Sinhvazse Baekging ndwen 9 ngoenz 10 dienh Ndwen 9 ngoenz 10, guekgya cujsiz Siz Ginbingz fak saenq cukhoh Gaiq Daih 18 Cungguek—Dunghmungz Bozlanjvei Caeuq Cungguek—Dunghmungz Sanghvu Caeuq Douzswh Funghvei.

Siz Ginbingz naeuz, Cungguek caeuq Dunghmungz laebbaenz gij gvanhaeh doiqvah 30 bi doxdaeuj, song mbiengj gak fuengmienh doxgap mboujduenh laegdaeuq, dox baenz bouxdoih gaicawx ceiq hung, baenz gij doxgap gizdieg Yadai ceiq miz rengz- hoengh. Baenz binghraq sinhgvanh doxdaeuj, song mbiengj dazfwngz hoenx binghraq、caezcaemh haekfug hojnanz, yungh hengzdoengh saedsaeh gejgangj le gij cingsaenz aen mingh- yinh caezcaemh doxbang doxbaengh、ndeihux caezcaemh.

Siz Ginbingz giengzdiuh, bi’gvaq ndwen 11, youq gwnz aen gaihmusiz Gaiq Daih 17 Cungguek—Dungh- mungz Bozlanjvei Caeuq Cungguek—Dunghmungz Sanghvu Caeuq Douzswh Funghvei, gou daezok 4 diemj iudaeuz hwnjguh aen minghyinh caezcaemh Cungguek—Dunghmungz engqgya gaenjmaed, ndaej daengz Dungh- mungz guekgya hoizwngq, gvendaengz gizdieg doxgap cingq laebdaeb doi baenaj. Najdoiq daengzcog, mbiengj Cungguek nyienh caeuq Dunghmungz gyalai doxsaenq canloz, gyalaeg hoenx binghraq、ginghmou daengj gizdieg doxgap, doidoengh gij gvan- haeh doxyaeng bouxdoih ginghci cienzmienh gizdieg vaiqdi mizyauq hengzguh, caetliengh youh ndei youh vaiq caezcaemh hwnjguh “rangh ndeu loh ndeu”, dajcauh gij gvan- haeh bouxdoih canloz suijbingz engq sang, caezcaemh henhoh ndei gij seiqdaeuz ndei bonj dieg mwnhoengh hwngfat.

Gaiq Daih 18 Cungguek—Dunghmungz Bozlanjvei Caeuq Cung- guek—Dunghmungz Sanghvu Caeuq Douzswh Funghvei ngoenzhaenx youq Gvangjsih Nanzningz haimuq, aen cawjdaez dwg “Caezyiengj diuzroen moq seizgeiz moq gwnz dieg gwnz haij, caez guh aen minghyinh caezcaemh Cungguek—Dunghmungz”, youz Cungguek Sanghvubu caeuq Dungh- mungz 10 guek cwngfuj ginghmou cawjguenj bouhmonz caeuq Dungh- mungz misuhcu caezcaemh cawjbanh.