Daxmeh naeuz, gou doekseng seiz, gwndaenj caengz suenq gig ndei. Maj ndaej cibsam ndwen, cij rox byaij loh rox gangj vah, vunz maj ndaej daemqdetdet、iqetet, duz gaeqboux iet hoz cungj beij gou sang.

Lij iq seiz roxnyinh yienghyiengh dwglau. Gou lau doek raemx, lau feiz coemh, lau deng nyezdoih hangz, lij lau fangz dem.

Seizhaenx mbouj rox dingq bouxlawz naeuz, vunz dai bae le couh bienqbaenz duzfangz, mbwn laep couh okdaeuj youzlangh haih vunz. Gou dingq le, lau yaek dai bae, ndaw mbanj miz vunz dai roxnaeuz mbwn ngamq fuemx, gou couh gven dou youq ranz mbouj gamj okbae.

Ngoenzhaenx, caeuq gyoengq nyezdoih guhcaemz ndaej naemq, mbwn laepdingh cij gipmuengz buet coh ranz. Gou ngamq daengz bakdou ranz, ndawranz dienhdaeng rongh dwk, mbouj raen vunz. Roxnaeuz daxmeh gaenq umj daegnuengx haeuj mbonq ninz lo. Gou muenghmuengh seiqhenz, hix mbouj raen daxboh youq gyawz, roxnaeuz de faeg lwgmaenz bae gueng duz douqbwn lajriengh lo. Naemj daengz neix, gou yimzyimz byaij daengz ranzdajcawj, muengh roengz lajriengh bae. Lajriengh caeuq ranzdajcawj doxdoeng, lajde mbouj beng sienq cang dienhdaeng, doengx- ngoenz doengxhaemh laepfubfub. Bohmeh youq gizhaenx ciengx douq- bwn, daengx ranz baengh raed bwn douq gai aeu ngaenz cawx gyu youz.

Gou baez muengh neix, hwk ndaej mbei yaek dek bae, cij raen lajriengh miz aen ngaeuz he doengh bae doengh dauq, mbouj raen vunz youq gyawz. Gou mbouj gamj heuh, gipmuengz buet ok rog ranz bae, naengh youq najranz diuz mieng diemheiq baegfofo, sim naemj: Dwg mbouj dwg raen gij doxgaiq uq haenx lo? Daxboh dwg mbouj dwg gaenq deng gaemh bae? Gou mbouj gamj caiq naemj roengzbae, mbouj roxnyinh seizlawz couh youq ndaw mieng ninz ndaek bae lo.

Haemhhaenx, dwg daxboh daj ndaw mieng umj gou haeuj ranz bae ninz.

Haetlaeng gou dawz gijneix lwnh hawj daxboh nyi. Daxboh riu naeuz:“Lwghuk, haemhlwenz gou youq laj- riengh diemj daeng gueng duzdouq, mwngz dwg raen aen ngumhngaeuz gou luba, lajmbwn mbouj miz maz fangz law.”

Gij vah daxboh hawj gou sim onj haujlai. Hoeng gvaqlaeng gou youh bungz baez “fangz” ndeu. Haemh ndeu mbwn gaenq fuemx lo, gou lij boux ndeu naengh youq bak mbanj gwnz ndaek rin hung guhcaemz.

Sawqmwh, gou raen daxgoeng hwet gungj、 aen gyaeuj ndoqndatndat he byaij daeuj coh gou, gou hwk bak aj liux. Sim naemj: Dai lo, mbatneix caen raen fangz ok naj lo, boux neix mbouj dwg daxgoeng ndaw mbanj ngamq dai geij ngoenz haenx luma? De hix hwet gungj, hix daeq aen gyaeuj ndoqndatndat he.

Mbouj raen hix raen lo, gou simdingh roengzdaeuj, naemj yawj- yawj duzfangz maj ndaej baenzlawz yiengh? De yaek gvaq gyawz bae? De siengj guhmaz? “Duzfangz” yied byaij yied gyawj, aen da gou yied cengq yied hung, mbouj yaep saekdi.

“Dahniq, gou daj mbanj wnq daeuj, mbouj rox loh, aen ranz canghyw singq Lanz gvaq gyawz bae, gou bae aeu di yw fatsa.” Daxgoeng haenx cam naeuz.

Gou dingq dwg vunz gangj vah, muengz vix gvaq mbiengj he bae, daxgoeng haenx youh laebdaeb byaij bae lo.

Daxgoeng neix dwg vunz, mbouj dwg duzfangz law! Gou miz di saet- muengh, youh miz di angq. Saet- muengh dwg caengz raen duzfangz maj yienghlawz gvaq, hix caengz raen miz byawz gaeb ndaej duzfangz gvaq; angq dwg aen sim iqet gou ndaej rox, lajmbwn mbouj miz fangz, dwg vunz raeuz gag naemj okdaeuj yaeuh vunz yaeuh swhgeij.

Gou ciemhciemh majhung, cungj rox okrog bae dajgoeng laeuq ngaenz lo. Nanz ndaej maranz, daxboh mbouj youq lo, lau daxmeh mbwq lai, gou cungj siengj lai buenx de geij ngoenz.

Daxmeh ciengx miz duz vaizdaeg hung he, aeu ngoenzngoenz gyaep haeuj ndaw lueg bae langh gwn nywj, bae rouh raemx. Vaizdaeg hung gwn nywj imq le, gaenx bae ra vaizmeh guhcaemz, doengxhaemh hawj daxmeh bae ra gig dwgrengz.

Doenghbaez, daxmeh aeu diuz cag youh hung youh raez he, gyaeuj he lamh dawz boekvaiz, gyaeuj he cug youq lajgoek faexcoengz, hawj duzvaiz gwn benq diegnywj giz gaenh, caj vaiz gwn sat le, youh senj bae lingh giz lamh. Hong reih nyaengq seiz, daxmeh couh langhbuengq duz vaizdaeg hung, youzcaih duz de bae gyawz cungj ndaej. Doengxhaemh haeuj ranz, daxmeh goq mbouj ndaej ndoet saek gaemz souh haeuxyangz, couh haeuj ndaw lueg bae ra vaiz.

Mboengqhaenx sou haeuxyangz sat youh sou haeuxnaz, daxmeh nyaengq lai, youh langhbuengq duz vaizdaeg hung lo. Haemh ndeu guhhong haeuj ranz, gou couh caeuq daxmeh haeuj ndaw lueg bae ra duz vaizdaeg hung.

Dou byaij gvaq geij goengq ndoi, mbouj raen duzvaiz bouxwnq, hix mbouj raen ngaeuz duz vaizdaeg hung ranz dou. Mbwn fuemx lo, daxmeh naeuz:“Raeuz bae mbiengj lueg haenx aen mbanj he yawjyawj.”

Dou mehlwg ganj daengz mbanj haenx, raen duz vaizdaeg hung ranz dou youq bakdou rienghvaiz bouxwnq lienh bae lienh dauq, daxmeh yaengx diuz bien baez fad, duz vaizdaeg hung couh saetdeuz, riengz dou baema lo.

Mbwn laepdingh lo, seiqlengq laepcupcp、caemrikrik, cij ndaejnyi sing byaij song mehlwg dou caeuq duz vaizdaeg hung.

Caeklaiq daxmeh miz aen dienh- doengz he rongh loh, ciuq mbouj ndaej geij gyae, hoeng cungj beij lumhlaep byaij loh ndei. Rumzhaemh ci gvaq byai faexcoengz yiengjsasa, gizgyae cienz daeuj geij sing roeggyaeuj- meuz heuh, hawj vunz miz di gyaeuj- mboeng.

“Hwhw, hwhw……” Gou caeuq daxmeh byaij gaenh diuz giuz ndeu, sawqmwh dingqnyi miz sing gyangz- rwdrwd he daj laj giuz cienz hwnj- daeuj.

Gou naeuz:“Meh, raeuz haemh- neix aiq caen dwg bungz fangz lo.”

Daxmeh naeuz:“Gou byaij baenz- ciuh loh hwnz, caengz raen maz gvaq, baezneix lauheiq caen raen fangz lo.”

Geij baez raen “fangz” mbouj dwg fangz, gou hix miz mbei lo, gou naeuz:“Raeuz roengz laj giuz bae yawjyawj gonq.” Gou byaij baihnaj, daxmeh gaenlaeng.

Gou gaem dienhdoengz baez ciuq, doeksaet yat, dwg Goengbet ndaw mbanj guhdauh guhmo haenx! Goengbet gutgungq aen ndang baenz ndaek ndeu, bak aj dwk, buhvaq dumzswdswd, ndang saenzdedded.

“Goengbet, mwngz youq neix guh maz?” Gou cam naeuz.

“Hwhw, ngoenzneix gou daj ndaw lueg guhmo dauqma, mbwn laep lo, gou youh mbouj daiq dienhdoengz, byaij dwk byaij dwk, laj din baez raeuz, doek roengz laj giuz daeuj lo. Aen soujgih gou hix mbouj rox sinz gvaq gizlawz bae, ra mbouj raen, yaek dwk dienhvah hix mbouj ndaej.” Goengbet bak ajngabngab naeuz.

“Aiyo, aiyo, in lai lo, in lai lo.” Goengbet youh gyangzrwdrwd hwnj- daeuj lo.

“Goengbet, mwngz dwg mbouj dwg deng duzfangz moeb mwngz ha? Guh hangz neix mbouj dwg miz haujlai bingmax, cihgeij hix rox fap rox fouz luma? Mbouj hai okdaeuj loengh duz de?” Daxmeh cam naeuz.

“Gaej gangj lo, gwnzbiengz bae gyawz miz fangz, gou caengz raen duzfangz lawz gvaq. Danghnaeuz haemhneix mbouj baengh sou song mehlwg, gou dai haeu dai naeuh cungj mbouj miz vunz rox nw!” Goengbet sing gangj iq youh nyieg.

Gou fuz Goengbet ndwn hwnj- daeuj, cam de byaij ndaej mbouj? Goengbet sawq baez he, naeuz yaengyaeng byaij cik din lij doengh ndaej.

Haemhhaenx gou fuz dwk Goengbet, sam boux yaengyaeng byaij youq gwnz roen lueg, ndaw mbanj vunz cungj ninz caem cij dauqma daengz ranz.

Gvaqlaeng, Goengbet mbouj bae mbanj guhdauh guhmo lo, de caeuq gyoengq goengdauh lingh guh yiengh saeh wnq bae lo.