Ngoenzciet cienzdoengj gou gyaez miz haujlai, lumjbaenz ndwencieng、ciet ndwenngux co’ngux、ciet bouxlaux……Mboujgvaq gou ceiq gyaez lijdwg ciet ndwenbet cibngux, aenvih ciet ndwenbet cibngux gou ndaej gwn bingj- ronghndwen gak cungj gak yiengh.

Mwh ciet ndwenbet cibngux, ranz gou ciengzseiz cawx haujlai bingjronghndwen, miz sim gyaeqhak, miz sim duhnamh, lijmiz sim dousah……Ndawde gou ceiq gyaez sim lenz- yungz, gwn youh van youh unq, hom van dangqmaz, mwh ciet ndwenbet cibngux hix dwg mwh ndei yawj ronghndwen, ronghndwen ngoenz haenx lumjbaenz luenz lai gvaq gaxgonq, lumj aen gingq youh hung youh luenz nei. Rongh hausagsag ciuq youq gwnz dieg, couh lumj dwg gou daeujdaengz gwnz ronghndwen nei.

Miz bi ndeu ciet ndwenbet cibngux, daxmeh gou cawx bingjronghndwen daegbied lai. Gou ceiq gyaez gwn bingjronghndwen, baez baij daengz gwnz daiz gou couh hainduj leh, doeklaeng gou ra raen aen bingj sim lenzyungz, mboujgvaq ndawde lijmiz gij gyaeqhak gou mbouj gyaez, yienghneix gou cungj hawj daxmeh. Aenvih gou gyaez bingjronghndwen neix lai, gou fwngz gaem aen, gaemz hung oet haeuj bak bae, aen neix lij caengz gwn liux, couh bae gwn aen haenx, ndaw bak oet rim liux, bak bongz lumj aen giuz nei. Gou laebdaeb gwn liux 5 aen, aendungx gou in raixcaix, gvaqlaeng gou caiq mbouj gamj luenh gwn bingj- ronghndwen lo.

Ciet ndwenbet cibngux dwg ngoenzciet doxcomz, gou gyaez ciet ndwenbet cibngux, caen maqmuengh daihgya youq ngoenz neix cungj ndaej caeuq vunz ndaw ranz doxcomz gvaq ciet ha!(Dwng Swjhanz)