Gouj nyied seizcou, nazhaeux henjrwgrwg, gve mak homfwtfwt, bineix youh dwg bi ndaej sou lai ndeu. 9 nyied 23 hauh dwg Aen Ciet Fungsou Daihseiq Vunzguhnaz Cungguek. Gih raeuz Nanzningz、 Gveigangj、Gveilinz、Liujcouh、Hozciz、Bwzswz daengj dieg gak cuz beixnuengx foenfoen eu fwen diuqfoux angqcoux aen ciet hoengh vunzguhnaz, simhai gyo’mbaiq aendangj、hoh sou lai, caiq doxcaez yien fwngz byaijcoh roen baenzmiz.

Liggaeuq bet nyied cibloeg ngoenzde, Liujcouh Si Yungzsuij Myauzcuz Swciyen Dalang Cin Gauhbeiz Cunh Mbanjmyauz Cuhyangh guh Cibloeg Hoihbo bae coux ciet fungsou vunzguhnaz. Myauzcuz、Yauzcuz、Dungcuz daengj lai aen cuz beixnuengx doxcomz giz de, boq venz、diuq fouxcaijdinvenz, hawj ndwenngoenz vunzlai engq mizyinx, eu ok hot fwen minzcuz doxgiet huzndei. Vunzmbanj youh youq cietheiq guh lijyouz, yinx le haujlai hekyouz daeuj guhcaemz, daiqdoengh ginghci lajmbanj hwngfat mwnhoengh.

（Lungz Linzci / 龙林智）