Mwh it nienzgaep, gou lij caengz sug gyoengq doengzhag, mwh hwnj dangz roengz dangz gou hix mbouj gangjvah, dan dinghdingh naengh youq diegnaengh yawj saw.

Cigdaengz rox Cau lauxsae le, gou hainduj roxnaj haujlai doengzhag, gyau le haujlai baengzyoux, mwh hwnj dangz, Cau lauxsae heuh gou hoizdap vwndiz, neix dwg gou baez daih’it deng heuh hoizdap vwndiz, gyoengq doengzhag cungj yawj dwk gou, gou hanh lae hanh conh, fwngz cungj ok hanh lo, fwngz nyaenx mbouj ndaej bae riuj dwk gavaq, naj nding rwz dit, sim naemj：“Neix baenzlawz guh？ Gou mbouj rox, danghnaeuz dap loek lo, deng mbouj deng gyoengq doengzhag riu ha?” Mwhneix Cau lauxsae doiq gou naeuz：“Gaej lau, couh dang neix dwg youq ranz mwngz, mwngz naemj baenzlawz naeuz couh baenzlawz naeuz!” Doeklaeng gou naeuz okdaeuj lo, hoeng mbouj deng geijlai, gyoengq doengzhag mbouj miz vunz riu gou, gou roxnyinh gyoengq doengzhag ndei lai, roengz dangz le, gou gyau le haujlai baengzyoux.

Mwh gou youq youwzyenz ceiq mbouj gyaez hwnj dangz yijvwnz lo, ngoenznaengz mbouj cawjdoengh yawj saw, hwnj siujyoz le, gou cugciemh gyaez hwnj le yijvwnz, gyaez hwnj raiz cozvwnz, Cau lauxsae hwnj dangz hawj dou doxlwnz doeg govwnz, hawj dou doq doeg doq guh dungcoz. Lij hawj dou naemj mbangj aen vwndiz, mizseiz lij hawj dou cang gak cungj giek biujyienj, mboujdan rox saw rox sa, youh rox cungsim swhsiengj faenzcieng, doengzseiz soundaej angqyangz, mizseiz Cau lauxsae lij son dou gij dauhleix guh vunz, lumj daxboh daxmeh nei daih dou, de mboujdan gvansim dou, youh yungz dou, seizneix gou hix bienq lo, caiq mbouj lumj gaxgonq ityiengh najmong lo, hix mbouj lau lauxsae lo.

Cau lauxsae couh lumj aen lohdaeng ndeu nei, ciuqrongh dou byaij baenaj, gij cingzcik ngoenzneix gou cungj dwg aenvih gij goenglauz Cau lauxsae!

(Cuh Anh)