Mboengqneix, Dasinh Yen venjbaiz laebbaenz le Dasinh Aenbiengz Fwen Hezvei Aen Dieggiek Hag Fwen Wnhcwngz. Yienhciengz aen venjbaiz yizsiz, bak geij boux canghfwen ndang daenj buhvaq minzcuz, gag bien gag eu le doengh gij fwen miz dieg de daegsaek haenx. Lumjbaenz aeu diuhsang Bouxcuengh Dasinh、sei sam coenz、seibaiz daengj diuh Dasinh gag miz de eu ok gojgaeq aendangj、vwnzmingz lajmbanj、gak minzcuz huzndei daengj, ciengq ok gij sim gyoengqvunz gyo’mbaiq aendangj、dingq vah aendangj、riengz aendangj byaij. Gyoengqde cungj naeuz, gij vah youqgaenj Siz cungjsuhgi youq Aen Hoih Hong Minzcuz Cunghyangh gangj de hawj vunzmbanj cungj sim’angq gikdoengh raeuh, baezlaeng gyoengqde aeu engq roengzrengz ciepcienz caeuq fatyiengz gij vwnzva minzcuz, hawj doengh boux beixnuengx gak minzcuz daj gij fwen Bouxcuengh ndawde roxnaj vwnzva Bouxcuengh, coicaenh gak minzcuz doxgyau doxyungz doxndei.

Gyawj geij bi neix, yienh de yawjnaek hong ciepcienz fwen aenbiengz, youq gak yangh cin cimhra、bangrex caeuq gungganq canghfwen, lij hai ban son eu fwen dem. Seizneix, daengx yienh mbanjmbanj cungj dap daizheiq eu fwen, vwnzva fwnhveiz gig naekna, vunzmbanj cungj dawz eu fwen dangguh cungj ciuzlouz moq ndeu, gij saedceij vwnzva cingsaenz vunzlai bienqndaej engq mizyinx, caemhcaiq coicaenh gak minzcuz doxgiet.

（Liengz Gveivah Lij Hozvei / 梁桂花 李河慧）