Naeuz sug de, hoeng gou lienz mingzcoh de cungj mbouj rox; hoeng naeuz de najseng ba, gou youh ngoenzngoenz naengh aen ci de. De ha, couhdwg bouxvunz gou ngoenznaengz bietdingh raen——Bouxhaici goenggyau.

Mwh baez daih’it raen de roxnyinh de yakrwix, dwglau dangqmaz, mbouj ndei gangj. De naeng ndaemndwt, daenj buhndaem vaqndaem, daengx ndang dan haiz dwg saekhau. De mbouj sang, samcib bi baedauq, gemj mbouj miz geijlai noh, aenndaeng bwj、aenbak hunggvangq, ciengzseiz dawz fouq gingqda ndaem ndeu, yawj hwnjbae miz di lumj godaih hwzsevei.

Bouxhaici neix yienznaeuz yawj hwnjbae lumj vunzvaih, hoeng miz baez ndeu gou cix raen gij sienhsoh de.

Ngoenzhaenx, gou youh naengh cigoenggyau de dauq ranz. Hwnj ci le, lauheiq dwg haemh doekgonq ninz mbouj ndei, gou naet dangqmaz, da caen hai mbouj ndaej lo. Gou roengzrengz hai da, hoeng naet lai, gou naemjnaemj：“Suenq lo, suenq lo, mboujnex couh laep da geij faen cung ba, fanjcingq lij gyae ne!” Couh yienghneix gou gawqyienz caen ninz ndaek lo.

Mwh caj daengz hai da baez moq, gou doeksat “dongh” sohswdswd ndwn hwnjdaeuj, ok le ndang hanhheu ndeu. Ndaw cigoenggyau mbouj miz saek boux hek naengh ci, hix dingq mbouj nyi saek di sing. Yawj baihrog cueng gaenq mbouj dwg gij gingjsaek gou ceiq sug haenx, gwnz mbwn hix ngamq raen buenq aen daengngoenz caeuq gij fwjhaemh ndingfwtfwt, lumjnaeuz cingq lwnh gou, mbwn ca mbouj lai laep lo.

Gou raen bouxhaici aeu ci dingz youq aen dieg mbouj miz baiz camhgoenggyau ndeu, vuenh ndei haiz le, cingq caepcawq roengz ci. Mwhneix de mbouj haeujsim ngeux gyaeuj yawj, doeksat raen gou. “Yi, mwngz guhlawz lij youq gizneix?” De najbyak nyaeuqnyat cam gou.

“Gou……Gou mbouj siujsim youq gwnz ci ninz ndaek lo.” Gou wzwz azaz, gyaeuj hix mbouj gamj ngiengx, lauheiq de ndaq gou, caen naemj ra aen congh ndeu con haeuj ndaw bae.

“Hoeng gou neix cungj yaek roengzban dauq ranz gwn caeuz lo, yienghhaenx mwngz baenzlawz guh ha？” De song fwngz capeiq youq ndaw ci byaij bae byaij dauq. Gou naengh youq diegnaengh, doeksaetyat, mbouj rox baenzlawz guh.

De sawqmwh dingz din roengzdaeuj lo. “Mwngz naengh 23 loh cigoenggyau daengz ranz ndaej lwi？” De gig miz maqmuengh, riunyumnyum yawj dwk gou.

Lij ndei daxmeh daiq gou naengh 23 loh cigoenggyau gvaq, gou geiq ndaej lohsienq. Gou ganjgip hoizdap：“Ndaej.” De youh riu, doq byaij coh diegvih haici doq naeuz：“Yienghhaenx gou soengq mwngz bae daengz camhgoenggyau 23 loh ba, mwngz caiq naengh ci dauq ranz, ndaej lwi?”

“Ndaej!” Gou baez dingq ndaej dauq ranz lo, vuenheij dangqmaz, angqyangz dwk diuqyetyet. De hai ci sug raixcaix, youh hawj gou naengh daengz baihnaj, lumjbaenz lauheiq gou ninz ndaek moq.

Daengz camhgoenggyau 23 loh le, de lij aeu soujgih hawj gou dwk dienhvah lwnh daxboh daxmeh, yienzhaeuh de itcig yawj gou hwnj ci le, cij menhmenh hai ci. Gou daj ndaw cuengci yawj ngaeuz ci, itcig daengz aen ci youq baih ndithaemh haenx mbouj raen lo. De couhdwg vunzseng ceiq sug gou, yienznaeuz bingzciengz, cix dwg boux vunz sienhsoh ndeu. Gij sienhsoh de raeujsim gou nanznanz bae.

(Anhveih Swngj Anhging Si Yinzminzlu Siujyoz haj nienzgaep Hij Conhvei)