Gou dwg diuz dah ndaw mbanj mbouj okmingz ndeu. Miz haujlai gofaex hung sang geuj youq henz ndang gou, gizhaenx hoengheiq singj- sien, gou moix ngoenz cungj siengj sing sang ciengq go, daeuj yienh’ok gij angqyangz ndawsim gou.

Gou ciengx miz haujlai bya lwg gungq iq, gyoengqde cungj dwg lwg gou, moix ngoenz gyoengqde cungj angqvauvau geuj youq ndaw ndang gou guhcaemz. Gou vuenyungz buet diuq, caemhcaiq dawz gij vuenyungz gou guenq haeuj nazreih, hawj gyoengq gomiuz caez ndaej roxnyinh gij vuenyungz gou, gyoengqde maj ndaej gig hungcoek, caeuq gou caez vuenyungz. Henz ndang gou lij maj miz haujlai gova go’nywj mbouj okmingz. Duj va iq gak saek gak yiengh cang dawz mbawheu mwncup, ndeiyawj raixcaix. Gyoengq va iq sanq ok gij heiq hom, gou moix ngoenz cungj nyouq ndaej daengz. Gwnz naj gou fouz miz gij va gak saek caeuq mbaw heu, raq rumz iq he ci gvaqdaeuj, gou roenx hwnj langh fubfab, couh lumj fuk veh gyaeundei ndeu.

Moix ngoenz gyanghaet, gyoengq mehmbwk mbouj aeu doxiu couh daeuj daengz gou gizneix saeg buhvaq. Gyoengqde doq saeg doq gangjgoj, lij saek seiz cienz daeuj sing riu, gij sing riu angqvauvau gyoengqde cienz bae dieg gyae’gyanggyang. Gou hix deng sing riu angqvauvau gyoengqde maezyinx lo, dinghdungh dinghdungh ciengq go angqyangz lae bae gizgyae. Lij miz gyoengq duzbit youz bae youz dauq, cungj mbouj lau vunz saekdi, mizseiz angq doxgyaep, mizseiz ndaem roengz raemx bae dajcaemx, ndonj hwnj raemx seiz youh bek fwed hemq- bagbag, mizseiz diuq hwnj gwnz rin bae yietnaiq, mizseiz youh youz bae henz din gou ra bya iq、ra duzsae gwn…… Gyoengqde hawj gou rox- nyinh gij ndwenngoenz nauhyied caemhcaiq miz yinxdaeuz.

Seizcin, fwnmoenq daj gwnz mbwn yaengyaeng doek roengzdaeuj, sojmiz doenghyiengh ndiu gvaqdaeuj lo, daengx aen mbanj daj ndaw fangzhwnz ndiu lo. Gou youh hainduj rwed reihnaz moq lo. Gomiuz maj ndaej ngoenz beij ngoenz maengh- mwdmwd, ngoenz beij ngoenz heu- swdswd, daengx aen doenghnaz lumj aen haij saekloeg. Gou yawjraen gijneix, ndawsim angqyangz lumj ndaej gwn diengzrwi nei.

Seizhah, gou daengx ndang liengzswdswd. Baez daengz banhaemh, gyoengq bouxlaux couh daiq lwgnyez daeuj youzraemx, lwgnyez gaenq rox youzraemx haenx couh youq ndaw raemx doxgonh, mwngz aeu raemx baeuh gou, gou aeu raemx baeuh mwngz, sing riu sing heuh cungj mbouj daengx gvaq! Gyoengqde guh- caemz mbwq le, couh doxbeij ndaem- raemx, mwngz yawj gyoengqde daj ndaw raemx ndonj okdaeuj seiz, cungj haenqrengz cuengqheiq, ciep- dwk yungh song fwngz uet deuz raemxndik henz lwgda, caiq yungh song fwngz uet deuz gij raemx gwnz naj, doeklaeng ngauzngauz gyaeuj, ngauz deuz gij raemx gwnz gyaeuj, dwggyaez lailai! Boux lwgnyez caengz rox youzraemx haenx henz ndang miz bouxlaux fwngz rex son baenzlawz youzraemx, bouxlaux son ndaej haeuj- sim, lwgnyez hix hag ndaej haeujsim, seiz mbouj seiz cienz ok sing riuhaha. Mbwn fuemx lo, gyoengqvunz maranz lo. Seizneix, cijmiz duz daekgaeuj duzbid youq henz ndang gou eu fwen hawj gou dingq, buenx gou haeuj- ninz.

Seizcou daengz lo, goraeu henz ndang gou mbawheu bienq nding caez lo, daj gizgyae yawj, mbawraeu hoengzfwdfwd lumj faj feiz nei. Raq rumz ci daeuj, mbawraeu hoengzfwd daj gwnz goraeu doek haeuj gwnz ndang gou daeuj, geij duz moed iq naengh youq gwnz mbawraeu, lumj dawz mbawraeu dang guh ruz iq naengh bae damqyiemj. Daj baihdoeng muengh bae, gohaeux ndaw naz henjgywggywg, riu ndaej hwet cungj gungj roengzdaeuj lo. Yawj bae giz- gyae, daengx aen doenghnaz lumj aen haij saekgim. Gyoengq bouxguhnaz ndaej demsou lo. Moix bi daengz seizneix, gou ceiq sim’angq lo, aenvih gou moix ngoenz roengzrengz hawj doenghnaz rwed raemx, daengz seizneix cij ndaej raen gij hoizbauq.

Seizdoeng daeuj lo, mbwn nit lo, gou gizneix mbouj caiq nauhyied lo, cijmiz duzsae、duzbya iq daeuj youq gou gizneix youzraemx buenx gou.

Hoeng geij bi gonq, gij raemx seuqset gou bienq ndaej youh uq youh haeu lo. Aenvih ndaw mbanj boux- daeuz ra boux guh seng’eiq daeuj ndaw mbanj hai gunghcangj, lauxbanj dawz gij raemx uq cuengq haeuj ndaw ndang gou, gou bienq ndaej ndanghaw ndangnaiq. Banhaet gyoengq meh- mbwk ndaw mbanj mbouj caiq daeuj gou gizneix saeg buhvaq lo, seizhah gyoengq lwgnyez hix mbouj caiq daeuj gou gizneix youzraemx lo, gij angq- yangz baeznaengz gou mbouj miz lo, gou yousim ndaej daep dek saej goenq. Doeklaeng gyoengq vunz ndaw mbanj youh ndek nyapnyaj haeuj ndaw ndang gou, ciu daeuj haujlai nengznyaen, gyoengq nengznyaen douh youq gwnz nyapnyaj, gwn ndaej bizbwdbwd, gwn gaeuq lo youh dauqcawq luenh mbin. Gyoengqvunz byaij gvaq henz ndang gou nyouq ndaej gij heiq haeufoedfoed cungj goemq ndaeng hwnjdaeuj, caengz byaij ndaej geij yamq couh nyaenx mbouj ndaej rueg okdaeuj, rueg ndaej linx yaek doek bae. Gou yawjraen gij- neix, gig nanzsouh ha! Gou bienq ndaej gyoengqvunz cungj mbouj gyaez mbouj maij lo!

Daj bi’gvaq daeuj, gou youh bienq ndaej angqyangz hwnjdaeuj lo, aenvih ndang gou bienq seuq lo. Daengx mbanj vunz dingq dangj lingj- dauj haucau, hwng guh gij hozdung hawj lajmbanj cinghseuq, bouxgeq bouxcoz cungj gangj veiswngh lo, mbouj caiq luenh vut luenh ndek nyapnyaj hawj ndaw ndang gou lo. Ndaw mbanj guh dieg cang nyapnyaj, sojmiz nyapnyaj cungj cuengq youq gizhaenx, lij goq vunz daeuj dajleix nyapnyaj. Gyoengq mehmbwk ndaw mbanj youh daeuj gou gizneix saeg buhvaq lo. Seizhah, gyoengq lwgnyez youh daeuj gou gizneix youzraemx lo. Gou moix ngoenz youh bienq ndaej cinghseuq caemhcaiq gyaeundei lo, geijlai vuenyungz ha!

Gou caen maqmuengh gyoengq- vunz itcig goqhoh gou, hawj gou moix ngoenz cungj ndaej angqyangz lae bae gizgyae, itcig lae……