ranz Cinz Dayenz deng gaemh bae lo——”

Lungz Byauh cingq yaek caenx haeuj ndaw dou, dingqnyi coenz vah doeksat neix, fwt cienq ndang, lumhlumh cungqdinj gwnz hwet, riengjret buet coh roennou hwnj bya.

(caengz sat)