Gauhgauj gvaq le, youq ndaw ranz mbwq lai, sawqmwh siengj bae hag haici, gauj aeu gyasijcwng.

Bae bauqmingz le, gyaulen heuh gou youq gwnz soujgih coux roengz “Hagci Baez Diemj Doeng” yenjgen, daengq naeuz neix dwg gij neiyungz gaujsi gohmuz daih’it, cungj dwg dennauj dapdaez, gauj habgek le cij ndaej bae hag haici.

Gou ngaemgyaeuj yawj loengh soujgih, song cien diuz daezmoeg ngoenz ndeu yawj gvaq doh, geiq- maenh ndaw uk. Mwh bae gaujsi, gou daih’iek yungh saek cib faencung couh dapdaez sat lo. “Habgek!” Gauj di neix doiq doengh boux ngamq camgya gauhgauj gvaq haenx daeuj gangj, lumj lwgnyez guhcaemz nei.

Hainduj hag haici, gou din fwngz gyaengjgywet, mbouj gamj luenh- doengh, gyaulen heuh baenzlawz couh baenzlawz, mbouj gamj euq saekdi.

“Yaengyaeng caij di lizhoz, haici byaij menh di, gou son mwngz ‘dauj ci haeuj guq’.”

Hag haici hoj lai, caenh “dauj ci haeuj guq” gou couh lienh le haj ngoenz. Ciepdwk “caek fueng’vih dingzci”“roengoz haici”“roensoh cienjvan” “dinghdiemj dingzci”“buenqlingq haidoengh” geij aen hanghmoeg, gou lienh le ngeihcib geij ngoenz, ngoenz ndit ngoenz fwn cungj mbouj yiet gvaq.

Ngoenz bae gauj gohmuz daih- ngeih haenx, ndaw sim gou youh angq youh yiep, angq dwg ndaej hwnj gaujcangz bae genjyez gou hag haici hag ndaej baenzlawz yiengh, yiep dwg gag lau gauj mbouj ndaej……

Ndaw gaujcangz, baez boux baez boux haeujbae gauj, caengz lwnz daengz gou, gou naengh youq ndaw daihding caj, caenhliengh cuengq- soeng simcingz, hoeng cix naengh mbouj onj, sim diuqbubbub, lienz cwzsoj hix mbouj gamj bae, lau daengz gou bae gauj cix mbouj rox.

Daengz gou haeujbae gauj lo, gou bin hwnj ci, diuz ndei aen’eij caeuq gaiq gingqciuqlaeng, daep ndei daiq- anhcenz, hwnjfeiz, cuengq soujsaz, hwnjdangj. Aen hanghmoeg gaujsi daih’it dwg “dauj ci haeuj guq”. Gou hai aen ci menhmenh daujlaeng, roxnyinh aen ci gaenq dauj daengz giz hab daj fanghyangbanz lo, gou fwt baenq aen fanghyangbanz, fwngz cungj okhanh liux. Lij ndei, aen ci menh- menh dauj haeuj “cehgu” bae ngamjngamj habhab. O, mbaiq mbwn mbaiq deih! Ciep roengzdaeuj geij aen hanghmoeg gou hix gauj ndaej swnhswnh leihleih, yaepyet couh daengz aen hanghmoeg ceiq doeksat. Aiq dwg gou daekeiq fwngfwng gvaqbouh, youq aen hanghmoeg “dinghdiemj dingzci、buenqlingq haidoengh” neix, gou mbouj dingz ci couh cigciep hai hwnjbae, dingz ci.

“Liz biensienq mauh 50 goeng- faen, mbouj habgek. Cingj haici dauqbae diegnduj.” Gou vuengluenh lo, haici dauqbae gingqyienz deng daifeiz song baez.

Mbat daihngeih, gou simcingz engqgya gaenjcieng, youq mwh “dauj ci haeuj guq” couh gyanx sienq lo.

Gou gig nanzgvaq. Bonjlaiz gisuz gou wnggai gvaq ndaej bae lo, vihmaz gauj baenz yienghneix? Gou nyapnyuk lailai.

Dauqcungz bae lienh haici.

Gvaq caenh he, mwh caiq baez bae gauj, gou geij aen hanghmoeg codaeuz cungj gauj ndaej gig ndei, doeklaeng youh daengz “buenqlingq haidoengh” lo. Gou dingz ci roengz- daeuj sup gaemz heiq raezrangh gonq, caiq haici hwnj lingq. Aen ci menh- menh hwnj lingq bae, gou siujsim sisi, baez yawjraen diuz sienq henj, doengzseiz caij lizhoz caeuq sabci. Ci dingz youq buenq lingq, gou sikhaek rag hwnj soujsaz youh cuengq roengz- bae, raen mbouj miz maz sing daez- singj, couh yaengyaeng diem hwnj lizhoz, caijsoq mbouj deng daifeiz. Caj aen ci hwnj daengz dingjlingq, miz sing naeuz “baez gaujsi neix habgek”, gohmuz daihngeih gou couh yiengh- neix gvaq lo.

Gauj haici caeuq gauhgauj mbouj doxdoengz, gauhgauj ndaej baengh faensoq sangdaemq genj yozyau, hoeng gauj gyasijcwng mbouj ndaej, caenh miz habgek caeuq mbouj habgek song cungj, baez mbouj haeuj- sim, couh cengca baen cien leix.

Seiz daihhag haihag yied daeuj yied gyawj lo, gou lij ciuqgaeuq ngoenzngoenz saenqsim cibcuk bae lienh haici, ceng’aeu youq haihag gaxgonq gauj gvaq lingx daengz gyasijcwng, bwh ndei diuz loh daengz- cog byaij haeuj sevei.