Daegfuk caeuq Daegcaiz dwg vunz mbanjnden. Siujyoz、cuhcungh songde cungj caemh ban. Daegfuk uk mbouj bamz, hoeng gik hagsib. Baez hwnj dangz de couh baiqninz. Baez roengz dangz de couh gig diuqboeb, “gvili gvala” caeuq doengzhag gangj- boq mbouj dingz.

Ngamq doeg sat cuhcungh ngeih- nienzgaep, de mbouj nyienh bae hagdangz lo, naeuz swhgeij mbouj dwg boux vunz doegsaw, caih bohmeh baenzlawz gienq baenzlawz ndaq cungj mbouj bae.

Daegcaiz cix gaenx doegsaw caemhcaiq doeg baenz saw. Bi 1993, Daegcaiz gauj ndaej hwnj Gvangjcouh Cunghsanh Dayoz.

Ngoenzhaenx, Daegcaiz gyang fwngz gaem bingz cijvaiz ndeu daj laeuzsuzse okdaeuj yaek bae gyausiz hwnj dangz. Gvaq aen doengj cang nyapnyaj laj laeuz seiz, raen bouxsai ndeu cingq saiq nyapnyaj ndaw doengj. Gij buhvaq de daenj heiz- nwdnwd. Daegcaiz gaenq byaij hamj song yamq, roxnyinh bouxsai neix miz di sugnaj, de youh byaij dauq, haeujsim baez yawj, doeksaet yat lo, doq hemq:“Daegfuk!”

Daegfuk ngiengxgyaeuj daeuj yawj, nyinh ok dwg Daegcaiz, de najgaej ndaej cij riumbw, gij riu de beij daej lij yakyawj.

“Mwngz baenzlawz youq neix?” Daegcaiz cam.

“Gou——gou——” Daegfuk gangjvah mbajmbwd.

“Diegyouq mwngz youq gyawz? Gvaqlaeng gou bae ra mwngz, seizneix gou ganj bae hwnj dangz gonq.” Daegcaiz doq gangj doq yienh bingz cijvaiz gyang fwngz caengz hai hawj Daegfuk.

Hoeng, Daegfuk mbouj ciep aeu, muengz vazdawz aen daehndaij hung henz ndang couh buet deuz lo.

Daj baezde hwnj, Daegcaiz youq Gvangjcouh doeg daihhag seiq bi, caiq mbouj ndaej raen naj Daegfuk gvaq.

Daihhag bizyez le, Daegcaiz ndaej haeuj yanghfuj bonjdieg bae hwnjban, baenz boux ganbu ndeu. Aenvih de ak raiz, raiz maz baenz maz, dwg boux vunzcaiz ndeu. Youq yanghcin sam bi, de couh ndaej diuh bae cujcizbu ndaw yienh lo.

Bi 2005, Daegcaiz bae aen yienh iq dieg bien’gyae bonj si okcai. Ngoenzhaenx, Daegcaiz gwn caeuz gvaq le, youq gwnz gai youzbyaij. Aen yienhsingz iqet neix seiqlengq deng bya sang humx dwk, cij miz diuz gai hung ndeu, hix dwg diuz goengloh hung ndeu, diuz loh neix ndaej doeng bae diegrog.

Daegcaiz doq byaij doq yawjyawj gij gingjsaek gwnz haw. Byai haw miz aen diemq soudauq huqrwix ndeu, aen ngaeuzlaeng haemq sug mbouj sug ndeu cingq boenq faenloih gij huqrwix ndaw diemq.

Daegcaiz geizheih couh byaij bae gyawj boux vunz de, dongx:“Lauxbanj, baenzlai haemh lij boenq ha?”

“Boenq di, hong dang ngoenz aeu guh sat cij ndaej onjsim yietnaiq.” Bouxhaenx cij goq guhhong, mbouj cienq laeng dauq yawj dwg byawz dongx de.

Dingq gij sing gangj, Daegcaiz gaenq rox de dwg byawz.

Yaep yiet, bouxhaenx lumj roxnyinh maz nei, couh cienq laeng dauq yawj naeuz:“Daegcaiz!” De youh doeksaet youh sim’angq, “mwngz, mwngz baenzlawz youq neix?”

“Gou daeuj neix okcai. Mwngz baenzlawz hix youq neix?”

“Gou youq neix lai bi lo.”

“Vihmaz mbouj dauqbae dieg raeuz?”

“Ai! Gangj daeuj vah lai lo. Danghnaeuz mbouj yiemz, haeuj ranz naengh gonq le.” Daegfuk naeuz.

Gizsaed, aen diemq neix maqhuz gvangq, mboujgvaq doxgaiq rimfoed, cij miz diuz geh iq ngamq gaeuq roengz yamqdin gvaq gyang diemq bae. Haeuj ranz naengh, ranz youq gizlawz ni? Youh baenzlawz naengh ne?

Aiq dwg Daegfuk yawj ndaej ok gij ngeizvaeg Daegcaiz, de najmong naeuz:“Gizneix caenx lai, riengz gou daeuj.”

Laxlawz, laeng diemq miz aen ranz banjhozdung he, yienznaeuz iq, hoeng, miz rugninz、 rugdajcawj caeuq rugdajcaemx. Mehmbwk ndeu cingq dajcawj, dah neix ndang reux, yienghsiengq gvaq ndaej bae. Daegfuk naeuz dwg yah de. Yah de dwg Bouxgun dangdieg, mbouj rox gangj Vahcuengh.

Haemhhaenx, Daegfuk lwnh gij gojgaeq swhgeij hawj Daegcaiz nyi——

Bihaenx, gou gag guhcawj mbouj bae doegsaw cixbah, lij mbouj nyienh riengz bohmeh bae guh hong reihnaz, yiemz hong reihnaz uq caemhcaiq baeg. Seizhaenx bohmeh gou caen dwg ndaenq rangz mbouj maj baenz faex, ndaenq gaeu mbouj raez baenz cag. Gou youq ranz youzlangh song bi, daxboh ciengzseiz ndaq gou naeuz:“Ndaek fangz mwngz, saw mbouj doeg, hong mbouj guh, maij bae gyawz couh bae ba, gaej youq ranz git da gou.” Gou baez baetniuj, caeg daxboh aeu roek bak maenz ngaenz, couh bae Gvangjcouh lo.

Daeuj daengz Gvangjcouh dieg moq vunzseng neix, gou cij rox youq rog caen nanz ra gwn. Laebdaeb cib lai ngoenz caengz ra ndaej hong guh, ngaenz gwnz ndang hix yungh liux lo, gou mbouj ndaej mbouj bae gip huqrwix gai. Youq Gvangjcouh song bi lai, gou youq laj giuz ninz gvaq, youq ndaw laeuz caengz daengj baenz ninz gvaq. Mwhde gou caen lumj boux- gaujvaq nei, gwn mbouj baenz donq, ninz mbouj miz dieg. Gij ndwenngoenz seizhaenx caen mbouj nyienh dauqngeix. Gvangjcouh dwg dieg gwn yungh sai cienz lai, gou mbouj hab youq. Gou rom ndaej di cienz ndeu le, couh deuz lo. Gou roxnyinh mbouj miznaj dauqranz raen vunzmbanj, couh senjcwz daeuj aen yienhsingz iq dieg bien’gyae neix. Hainduj, gou cawx aen cisamloek gaeuq ndeu, haeuj gai roengz mbanj bae sou huqrwix. Buek guh seiq bi, cij hai ndaej aen diemq neix……

Daj baez okcai loeklak ndaej doxraen le, gvaqlaeng songde haujlai bi mbouj ndaej doxraen lo.

2010 nienz, Daegcaiz youh diuh bae dang vwnzlenz cujsiz ndaw yienh. Mbatneix, de miz seizgan raiz faenz- cieng lo, mbouj geij bi, Daegcaiz baenz boux canghraiz haemq miz- mingz bonj si.

Bi 2018 lajcieng ngoenzhaenx haemhhaenx, soujgih Daegcaiz ciep ndaej diuz siusik ndeu——Daegcaiz, ndaejhoengq lwi? Danghnaeuz hoengq couh daeuj diemq gai sawveh Gaibouxmiz mbat ndeu, gou youq neix caj mwngz.

Aen soujgih haumaj neix Daeg- caiz mbouj sug, de hoiz dauq siusik cam:“Mwngz dwg byawz?” Bouxhaenx hoiz de:“Mwngz daeuj couh rox lo.”

Gizsaed, aen cohcaen Gaiboux- miz heuhguh Gaigangjyangz, dwg diuz gai ceiq gaeuqgeq yienhsingz. Mwhnduj cij miz gyoengq bouxmiz ndaej youq gizde cawx diegnamh daengj ranzlaeuz, ranzranz cungj dwg seiq caengz laeuz. Ndigah diuz gai neix couh ndaej aen cohnoix ndeu——Gaibouxmiz. Aen coh neix itcig heuh daengz seizneix. Mwhneix mwngz naeuz Gaigangjyangz miz dingzlai vunz mbouj rox dwg diuz gai lawz, hoeng mwngz naeuz Gaibouxmiz, gyoengq bouxgeq bouxcoz cungj rox, mboujguenj dwg vunz ndaw singz roxnaeuz vunz lajmbanj.

Mboujgvaq gyoengq bouxcawj- ranz mwhnduj diuz gai neix, seizneix dingzlai mbouj youq gizneix youq lo, aenvih diuz gai gaeb lai, ci baedauq mbouj fuengbienh, gyoengqde bae gizwnq cawx ranz, couh gai ranzgaeuq gizneix hawj vunz roxnaeuz co hawj vunz lo. Gvaqlaeng, Gaigangjyangz youh bienqbaenz diuz gai gaicawx ndeu, gij ranzlaeuz caengz laj cungj guh bouqdiemq caez.

Yawj siusik gvaq le, Daegcaiz gag ngeix: Gizde seizlawz miz diemq gai sawveh gou dauq mbouj rox ni. Gou aeu bae yawjyawj, dangguh youzbyaij.

Caen youq diuz Gaibouxmiz ra raen aen diemq gai sawveh lo. Daegcaiz daeuj daengz bakdou, cix mbouj muengz haeujbae, youq rog dou yawj. Cij raen gyang diemq miz aen congzcaet ndeu, bouxsai cungnienz ndeu cingq gungj hwet ngaemgyaeuj, haeujsim raiz saw. De daenj geu buhfaiq baengzcouz saekaeuj ndeu, yienghsik hozbuh、lwggaet cungj lumj buh ciuhgeq nei. Geu vaq de daenj hix dwg vaqfaiq baengzcouz saekfonx. De daenj gouh haizbaengzdoj fonx ndeu. Dauq buhvaq de ndongqmyabmyab, baez yawj couh rox dwg baengz ndei baengz bengz. Gij cangdaeuz de lumj bouxmiz ciuhgonq nei. Najbyak de ndongqrikrik, saeknaj hoengzfefe, hoeng, gwnz nengz de ndoq liux lo.

Daegcaiz mbouj roxnaj de, couh cang guh bouxhek daeuj yawj sawveh, yamqdin mbaeumbengmbeng byaij daengz henz ndang de, laxlawz boux vunz ndaw diemq dwg raiz sawveh. De gig caemdingh gig nyinhcaen bae raiz. Gonj bit gyang fwngz de seiz hwnj seiz roengz, seiz gvaq vang seiz gvaq raeh, seiz hopheux seiz bae soh; byaij bit seiz gip seiz menh, seiz raez seiz dinj. Gij cihsaw de raiz, byaijbit rengz doh, lingzvued mbehai, lumj fwj mbin raemx lae nei, youh cihcih fag’aem. Yawj de raiz saw caen gvaqyinx. De raiz bitveh doeksat seiz, Daegcaiz nyaenx mbouj ndaej hemq:“Ndei! Ndeiyawj! Ak!”

Bouxraiz ce bit le, ngiengxgyaeuj heuh:“Daegcaiz!”

Daegcaiz doeksaet yat:“Mwngz, mwngz roxnaj gou?”

“Nanzdauh mwngz mbouj roxnaj gou? Mwngz dang lingjdauj le lumz hujgeiq lona?”

“Daegfuk, mwngz dwg Daeg- fuk…… Baenzlawz gwnz nengz ndoq liux ni? Gou yaek nyinh mbouj ok dwg mwngz lo.” Daegcaiz cadi hemq hwnj- daeuj.

Daegfuk danqheiq naeuz:“Saed- ceij hojgvaq, bik ndaej byoem loenq yaek liux bae lo.”（1）