“Mwngz seizlawz dauq dieg raeuz ne?”

“Gou dauq ndaej sam bi lo.”

“Vihmaz mbouj lwnh gou rox ni?”

“Mbouj ndei eiqsei gaujyauj lingjdauj!”

“Ced meh mwngz! Gangj yiengh- neix.”

Daegfuk riuhehe, yaengx fwngz vix coh gwnz ciengz seiqlengq, naeuz:“Yawjyawj gij saw veh gou, mwngz gyaez fuk lawz?”

Aen diemq neix gvangq aiq miz roek mij, raez cibhaj mij. Sam fuk ciengz venj rim saw veh cangbiuj ndei. Hunghung iqiq, miz ngeihcib caet fuk, fukfuk ndeiyawj, fukfuk daihheiq. Cihsaw byaijbit rengz doh, cih hab ndongj couh ndongj, cih hab unq couh unq, ndongj lumj gang, unq lumj raemx, yawj ndaej ok bouxraiz goengdaej laeg. Daegcaiz baenz fuk baenz fuk bae cimyawj, yawj ndaej maezmwdmwd.

Daegcaiz hix haeujsim gij gyaq- cienz gwnz saw veh, ceiq noix seiq bak betcib maenz, ceiq lai fanh song cien bet bak maenz. Gak fuk gag miz daegsaek, Daegcaiz caen naeuz mbouj ok fuk lawz ndei, fuk lawz yaez. Mboujgvaq miz fuk ndeu supyinx Daegcaiz daegbied haeujsim.

Fuk saw veh neix gvangq mij he, sang miz mij haj, ndawde cij miz cihsaw ndeu ndwi, dwg cih “foux”. Cih neix gig daegbied, yienghsiengq lumj dahsien diuqfoux nei. Seizneix Daegcaiz lumj raen dahlwg cingq diuqfoux hawj de ngonz nei. Dahlwg Daegcaiz gyaez diuqfoux, caemh diuq ndaej ndei raixcaix. De bineix doeg daihhag it nienzgaep, dwg boux hagseng hag yisuz.

Daegcaiz bongx mbaq Daegfuk naeuz:“Baenz canghsijveh lo, caen ak! Gij gojgaeq mwngz haengjdingh ndeidingq, lwnh gou nyi vei.”

Daegfuk heuh Daegcaiz naengh henz congz, de din fwngz riengjret sousib gij bit、maeg、ceij gwnz congz, gaenriengz cawj caz, songde doq gwn caz doq gangjgoj.

Daegfuk naeuz:“Miz ngoenz ndeu, gou roengz mbanj sou huqrwix, sou ndaej fuk sawveh gaeuq ndeu. Gij cihsaw ndawde caen ndeiyawj, gou deng maez dwk lo, couh dawz de yo ndei, baez ndaejhoengq couh hai daeuj ngonz. Ngonz lai le, fwngz humz lo, couh ra bit ra ceij daeuj riengz raiz, baez dem baez raiz, cig daengz raiz ndaej doxlumj gou cij gamsim. Mbouj rox mbouj nyinh gou gaenq gyaez hwnj suhfaz lo. Gou cawx sawsijveh daeuj lienh raiz, yied lienh yied hwnjyinx. Liuh mbouj daengz……”

“Daengx gonq.” Daegcaiz daj- duenh gij vah Daegfuk, “gou fwt siengj ndaej hwnj lo, siujyoz lauxsae haenh mwngz raiz saw ndeiyawj gvaq, cuhcungh lauxsae hix haenh gvaq.”

“Lumjnaeuz miz saeh neix gvaq ni.” Daegfuk riuhehe naeuz.

“Gizsaed, saw veh dwg gij daeg- cangh mwngz, mboujgvaq ngaiz mwngz maizmued baenzlai bi. Gij daegcangh bouxvunz baez dok ngaz, caiq ndeindei ganq de, doeklaeng couh baenz faex hung lo.” Daegcaiz naeuz.

“Deng deng, mwngz naeuz ndaej deng!” Daegfuk ngaekngaek gyaeuj, “youq aen yienh iq bien’gyae haenx hai aen bouq sou huqrwix cibgeij bi, rom ndaej di cienz he. Bi 2016, gou couh daiq lwg daiq yah dauq ranzcoj lo. Bi 2017, miz vunz lwnh gou nyi, naeuz diuz Gaibouxmiz ndaw yienh miz vunz yaek gai ranz. Gou couh loeklak cawx ndaej aen ranz neix, caemh loeklak hai ndaej aen bouq gai saw veh neix. Vunz lajmbanj gyaez daeuj caeuq gou cawx doiq, gou loengh mbouj cingcuj dwg gou gai cienh roxnaeuz dwg cihsaw gou ndeiyawj. Gij saw veh cangbiuj ndei gou, hix haemq ndei gai, miz hag- dangz、ngaenzhangz、diemqlaeuj hung、gunghswh daengj daeuj cawx. Gwq- nduj yaek hai aen bouq neix seiz, gou hix sim gwnz sim laj, lau gaicawx mbouj ndei. Liuh mbouj daengz, seng’eiq haemq ndei, saedceij hix suenq gvaq ndaej bae.” Daegfuk naj riunyumj naeuz.

“Goenghoh mwngz!” Daegcaiz naeuz.

Daegfuk youh naeuz:“Seizneix bohmeh gou hix daeuj riengz gou caemh youq. Reihnaz ndaw ranz bau hawj vunzmbanj guh lo. Daeglwg gou bineix cuhcungh sam nienzgaep, raiz saw caemh ndeiyawj dangqmaz. De di daegcangh neix gou mbouj ndaej hawj de maizmued, engq mbouj ndaej hawj de lumj gou nei gwn caenh gij haemzhoj mbouj miz vwnzva. Ceiq dwgriu dwg mehyah gou, de naeuz:‘Mwngz hai aen bouq neix, gou di ndeu cungj bang mbouj ndaej mwngz, youq ndwi youh youq mbouj baenz, mwngz lingh hai aen bouq sou huqrwix hawj gou dajleix ba.’ Gou naeuz:‘Hai bouq yungzheih, mboujgvaq huqrwix miz mbaeu miz naek, gaiq naek mwngz gwed mbouj ndaej.’ Mehyah gou caen dwggyaez. Mwhhaenx roengz mbanj bae sou huqrwix, souhaeuj ceiq hung couhdwg sou ndaej mehyah neix. Meh neix beizheiq unqswnh, gaenx guh, riengz gou gwn hoj gwn haemz baenzlai bi. Seizneix hawj de youq ndwi, de naeuz youq ndwi lai ndok ndang in, couh riengz mehsimj ranz- nden bae hawciengz dajgoeng. Mwngz naeuz de ‘goetcienh’ mbouj?”

Daegcaiz naeuz:“De ‘goetcienh’ mwngz ndaej fukheiq. Seizneix mwngz gaenq dwg boux canghsawveh lo, gya haeuj yen vwnzlenz saw veh hezvei ba!”

Liuh mbouj daengz Daegfuk dingq le ngeizvaeg lo.

Daegcaiz cam:“Mbouj nyienh gya haeuj ha?”

Daegfuk dauq cam:“Maz heuh- guh yen vwnzlenz saw veh hezvei?”

Daegcaiz naeuz:“Ndawde miz eufwen hezvei、ingjsiengq hezvei、vwnzyoz hezvei、saw veh hezvei daengjdaengj. Couhdwg naeuz dawz gij vunz gyaezmaij doxdoengz rox- naeuz daegcangh doxdoengz comz hwnjdaeuj, fuengbienh daihgya dox- hag、doxgyauliuz, saekseiz daihgya comz guh hozdung.”

“O, yienghneix ya! Gou dungx mbouj miz caiz, lumj duz gungqsou laj gap nei, hawj mwngz riu gou lo.”

Daegcaiz naeuz:“Mbouj miz maz ne.”

Daegfuk naeuz:“Geijcib bi gvaq- daeuj, gou cij goq gij fwnz haeux youz gyu ndaw ranz ndwi, mbouj miz cinglig bae dawz yiengh wnq haeujsim, youh noix caeuq vunz baedauq, nanzgvaiq baenz vunzhuk ndwi.” De gangj sat ngauzngauz gyaeuj.

“Baenz canghsawveh ak ndeu lo, lij dwg vunzhuk la?”

“Canghsawveh aen coh neix dwg mwngz an hawj gou bw, caengz miz boux wnq cingznyinh nw.”

“Danghnaeuz mwngz mbouj miz caen goengfou, gou gamj luenh an coh hawj mwngz ha?”

“Mwngz gaej haenh gou lo, gou dingq le ndang hwnj naenggaeq.”

“Goetcienh! Haenh mwngz coenz song coenz, mwngz couh youq mbouj cwxcaih. Mboujgvaq, vah youh gangj doxdauq nw, gya haeuj le, miz maz hozdung aeu mwngz camgya mwngz aeu bae nw, dajbeij, vwnzlenz ndaw yienh roxnaeuz ndaw singz gawjhengz gij doxdax saw veh, mwngz aeu dawz cozbinj bae camgya. Linghvaih, moix bi lajcieng, vwnzlenz cujciz canghsawveh roengz mbanj bae vih vunzmbanj raiz doiq, mwngz aeu gaenx bae nw, couhcinj mbouj miz ngaenzhong hix aeu bae.”

“Aiya! Gou laihnaeuz dwg maz saeh hoj ne, di saeh neix gou seizseiz guh ndaej daengz. Hai diemq song bi nduj lajcieng, gou bibi dawz doiq dauqbae soengq hawj vunzmbanj, mbouj aeu saek faen cienz. Cijaeu gyoengqde mbouj yiemz doiq gou, gou couh simhai. Haeuj bineix daeuj, vunzmbanj daeuj haw swnhbienh daeuj diemq gou aeu doiq. Gyoengqde naeuz ‘Aeu ndwi cixbah lij hawj mwngz soengq daengz mbanj dem, mbouj ndei eiqsei nw’, ndigah daeuj diemq gou, lij caeuq gou roxnaeuz bohmeh gou gangjgoj saek yaep. Mboujgvaq vunzmbanj yied daeuj yied guhhek lo, moix baez daeuj aeu doiq, cungj gag ce haj maenz cib maenz youq gwnz congz, naeuz bit、maeg、ceij hix aeu sai ngaenz cawx, mbouj ndaej hawj gou diep bonj.”

Daegcaiz naeuz:“Vunzmbanj doengheiq, wnggai yienghneix. Ai! Ngaenzcienz vwnzlenz noix raeuh, moix bi roengz mbanj bae raiz doiq, cungj mbouj miz ngaenzhong hawj gyoengq canghsawveh, cij ndaej hawj gyoengqde gwn donq haeuxringz ndeu, lienz haeuxcaeuz lij mbouj miz banhfap anbaiz, caen dwg doiq mbouj gvaq gyoengqde, vihneix gou roxnyinh najmong dangqmaz.”

“Mwngz gaej yienghneix gangj. Ndaej vih beixnuengx lajmbanj guh di saeh, gyoengq canghsawveh hix sim- gyaez simhai hw!” Daegfuk naeuz, “yawj gij saw veh gou, mwngz ceiq gyaez fuk lawz?”

Daegcaiz naeuz:“Fukfuk cungj ndeiyawj, cungj gyaez.”

Daegfuk naeuz:“Cungj miz fuk song fuk ceiq habhoz ba?”

Daegcaiz naeuz:“Gak fuk gag miz daegsaek, caen naeuz mbouj ok fuk lawz ndei fuk lawz yaez.”

Daegfuk naeuz:“Mbouj ndaej, aeu naeuz fuk ceiq ndei.”

Daegcaiz mbouj miz banhfap couh vix coh fuk cih ‘foux’.

Daegfuk naeuz:“Soengq hawj mwngz lo.”

Daegcaiz naeuz:“Docih, hoeng gou mbouj ndaej aeu ndwi.”

Daegfuk naeuz:“Yiemz ca luba?”

Daegcaiz naeuz:“Mbouj dwg!”

Daegfuk naeuz:“Gaej caeuq gou guhhek! Mwh gou boihseiz seiz, mwngz mbouj yiemz gou gvaq. Ngoenzneix gou itdingh aeu soengq mwngz fukveh, cijaeu mwngz yawj ngamj!”

Song cenj caz bungq itheij!

Daj baezde hwnj, baez miz gij doxdax saw veh, Daegfuk ca mbouj geijlai baezbaez ndaej ciengj. Gvaq- laeng, Daegfuk caeuq Daegcaiz song boux hujgeiq caemh baenz boux- vunzcaiz haemq mizmingz ndaw singz.

（2 sat）