Ndwen 8 ngoenz 31 banhaemh, gofoux 《Dahlizgyangh Gyaeundei》 youq aen gaihmusiz Gaiq Daihroek Comzyienj Vwnzyi Minzcuz Vunznoix Daengx Guek youq Baekging banh haenx yienjok, langhbaij fuk veh bya dah Gvangjsih gyaeundei ndeu. Gij sing go ndeidingq canghgo Bouxcuengh Lij Veihungz、Veiz Cingzcingz caeuq aen doih yienj dingzdingj Bouxcuengh hawj vunz sim maez.

《Dahlizgyangh Gyaeundei》 dwg aen cezmuz daih 13 daizheiq neix. De yungh diuh Cunghvaz Minzcuz guh giek, beigingj yungh gij gingj caen bya dah caeuq 《Yaenqsiengq Liuz Sanhcej》 doxlumj daeuj yienh’ok gij gyaeundei bya dah, cauh’ok gij yaugoj ndeiyawj hawj vunz. Bya ndaw mok、ngaeuz gyang raemx、fwn doek cece、 ronghndwen ronghsaw, caezcaemh cauhbaenz gij gingj gyaeundei, yienh’ok gij gyaeundei bya dah Gveilinz, yienh’ok le gij deihbouh mbwn vunz doxhab; gij yaugoj mok daegbied yienh’ok minzcuz fungcingz Bouxcuengh、gij daeng ruz dwkbya Dahlizgyangh; menhmenh gyahaeuj aen doih fwen ciuhgeq Bouxcuengh caeuq cauhmoq danz dingzdingj, yungzhaeuj gyang bya dah bae, yienj gij ndeidingq ndeiyawj hawj vunz. Daj daengx daizheiq yawj, 《Dahlizgyangh Gyaeundei》 caeuq cezmuz wnq mbouj dox- doengz, de yienh’ok gij yinxdaeuz daegbied vwnzva Mbanjcuengh. De aeu daihneix caeuq ciuhgeq doxyungz, yungh dizginz hung yienj ok aen cawjdaez Dahlizgyangh, cugciemh gyahaeuj habciengq, caphaeuj fwenleux、danzciengq diuh dingzdingj Ginhlungz daengj fwen ciuhgeq Bouxcuengh Gvangjsih, yienh’ok gij gyaeundei Dahlizgyangh、gij gyaeundei Mbanjcuengh gag miz daegsaek.(Ciengj Linz)