Mboengqneix, vih angqhoh Cunghvaz Yinz- minz Gunghozgoz laebbaenz 72 hopbi, Majsanh Yen Gujcai Yauzcuz Yangh Gujdangz Cunh aen doih guhhong youq mbanj gag okcienz cawx 500 mbaw vujsingh hungzgiz soengq hawj Gujdangz Cunhveijvei. Ginzcung Mbanjyauz rox le, couh gag hwnj bya bae raemj faexcuk ranz bonjfaenh ma guh ganjgeiz, faenbied aeu vujsingh hungzgiz baek daengz dingjbya Byaginzbangj dieg ceiq sang Gujdangz Cunh、bakcanz dingjlaeuz caeuq song henz loh bae. Doengzseiz, lij venj henz gai bouq gaicawx dem, yinx ndaej haujlai bouxhek daeuj youz yawjngonz ingjsiengq.

Mboengq ngoenzgyaj guekging, Gujdangz Cunh cujciz dangjyenz ganbu ginzcung Mbanjyauz youq dingjbya Byaginzbangj dieg ceiq sang Gujdangz Cunh, haiguh le “dingq dangj gangj、 gyo’mbaiq aen dangj、 riengz dangj byaij” cawjdaez hagsib gyauyuz, banh swng geizguek、hwnj dangjgo、son’gyauq fuengz doekraemx caeuq gyaudoeng ancienz daengj baenzroix hozdung. Hozdung sat le, caezgya coh geizguek gingqlaex、caeuq geizguek hab’ingj, habciengq 《Gou Caeuq Guekcoj Duh Gou》《Danqhaenh Guekcoj》 daengj go gyaezguek, caezcaemh gangjok ganbu ginzcung Mbanjyauz ndiepgyaez caeuq hohfuk Cungguek Gungcanjdangj、guekgya hungmbwk, caemhcaiq maqmuengh ndaej gvaq ndwenngoenz gyaeundei!

“Neix dwg mbanj Gujdangz Cunh baez daih’it youq dingjbya Byaginzbangj swng geiz- guek, hix dwg cungj fuengsik gyoengqdou daiq ginzcung Mbanjyauz hag lizsij dangj ndeu. Gujdangz Cunh yienznaeuz vutgungz le, hoeng goekdaej lij mbang, doenggvaq hag lizsij dangj daengj baenzroix hozdung hawj ginzcung Mbanj- yauz lumj ngveihsigloux nei got ndaet caemh- youq, cukmaenh gij eiqsik caezcaemh Cunghvaz Minzcuz, gyalai gij saenqsim caeuq yiedcingz ginzcung Mbanjyauz guh saeh cauhnieb.” Gujdangz Cunh dangjcungjcihbu suhgi Banh Yaujmeiz naeuz, coglaeng lij lai aeu gyaez dangj gyaez guek gyauyuz yungzhaeuj ndwenngoenz ginzcung Mbanjyauz bae.

(Majsanh Yen Yungzmeizdij Cunghsinh)