Aen mbei ndaek vunz neix lij mbouj beij mehmbwk hung, gingq- yienz ndaej coux Siu Cuh guh yah, caen dwg duj va moq deng cab youq dong haex vaiz ndeu, aen goenh ngaenz deng vut haeuj ndaw gumz- boengz haeu, nyoegnyamx va moq caeuq goenh ngaenz lo……

Daihcibseiq Aulungzgveiz Gangjgoj (Daihcaet)

“Bung! Bung——”

Couh youq Lungz Byauh moengzloengz yaek ndiu seiz, sawq- mwh deng sing goksadsad linj gvaq- daeuj, de doq daj gwnz congz diuq hwnjdaeuj, song ga ngamq dwk gwnz- namh, fwt ndaejnyi rog dou youh yiengj song sing.

“Meh!” De simvueng hemq dax- meh, daxmeh ninz youq henz rug.

“Sing maz?” Daxmeh de gaenq lumhlaep daeuj daengz ndaw rug de lo.

“Dwg sing dwkcungq!”

“Cungq?” Daxmeh de deng haep ndaej gij heuj doxdoj yiengjgekgek.

“Geizheih! Seizneix dwg seiz- lawz?”

“Yaek daengz byonghhwnz luba?”

“Baenzneix gyawj, lumj couh youq henz——”

“Dwg mbouj dwg ranz Cinz Dayenz?”

“W, lumj dwg baihhaenx.”

“Seizneix dajsou mbouj ndei, mboengqgonq couh dingqnyi naeuz miz——”

“Caeggeq?”

“W.” Daxmeh de iet fwngz saenzdwddwd bae rag de, “Lungz Byauh, buenx gou bae yawj binqdou cap ndei caengz.” (caengz sat)