Sai:

Bouxcuengh soqlaiz eiq eufwen,

Eu ndaej vunz naiq aen sim vuen,

Eu ndaej aen mbwn caenh gamj-

doengh,

Duzgaeq dungx iek hix mbouj dwen.

Mbwk:

Gyoengqvunz dingq fwen dingq ndaej

ngaez,

Gij fwen eu ndaej raez youh raez,

Hothot caeu miz gyoengq dauhleix,

Fwen raeuz caezcien youh ndeidingq.

Sai:

Haetnaengz caeux hwnqdaeuj,

Haeuj ranzsaeuj,

Ganj cang haeux cawj ngaiz,

Eu fwen goek daengz byai,

Ndeidingq lai,

Maex gwn ngaiz doq haenh.

Mbwk:

Bouxcuengh miz fwen lai,

Bak baez hai,

Fwen baenz baiz okdaeuj,

Eu ndaej vunz sim raeuj,

Mbouj gangj yaeuh,

Baenzlawz gaeuq daeuj geiq.

Sai:

Bouxcuengh fwen baenz bo,

Cang roengz loz,

Aeu ci doz mbouj liux,

Eu le ciuh youh ciuh,

Caen miz diuh,

Gij vunz yiuj(rox) angqyangz.

Mbwk:

Binaengz ngoenz hawfwen,

Mbouj itbuen,

Aen sim vuen fouzbeij,

Eufwen biuj cingzeiq,

Mbouj yungh ngeix,

Linx ndeu ndaej fwen lai.

Sai:

Haeuj ranz moq eufwen,

Mbouj itbuen,

Daihgya vuen dahraix,

Hoh aen gya mbouj baih,

Mbouj miz caih,

Daih beij daih vuenyungz.

Mbwk:

Soengqsang hix eu fwen,

Saed mbouj muenz,

Bouxcuengh conz roengzdaeuj,

Gij vunz rox ndaej daeuq,

Vunz mbouj naeuq,

Daihdaih daeuj ciepcienz.

Sai:

Aeubawx、baehaq,

Mbouj miz vahgyaj saek coenz,

Gyoengqvunz dang ngoenz,

Sing fwen coenzcoenz ndeidingq.

Mbwk:

Vangzloz gaeb doh,

Eu fwen gangjgoj ndei lai,

Bouxlaux bienq gvai,

Haeuxngaiz daengz daiz lij noengh.

Sai:

Dawz ginz laeb hwnj,

Baengzyoux doxlwnh demgya,

Ginz lumj aen gya,

Dawz fwen haeujma caez hag.

Mbwk:

Doengzcaez angqak,

Lauxsae son hag cihsiz,

Ra yinh ra ciz,

Cungj mbouj ndaej liz cawjeiq.

Sai:

Gag vunz gag geiq,

Eu ndaej yungzheih dangqmaz,

Baengh raeuz daihgya,

Dawz gij vwnzva swnjciep.

Mbwk:

Aeu fwen daeuj cienz cingz,

Biuj caen cingz saed eiq,

Yien cikfwngz baenzseiq,

Daihgya eiq dangqmaz.

Sai:

Guhdoih riuhaha,

Lumj duzbya caeuq raemx,

Mboujguenj baenzlawz haemh,

Cungj caezcaemh eu fwen.

Mbwk:

Bouxcuengh eiq eu fwen,

Aen sim vuen fouzbeij,

Mbouj miz vunz mbouj eiq,

Bae nazreih hix eu.

Gap:

Bouxcuengh eiq eufwen,

Gij sing rwenz ndeidingq,

Ndangnaiq lumj vunzbingh,

Eu gvaq dingh najhai,

Eu lai vunz bienq gvai,

Eu ndaej ndei dahraix,

Vunz Bouxcuengh raeuz maij,

Daih dem daih riuzcienz.