Aen Miuhguenyaem lizsij gyae- nanz, gorungz geq aiq miz saek bak bi, ranzvunzmbanj guh hawj bouxhek youq de cingxyax gyaqciq, sokruz gaeuqgeq caemcingx……Laeng lajdin Byaraiz Ningzmingz Yen, Cwngzcungh Cin Yaudaz Cunh Mbanjlaigyangh hekyouz baebae dauqdauq, vunzmbanj hai nungzgyahloz, gag guh dangz- nding、gunghyibinj bae baijgai daengj, mbangj cix aeu ranzgaeuq gaij guh dieg hawj bouxhek youq, ndwenngoenz gvaq ndaej hoenghhwd raeuh.

Gyawj geij bi neix, Ningzmingz hwngfat aen canjnieb lajmbanj lijyouz, gaijndei caeuq daezsang hwnqguh gij sezsih giekdaej lajmbanj, hawj aen- mbanj seuqcingh, caiq daiqdoengh vunzmbanj duetgungz baenzmiz. Daengx yienh gungh laebbaenz 18 aen dieg yienghbanj aeu lajmbanj lijyouz bae banggungz, daiqdoengh 1200 hoh ranzgungzhoj. Mbanjlaigyangh couh- dwg ndawde aen daibyauj ndeu.

Lajmbanj Lijyouz

Coengh Hwngfat

Mbanjlaigyangh youq giz cung- sim diegbaeyouz vehbangxdat Byaraiz aen vwnzva yizcanj seiqgyaiq, dwg aen mbanj iq lij ce miz gij sibsug cienz- doengj yaemzrwg ndeu, Dahmingz- gyangh sawdikdik hopngomx daengx mbanj. Doenghbaez, aenvih haeujok mbouj bienh、canjnieb mbouj lai, vunzmbanj gvaq ndaej gig gungzhoj, daengx mbanj 70 lai hoh ndawde couh miz 49 hoh dwg ranzgungzhoj.

Bi 2016, Dahcojgyangh bauq ndaej feihyiz le, Ningzmingz couh dawz Mbanjlaigyangh liedguh aen gih yienghbanj guh lajmbanj lijyouz、giz dieg yienghbanj aeu lajmbanj lijyouz bae banggungz ndeu. Mbanjlaigyangh daj baez hainduj couh dinghndei dajcauh “aen mbanj cienzdoengj swnghdai” miz vwnzva minzsug、geq- gangj gij fuengfap ciuhgeq guh dangznding daengj lai yiengh yenzsu, hwngfat lajmbanj lijyouz bae doi- doengh daengx mbanj duetgungz. Mbanj de mboujduenh guh ndei aen gvanj lizsij ndaw mbanj、aen sokruz daengj; hwnqguh hozcozse, cingjhab haifat gij fuengfap ciuhgeq guh dangz miz bak lai bi lizsij de, haivat doengh gij doxgaiq miz daegsaek vwnzva lijyouz; gaijndei yienghceij mbanj de, hawj aen mbanj bienqndaej engq gyaeundei……

Bi 2017, aen gih lajmbanj lijyouz Laigyangh ndaej cauhbaenz aen gih seiq singgaep guh lajmbanj lijyouz, yinx hekyouz daeuj guhcaemz, aen ngaenzbau vunzmbanj menhmenh moj hwnjdaeuj. Couh yienghneix, Yaudaz Cunh laeng bi daihngeih couh ndaej duet aen mauhgungz lo. Bi 2019, Mbanjlaigyangh ndaej senj haeuj buek daihsam aen mbanj miz gij daegsaek siujsoq minzcuz Cungguek. Bi 2020, Yaudaz Cunh ndaej senj haeuj buek daihngeih aen mbanj youqgaenj guh lajmbanj lijyouz daengx guek.

Mbanj de lij hwnq le Beixnuengx Byaraiz、Gvangjyi、Gujlungz daengj 3 aen hozcozse, gonqlaeng haifat le 30 lai cungj huq, lumjbaenz dangznding、laeujoij、laeujvaizsanh、doengh gij gunghyibinj Byaraiz daengj, daiq- doengh 2000 lai boux vunz dieg de itheij demsou. Mbanjlaigyangh lij cujciz aen doih ndaek gyong Byaraiz、aen doih ndaek nyenz、aen doih eu fwen coux hek、 aen doih danz gimz daengj 4 aen doih biujyienj vwnzyi lajmbanj, youq diegbaeyouz hawj hekyouz biujyienj cezmuz daengj, vunzlai camgya biujyienh de bi ndeu caemh canh ndaej saek di ngaenz ma boujdiep ndawranz, gyoengqvunz youq bakranz couh gwn hwnj le gij “haeuxlijyouz”.

Seizneix byaij haeuj Mbanj- laigyangh bae, gizgiz cungj ndaej raen gij gingjsaek ndei de, seiqhenz ngozbya heuswdswd, hopheux aen mbanj. Baihnaj ranz baihlaeng ranz cungj miz faexheu hop dwk, aen mbwn gvengqyauyau, hoengheiq cix ndei, gij gingjsaek doenghnaz lajmbanj caen gyaeundei ha.

“Canjnieb Diemzvan”

Coi Demsou

Mbanjlaigyangh baengh “veh- bangxdat Byaraiz” aen binjbaiz mizmingz neix, mboujduenh hwngfat gij canjnieb binjbaiz miz daegsaek minzsug, gij dangznding aeu vunz guh cienzdoengj caeuq doengh gij huq vunzmbanj gag guh de cungj gai ndaej gig ndei. Vunzmbanj mboujdan ndaej gwn “haeuxlijyouz”, lij byaij hwnj le “diuz roen baenzmiz diemzvan”. Gij canjnieb lajmbanj lijyouz daiq- doengh le vunzgungzhoj dieg de duet- gungz baenzmiz coh siujgangh.

Mwh gooij ndaej nyaeg seiz, danghnaeuz mwngz byaij haeuj Mbanjlaigyangh bae, doq ndaej nyouq gij heiqhom dangzoij. Riengz gij heiqhom byaij bae, mwngz couh ndaej yawjraen vunzmbanj youq gwnz cauq gyanghongh gaq aen rek hung ndeu, ndawde cienq le baenz rek raemx, gij saek de lumj saek gyaujgwzliz, neix cingq dwg vunzmbanj aeu gij fapdoj ciuhgeq cienq dangznding.

Dangznding dwg aeu gooij ma guhbaenz. Vunzmbanj daj ndawreih nyaeg gij oij gag ndaem maranz, dawz gooij nyaeg guh baenz mbaenq baenz mbaenq le gauj gij raemxoij okdaeuj, caiq daih gij namh、gij nuenx ndaw raemxoij deuz. Doeklaeng cij dawz raemxoij raix haeuj ndaw rek hung bae, aeu feiz iq cienq baenz 5～6 diemjcung, baez cienq de aeu ndau- ndawq deih, hawj gij raemx ndaw raemxoij baez di baez di fwi deuz, couh yienghneix, raemxdangz menh- menh couh bienq niu lo, sat le couh ndaej cienqok dangzliu, raix okdaeuj, dangzliu caep le couh gag gietguh dangzco, neix couhdwg ciendangzsa lo. Youq ndawrek cienq ndaej yied nanz, gij saek ciendangzsa couh yied hoengzgeq. Cungj fapdoj ciuhgonq neix ndaej ce gij yingzyangj gooij roengzdaeuj, aeu neix bae guh dangznding, gij dangz caemhcaiq miz cungj feihdauh lumj dangzremj daeg- bied nei.

Gij fapdoj guh dangz dwg gij dinfwngz Mbanjlaigyangh daj ciuh- gonq cienz roengzdaeuj haenx, gij dangz ndei aenvih yienghceij mbouj aiq ndei、gai mbouj bae, ndigah gai mbouj ndaej gijmaz gyaq. Doeklaeng, Ningzmingz Yen yinx daeuj lauxbanj douzngaenz, laebbaenz le Bouxguhnaz Beixnuengx Byaraiz Ciennieb Hoz- cozse, youz hozcozse gyagoeng caeuq baucang dangznding, gijyiengh dangz- nding couh bienq ndei lo, gij dangjsw de caemh daezsang le haujlai, hekyouz cij haemq maij cawx.

“Gij dangznding dou gai ndaej ndei, yienznaeuz lij dwg aeu fapdoj guhbaenz, hoeng baucang gaijndei lo, mwh guh dangz cix engq cingsaeq, couh guh’ok gij dangz engq gyaqciq daeuj, cungj dangznding neix ndaej cuengq nanz, bouxhek caemh engq maij cawx.” Boux lijswcangj hoz- cozse Vangz Siujyinh naeuz, neix caeuq vunzmbanj baenz benq baenz benq gag guh bae gai mbouj doengz.

Seizneix, aen hozcozse mboujdan guh’ok lai cungj feihdauh dangznding lumj hingdoj、lwgraz duhnamh、hwzdauz lwgraz、vagut daengj, lij ciuq gij doz vehbangxdat guh’ok buek dangznding “Vuengz Byaraiz”, gig miz gij vwnzva daegsaek Byaraiz. Lingh- vaih, hozcozse caiq dajcauh aen binjbaiz dangznding, caemh youq gwnz muengx guh gaicawx, gij dangz- nding gyoengqde couh yienghneix gai daengz daengx guek gak dieg bae.

Gij dangznding mbanj de dwg “bauj”, daiq gij fugfauz cienq dangz cienq ok de, vunzmbanj cungj aeu bae ngauz laeujoij, cungj laeuj neix aeu fugfauz dangzoij ngauz baenz, feih- dauh gig ndei, gwn hwnjdaeuj cix diemz cix nyinh, gijheiq cix hom- fwtfwt, de caemh bienqbaenz cungj “dwzcanj rangdiemz” Mbanjlaigyangh.

Gij hong aeu fapdoj guh dangz “diemzvan” cienzdoengj neix ce miz gij gaiqrox caeuq lwedhanh vunz- mbanj, hawj vunzlai ndaej demsou baenzmiz. Mbanj de lij caengz duet- gungz seiz, hozcozse daiqdoengh le 100 lai hoh ranzgungzhoj guh dangz- nding、ngauz laeujoij, bi ndeu gai ndaej 11 fanh goenggaen dangz doxhwnj, ndaej ok 3 fanh goenggaen laeujoij, canh le aiq miz 230 fanh maenz, moix hoh ranzgungzhoj youq ndawde guhhong haenx bi ndeu cungj ndaej souhaeuj 3 fanh maenz doxbae.

Seizneix, Mbanjlaigyangh caiq mbouj dwg aen mbanj doenghbaez caemrwg lo. Byaij haeuj ndaw mbanj, rumzliengz ci daeuj, gofaex mwncup, gig miz gij feihdauh doenghbaez, mbouj miz gij nauhyied hawsingz, vunz ndaej caenhsim gvaq hwnj gij saedceij soengse de. Hekyouz youq gizneix mboujdan ndaej daejniemh gij minzsug biujyienj lumjbaenz dingq fwen Bouxcuengh、yawj ndaek aen- nyenz、ngonz ndaek gyong Byaraiz、gwn laeujdaizraez、dingq danz gimz daengj, lij ndaej daejniemh baenzlawz guh dangznding、ngauz laeujoij、daem ceiz daengj, gij minzsug minzfungh Byaraiz cinghseuq boeksaed, gijgwn Bouxcuengh feih raeuh, hawj vunz angq dwk mbouj sij maranz bae.

（Mbawdoz daj Sinhvazvangj aeu）