Ngoenzgyaj guekging daengx gih gak dieg cungfaen guhndei hong yawhfuengz binghraq, cujciz banh hozdung lai cungj lai yiengh, dazyinx ginzcung ok rog baeyouz. Ciuq gyoepsuenq, 7 ngoenz guekging, daengx gih ciepdaih bouxhek 3611.4 fanh vunzbaez, doengzbeij demlai 26.8%; saedyienh lijyouz sawjcienz 272.41 ik maenz, doengzbeij demlai 38.4%.

Saekhoengz lijyouz dwg gizhoengh ngoenzgyaj guekging, daengx gih gak dieg saekhoengz lijyouz vunz lai vunz daih. Gveilinz Si Cenzcouh Yen dieg geiqniemh ciengz ciengq Sienghgyangh hungzginh cangzcwngh banh aen yizsiz hainduj baeyouz yenzgiu hagsib; Gveilinz Nanzhihsanh Gunghyenz daphwnq diemjdwkgaj danqhaenh guekcoj, soengq mbaw geizguek iq caemhcaiq gunghawj buhvaq hungzginh hawj bouxhek ingjsiengq; Nanzningz Si dieggingj Gunhlunzgvanh langhbaij doz 《Angqhoh Cungguek Gungcanjdangj Laebbaenz 100 Hopbi Nem “Bak Bi Yinghlez” Daengx Gih Cunzdauq Langhbaij》 daengj hozdung……

Daengx gih gak gaep gunghgung duzsuhgvanj、 vwnzva’gvanj gaenxmaenx haiguh hozdung, gungh fugsaeh bouxhek 140.57 fanh vunzbaez. Liujcouh Si Ginzcung Yisuzgvanj banh hozdung baenzroix hawj bohranz caeuq lwgnyez baeyouz, Bwzhaij Si Vwnzyi Gyauhliuz Cunghsinh daengj danhvei guh hozdung langhbaij vwnzyi cozbinj daizheiq maenhndei Gvangjsih “ciengxlwenx riengz dangj byaij” angqhoh Cungguek Gungcanjdangj laebbaenz 100 hopbi daengj, ndaejdaengz bouxhek haengjgyaez.

(Vuz Libingz)