Hozciz Si Nanzdanh Yen Lijhuz Yauzcuz Yangh Mbanjyauz Cienhoh, dingzlai dwg Bwzguyauz youq, haemq ndei baujlouz le gij vwnzva gyoengqde. Aen mbanj neix cungfaen leihyungh gij yenzsu vwnzva minzcuz, yungzhab gij swhyenz funghgingj gyaeundei, daihlig hwngfat lijyouz, youq bi 2019 ndaej bingz baenz “Aen Mbanj Miz Gij Daegsaek Siujsoq Minzcuz Cungguek”. Seizneix, gyoengqvunz ndawmbanj youq onj maengx hong, baengh song fwngz bonjfaenh gaenx guh gvaq hwnj saedceij vannyumnyum.

Hwnq Mbanj Miz Daegsaek

Bi 2017, Nanzdanh Yen hai- doengh aen hanghmoeg senjdieg “Cien Ranz Mbanjyauz Fanh Hoh Yanghyauz” bae haifat lijyouz, ngamq aeu roek ndwen couh guhbaenz sam aen gih haj bak lingz gouj aen laeuz song cien seiq bak betcib ngeih dauq ranz. Ndawde, Dojnuj Segih Mbanj- vangzsang dwg aen diemjanhci haemq hung ndeu, gvangq saek cien ngeih bak moux, cungjdouzswh samcib caet ik maenz, hwnq miz sam bak samcib ngeih aen laeuzranghbaiz, gungh miz cien song bak ngeihcib hoh roek cien seiq bak betcib gouj vunz ndaej senj haeuj ranz moq youq, seiqhenz miz gvangjcangz、youwzyenz、hawciengz caeuq aen cunghsinh fuzvu gihminz daengj sezsih gunghgung.

Byaijhaeuj Dojnuj Segih, cij raen roen iq vangraeh doxgap, gij ranzlaeuz moq henz roen rangh doek rangh baiz baenz baiz, baihlaeng ranzlaeuz dwg goengqgoengq bya sang, seiqhenz miz faexheu, saekseiz miz duzroeg ciuz. Gaengawq gij sibgvenq swnghcanj swnghhoz gyoengqde, cungqgyang mbanj lij laeb miz aen lajroq vwnzva miz daegsaek minzcuz ndeu, ranz naj ranz laeng hwnq miz doengh aen diengz lumj canghaeux Yauzcuz, hawj gyoengq beixnuengx Bwzguyauz ndaej roxnyinh sugseg, youq ndaej gvenq.

“Ndei gvaq ranz gaeuq lai raeuh, daj gizneix hai ci bae yienhsingz cij aeu seiqcib lai faencung, doeng raemx doeng dienh, henzgyawj couh miz hagdangz, fuengbienh bae coux soengq lwgnyez.” Dwen daengz gij saedceij buen ranz, Hoz Cwngginh ndaej hajcib bi de gwnz naj riunyumj rimhoz gangj. Caeuq de gangjgoj ndaej rox, ranz de dwg ranzdihbauj, daegdaeuz ndaej ngeihngeih bi, caeuq lwgbawx youq Gvangjdungh dajgoeng, dahlan ndaej seiq bi, riengz Hoz Cwngginh song gvanbaz youq ndawranz, dahlwg iq ndaej cibngeih bi, cingq doeg siujyoz, ranz de faen ndaej aen laeuz miz song caengz caemhcaiq gvangq betcib bet bingzfuengmij, baenzneix song gvan- baz couh youq caengz daih’it hai le aen bouq iq ndeu, saedceij yied gvaq yied ndei lo.

Guh Cehgenh Banggungz

Gij vwndiz diegyouq gaijgez le, gyoengq vunzlai Bwzguyauz gungzhoj haenx buensenj doeklaeng youh guh maz gwn ne? Dangdieg haujlai bouxcoz cungj okrog bae dajgoeng, miz mbangj cix hai mozdozceh dauqma ranzmbanj gaeuq laebdaeb dajndaem reihnaz, hoeng doengh boux mehmbwk geq caemhcaiq mbouj rox saw haenx aeu baenzlawz bae ra gwn? Vihneix, Nanzdanh Yen siengj daengz aen cawjeiq “caux lwed” banggungz.

Liz Fungcinh dwg vunz Nanz- danh Yen Bazhih Yauzcuz Yangh, de bet bi couh riengz daxbuz caeuq daxmeh hag gij dinfwngz guh ndang- daenj Bwzguyauz, gig lauxhangz siuqva、dajnyumx daengj dinfwngz, dwg bouxciepcienz aen hanghmoeg guekgya gaep feihvuzciz vwnzva yizcanj ndangdaenj Yauzcuz.

De hai aen diemq dajnyumx ndeu, goq gyoengqvunz senjdieg Baz- hih Yauzcuz Yangh caeuq hajcib seiq boux mehmbwk Yauzcuz seiqhenz gyawj daeuj guhhong, dwg aen “ceh- genh banggungz” daih’it Nanzdanh Yen.

Bi 2019 ndwen 10, Nanzdanh Yen cwngfuj hawj Liz Fungcinh aen bouq mbouj aeu ngaenz ndeu, “Dojnuj Segih Ranzsoujgoeng” couh youq Dojnuj Segih Lijhuz Yauzcuz Yangh hai dou. Aen ranzsoujgoeng neix youq ndaw segih ciu gij mehmbwk cibroek daengz hajcib bi haenx bae guhhong. Gyoengq mehmbwk Bwz- guyauz daj seiz iq couh aeu hag siuqva, ndigah gyoengqde cungj miz gij dinfwngz ndei siuqva. Aen ranzsoujgoeng neix baez laebbaenz couh bang le hajcib haj boux mehmbwk gungzhoj segih ra gwn, bienqbaenz aen “cehgenh bang- gungz” daihngeih Nanzdanh Yen.

Liz Ciuhyiz dwg dahlwg Liz Fungcinh, de daj seiz iq couh raen daxmeh muengz siuqva, doiq gij dinfwngz neix hix miz gamjcingz daegbied, gauhcungh bizyez le de couh maranz bang daxmeh dajnyumx gai huq. De mboujdanh youq ndaw bouq gai huq, lij youq gwnzmuengx cigboq gai huq, gai gij huq gyaeundei caemhcaiq miz daegsaek Yauzcuz daengz daengx guek gak dieg bae. Baenzneix, gij seng’eiq ranzsoujgoeng engq hwng lo, bang bak boux mehmbwk ranzgungzhoj ndaw segih ra gwn gvaq ndwenngoenz, hawj gyoengqde miz hong guh、ndaej demsou, caemhcaiq supyinx le mbangj boux mehmbwk coz youq ranzmbanj guhhong.

Laeb Vihhong Goeng’ik

Gaenh banringz, aen dem aen mozdozceh daj goengq bya gyae hai doxdaeuj, yaep ndeu couh hai haeuj segih bae. Neix dwg gyoengqvunz bae ranzmbanj gaeuq dajndaem dauqma. Hoz Cwngginh baeznaengz caemh aeu dauqma guh hong reihnaz. Hoeng, ngoenzneix de cix mbouj bae. Baez cam cij rox, yienzlaiz de dwg boux duicangj Dojnuj Segih vihhong goeng’ik, boux duiyenz guh hong baet ranz baenz bingh lo, de aeu bae bang baet ranz. “Guh duicangj, gou aeu gamduk duiyenz guh ndei, lij aeu youq duiyenz miz hojnanz seiz gvansim caeuq bangcoh gyoengqde.” Hoz Cwngginh gangj.

Vihliux guenjleix segih, caemh- caiq hawj mbangj lwgminz gungzhoj miz hong guh, Dojnuj Segih seizneix laeb miz ngeihcib caet aen vihhong goeng’ik, moix boux moix ndwen ndaej gunghswh cien haj bak maenz ngaenz, gij vihhong baenzneix lij menhmenh demlai caeuq laebndei.

“Moix ngoenz banhaet caeuq lajbyonghngoenz aeu bae baez ndeu, moix baez aeu yungh song aen cung, ngoenz ndeu couh aeu yungh seiq aen cung, hoeng, cungj aeu miz vunz bae guh gij saeh neix ha!” Hoz Cwngzginh bi 1998 couh haeuj dangj, de roxsingj sang, nyienh lai guh lai dawzrap. Ndigah, de gag gawj bonjfaenh guh bouxduicangj gij vihhong goeng’ik segih. “Gou caeuq gyoengqvunz gangj, buen daengz ranz moq le, couh mbouj ndaej lumj youq ranzmbanj gaeuq baenzde seizbienh lo, aeu guenj ndei naj ranz laeng ranz bonjfaenh, aeu gangj veiswngh guh bouxvunz roxsoq roxlaex, gizneix yaek guh lijyouz, seiqhenz seuqcingh caezcingj, hek- youz cij maij daeuj youz daeuj caemz.” Miz Hoz Cwngginh dazyinx, gyoengqvunz hix gaenxmaenx guh hwnjdaeuj, vih segih seuqcingh gyaeundei okrengz.

Aen simnduj Nanzdanh Yen Cwngfuj couhdwg aeu louz ndaej roengz “gij cingz ranzmbanj” Bwz- guyauz, hwnqguh hanghmoeg bae dajcauh aen diegbaeyouz ndeu, bangcoengh giz dieg ndeu、aen minzcuz ndeu duetgungz baenzmiz, haifat lijyouz veh ok fuk veh gyaeu- ndei ndeu——aeu gij vwnzva minzsug Bwzguyauz hwngfat lijyouz, hawj gyoengq lwgminz senjdieg baezlaeng miz hong guh、lai demsou.