“Aij Sangswh, raemx dauj lae.” Dahmingzgyangh Sangswh Yen, daj baihdoeng buengq daeuj, youh bongh coh baihsae bae, itcig lae gvaq Ningzmingz、Cungzcoj, youh caeuq Dahyunghgyangh yungzhab, doeklaeng caiq gap haeuj Dahcuhgyangh bae.

Ranz gou youq ndaw singz henz Dahmingzgyangh, ngoenzngoenz gyanghaemh gou cungj haengj ing henz baengh yangzdaiz, yawj gij gingjsaek gyaeundei neix, gij ndang naet cungj riengz raemxdah lae bae gizgyae lo.

Daj henz dah cuengq da yawj bae, song daez henz dah cungj ndaem miz haujlai gofaex gova. Goreiz sangnengneng, mwncupcup lumj aen liengj hung, gij nyefaex golaeux unqnemnem, lumj dahsien riengz rumz diuqfoux, gocueng daengjsoengz dwk, lumj bouxbing soujsauq henz dah. Vanzlij miz haujlai faex gou heuh mbouj ok mingzcoh dem, cungj caeuq gij faex gij va henz dah doxhab doxingj.

Youq gij faex baihlaj, seiq geiq cungj hai miz baenz cumh baenz cumh va hoengzhoengz heuheu, gij va hom ciengzseiz riengz rumz baenz raq baenz raq ndonj haeuj ndaw rug ndawsim gou.

Baez daengz banhaemh, gyoengq lohdaeng gij yiengh lumj daengloengz couh rongh lo, hoengzswgswg, caeuq gij daeng hau luenzlulu lumj caw dajcang henz dah, angj dangqmaz.

Gyae di, couhdwg baenz doengh baenz doengh laeuz sangsang daemq- daemq. Gwnz dingj laeuz caeuq gij limq laeuz cungj venj miz baenz diuz baenz diuz saidaeng hajsaek, yubyab mbouj dingz.

Banhaemh, gyoengqvunz cungj haengj doxiu, baenz bang bae henz Dahmingzgyangh caeuq gwnz Giuz- ronghndwen youzbyaij、langxliengz.

Yawj daengz gingj gyaeundei neix, gou nyaenx mbouj ndaej lai cimyawj Giuzronghndwen lumj sai- hoengz hwnjdaeuj——Mbiengj Dah- mingzgyangh baihnamz ndaej fazcanj baenz vaiq baenz ndei, lai baengh aen giuz neix.

Dahmingzgyangh baihnamz rangh dieg haenx gaxgonq miz song aen mbanj caeuq doenghnaz gvangqlangh ndeu, caeuq ndaw singz baihbaek ngamq gek saek bak lai mij. Sam mbiengj cungj miz goengqbya humx gvaengz, baihbaek coh ndaw singz, hoeng, miz Dahmingzgyangh gek, youh mbouj miz giuz hung dap gvaq dah. Gyoengqvunz gvaq dah haeuj singz, cungj aeu vad bez roxnaeuz byaij giuzfaexdog.

Cibgeij bi gaxgonq, ndaw singz couh dajsuenq youq baihnamz Dah- mingzgyangh haifat baenz singz moq. Hoeng, mbouj miz giuz hung, baenz- lawz daehyinh baenzlai suijniz、ganghginh doenghgij huq dajcauh gvaqbae?

Vahsug gangj ndaej deng——“Siengj gvaq dah, aeu dap giuz; siengj ndaem faex, ganq gomiuz”. Baenzneix, saeh daih’it caux singz moq, couhdwg guh Giuzronghndwen gonq lo.

Aenvih Dahmingzgyangh miz haujlai diuz dahnga sanqsaksak, caemhcaiq dah song henz sang daemq mbouj doxdoengz, ndigah couh aeu vat gvangq Dahmingzgyangh, gyonj dah- nga hwnjdaeuj gonq, caiq youq henz dah hwnj daez. Geij bi gvaqbae, aen gunghcwngz hung neix cij menhmenh guh baenz, Giuzronghndwen gyaqciq he hix hamj gvaq dah hung neix iet coh baihnamz bae lo.

Giuz doeng loh couh doeng, mbouj geij nanz, diuzdiuz hawgai gvangqlangh, aenaen ranzlaeuz hung sang couh lumj fwn gvaq rangz did nei laebdaeb youq singz moq bongh hwnjdaeuj, hawj aen singz iq dem le haujlai senggei.

Gou ndwn youq gwnz laeuz, riengz diuz Dahmingzgyangh yawj bae, Giuzronghndwen baenzneix gyaeu- ndei——Lohgoek youq cungqgyang sohrwdrwd, song mbiengj lij lingh guh song aen giuz iq hawj gyoengqvunz youzbyaij dem, gwnzde bu youz gobek, daz saeknding, caeuq song baih gij roen byaij henz dah doxlienz itheij. Song aen giuz iq duenh cungqgyang nem giuz hung, seiq gyaeuj cungj faenbied iet coh seiq mbiengj gij roen byaij henz dah, gungjngaungau, gij yiengh lumj lohnga, youh lumj rongh- ndwen nei, youh hungmbwk youh saedyungh.

“Giuzronghndwen” heuh coh neix mboujdan dwg aenvih gij yiengh de lumj ronghndwen, vanzlij aenvih gaxgonq gizde hix miz aen giuz iq heuhguh “Giuzronghndwen”, laj giuz miz aen “dauj” iq he heuhguh “Daujronghndwen”, baenzneix couh daegdingq an coh lo.

Moix daengz seizneix, sim gou cungj foekfan mbouj dingz, siengj daengz gij yiengh “Daujronghndwen” caeuq “Giuzronghndwen” mwh gou lij iq seiz.

Seiziq, Dahmingzgyangh aenvih dahnga lai, yawj hwnjdaeuj mbouj hung geijlai, miz saek duenh gvangq di, raemx haemq dingh, miz saek duenh gaeb di, raemx couh bongh gaenj bae. Mbwn gvengq seiz, giz dah feuz di, raemxdah sawdikdik, youq laj nditndat saekgim ronghyubyub lae coh baihlaj, seiz fwn raemxdah youh rim hwnjdaeuj, lumj dahsau naj hoengz nei, hawj vunz simdoengh.

Diuz dah cungqgyang miz gaiq dieg mbot he, lumj aen dauj iq nei, ngutngeungeu lumj ronghndwen, gyoengqvunz couh heuh de “Dauj- ronghndwen”. Gwnz “dauj” caeuq henz dah cungj miz faexcaz baenz cumh, heuswdswd, caeuq raemxdah、doenghnaz baihnamz doxgap baenz fuk veh gyaeundei he. Gizhaenx lij miz haujlai saeh yinxdaeuz mwhnyez gou.

Mwhhaenx gyoengqvunz baih- baek ndaw singz vih fuengbienh roengz dah bae swiq byaek saeg buh, aeu geij gaiq rin hung dajdaej caemhcaiq youq baihgwnz dap geij gaiq benj iq guh baenz aen giuz iq. Doeklaeng, gyoengqvunz mbanj baihnamz raen aen “Daujrongh- ndwen” miz rin hung ndei dak bwnh, daeh raemx rwed byaek hix fueng- bienh, hix aeu benj dap baenz aen giuz iq gvaq “Daujronghndwen” daeuj. Couh yienghneix, song gyaeuj giuzfaexdog ngutngeungeu caeuq “Daujronghndwen” doxlienz hwnj- daeuj, gvaq ndaej dah lo, gyoengqvunz couh heuh de guh “Giuzronghndwen”.

“Giuzronghndwen” miz rin hung, miz benj iq doxcab doxlienz hwnj- daeuj, gyaegyae yawj bae, couh lumj diuz lienhhoz ciuhgonq nei, yienz- naeuz miz di cocat, hoeng hix miz gij daegsaek de, genjdanh youh boeksaed.

Hoeng, danghnaeuz bungz daengz seiz fwn, laebdaeb doek fwn hung, gij raemx dahnga Dah- mingzgyangh hwnj sang gig vaiq, mbouj geij nanz couh gyonj baenz dah hung. “Giuzronghndwen” daemqdet haenx couh ngaiz raemxdongj dumh liux bae. Gyoengqvunz baihnamz cij ndei vad bez iq gvaq dah, gig mbouj fuengbienh.

Aenvih duenh dah neix bingz- swnh, raemx lae mbouj gaenj, ndigah caj raemxdongj menhmenh siu bae le, “Giuzronghndwen” iqetet neix youh “raemx hawq raen bya” loh naj okdaeuj lo, gwnz giuz lai miz caengz bamhboem ndeu, couh lumj duz lungz mong ndeu boemh youq gwnz dah.

Gyoengqvunz cagaenj coih ndei, “Giuzronghndwen” youh goenqcaej daengj youq naj raemx, hawj gyoengq- vunz ndaej bae rap raemx、saeg buh、rwed byaek、bae gaicawx……

Gou caeuq gyoengq doengzdoih hix haengj doxiu bae “Giuzrongh- ndwen” guhcaemz. Baez cuengqhag, dou couh riuhaha riengz raemxdah cung roengz “Giuzronghndwen”, gvaq daengz “Daujronghndwen” bae. Miz- seiz goemz youq henz dah bae ra duzbya、duzgungq ndaw dah, mizseiz mbaet va nywj henz dah, mizseiz gaeb biengzbeih caeuq mbungqmbaj…… Guhcaemz baeg le, dou couh ninz youq gwnz bozywj, ngiengxyawj gij fwjhau caeuq yiuhrumz lai cungj lai yiengh gwnz mbwn, lij hawj gyoengqde baiz mingzdaeuz dem!

“Bat bat bat!” Laj laeuz miz geij sing ci hauhdoengz coeg haeuj rwz, gou cij fwt cingsingj gvaqdaeuj.

“Giuzronghndwen” dwg giuz hoengh singz iq neix, hix dwg giuz hoengh maqmuengh gou.