Bonjbauq siusik（gicej Luz Caudwz） Mboengqneix, Siz Ginbingz cungjsuhgi camgya Aen Hoih Hong Minzcuz Cunghyangh caemhcaiq gangj vah youqgaenj, neix yinxndaej vunzlai aenbiengz gak gyaiq Gvangjsih fanj- yiengj gig hoengh.

Gij vah youqgaenj Siz Ginbingz cungjsuhgi gietcomz le gij swhsiengj youqgaenj gvendaengz dem’ak caeuq gaijndei hong minzcuz aendangj seizdaih moq, gig miz rengz bae con gvaq lizsij、aeu lijlun gangjfug vunz caemhcaiq saenqdoengh simvunz. Ndawde miz haujlai lijlun moq、gingniemh doenghbaez caeuq baij- bouh gijhong. Gvangjsih dwg aen dieggung’yen diegsaedguh youqgaenj de, gaek miz “gij yaenq Gvangjsih”, doiq neix vunzlai cungj gamjsouh aen laeg. Swcigih Minzcunghveij dwg gij bouhmonz guh hong minzcuz aendangj caeuq cwngfuj, dou aeu guhndei gijhong、rapndei diuzrap, daezsang naengzliz, guhndei bouxbangfwngz ok geiqmaeuz ndeu.” Boux dangjcuj suhgi、bouxcujyin Swcigih Minz- cunghveij Banh Cunghboz naeuz, dou aeu haglaeg gij vah youqgaenj Siz Ginbingz cungjsuhgi youq gwnz hoih gangj haenx caeuq gij cingsaenz gangjvah de gaujcaz Gvangjsih, aeu cukmaenh gij eiqsik caezcaemh Cunghvaz Minzcuz guh sienqmeh, youq gij fuengmienh lumj hawj aendangj gyonjcomz caezcaemh lingj- dauj hong minzcuz gyaak、hwnqguh aen ranzmbanj cingsaenz gak minzcuz doxcaemh ndeu、coicaenh gak minzcuz doxgyau doxyungz doxndei daengj, guh’ok cingzcik moq.

“Aen Hoih Hong Minzcuz Cunghyangh seigangj gij cingzgvang hong minzcuz seizneix, cix gangj ndaej laeg raeuh, hidungj gangjmingz aen swhsiengj gvendaengz dem’ak caeuq gaijndei hong minzcuz aendangj youqgaenj de.” Aen hoih neix dawz gij swhsiengj youqgaenj de gyonj guh cibngeih aen ‘yaekaeu’, neix ciep- cienz le ‘gouj aen genhciz’Aen Daihhoih Daihcaet Haenh Minzcuz Doxgiet Baenaj Daengx Guek gyonj hwnjdaeuj de、 ‘bet aen genhciz’Aen Hoih Daihseiq Hong Minzcuz Cunghyangh gyonj hwnjdaeuj de, caemhcaiq riengz seizdaih baenaj hwngfat, hidungj daezsang.” Bouxgyausou Gvangjsih Minzcuz Dayoz、bouxconhgyah guhdaeuz Gvangjsih Gij Eiqsik Caezcaemh Cunghvaz Minzcuz Yenzgiuyen Gungh Yungjveih gangj, cibngeih aen “itdingh” neix aeu cukmaenh gij eiqsik caezcaemh Cunghvaz Minzcuz guh sienqmeh, hidungj gangjmingz aen swhsiengj dazyinx、muzbyauh canloz、yinvu youqgaenj、banhfap cwngcwz, neix vih hong minzcuz vix ok fueng’yiengq. Dou aeu rox cib- ngeih aen “itdingh” youh caez youh cinj neix, dawz de cienzmienh gvancez guhsaed daengz diuz roen “cauhlaeb aen Gvangjsih gyaeundei, saedyienh aen loqsiengj fukhwng” moq bae, ciengqok diuzgo “minzcuz daihyi cibngeih hoz” cukmaenh aen gih yienghbanj gij eiqsik caezcaemh Cunghvaz Minzcuz.

Gij vah youqgaenj Siz cungjsuhgi cungjgez le gij saedguh hong minzcuz aendangj ceiq moq de, neix dwg Majgwzswh Cujyi minzcuz lijlun Cunghgozva aen makbaenz ceiq moq ndeu, neix vih hong minzcuz vixok fueng’yiengq, baijok bouxdaeuz yinz- minz gig gyaezmaij lwgminz、 vih lwgminz guhsaeh, yienh’ok Dangj- cunghyangh gvansim caeuq gyaezmaij siujsoq minzcuz caeuq ranghdieg siujsoq minzcuz. “Gou dwg boux siujsoq minzcuz ndeu, youh dwg boux dangjveij suhgi siujsoq minzcuz swciyen, dingq le gij vah neix, gou roxnyinh saenqhwnj raixcaix.” Boux dangjveij suhgi Bahmaj Yauzcuz Swciyen Vangz Bingjfungh（Mauz- nanzcuz） yienghneix naeuz, dou aeu doq hagsib gvancez gij cingsaenz aen hoih, doidoengh gij cingsaenz neix youq ranghdieg siujsoq minzcuz haiva dawzaen. Vangz Bingjfungh maq- muengh cunghyangh ndaej cungdenj douzcienz ok cwngcwz daemxcengj ranghdieg minzcuz bae hwngfat guhhoengh lajmbanj, guhhoengh lajmbanj cix aeu dawz minzcuz son- gyauq dangguh hong youqgaenj caeuq daemxcengj gaenbonj, hawj gak minzcuz lwghag majhung baenz caiz, hawj vwnzva minzcuz cienzdoengj mwnhoengh hwngfat, vih saedyienh aen loqsiengj Cungguek hawj Cunghvaz Minzcuz fukhwng hung- mbwk gietcomz rengz haenq.

“Gou dwg bouxvunz youq gih- cwngz guhhong ndeu, gak minzcuz fuzvuyenz caemh yawj le gij vah youqgaenj Siz Ginbingz youq Aen Hoih Hong Minzcuz Cunghyangh gangj de caeuq gij sinhvwnz mizgven de, ndawde yienh’ok le gij lingjdauj cunghyangh gig gvansim siujsoq minzcuz ganbu, caeuq dou gamjcingz naekna.” Boux dangjcihbu suhgi Nanzning Si Cunghvaz Cunghlu Segih Se Vazgenh gangj, aen segih neix caeuq Nanzningz Hojcehcan doxdep, miz haujlai vunz daeuj daengz soujfuj Gvangjsih, camh daih’it couh youq gizneix doekdin, ndaw segih miz 19 aen minzcuz. Mbangjboux beixnuengx siujsoq minzcuz mwh ngamq daengz Nanzningz seiz, mbouj aiq rox gangj Vahgun, guh seng’eiq couh guh mbouj baenz, miz mbangj cix mbouj rox son bouxlwg swhgeij sij cozyez……Se Vazgenh couh youq segih guh aen ban son Vuhgun、guh “gya’gyauq simndei”, bang gyoengqde huzswnh youq Nanzningz an’dingh roengzma. Se Vazgenh naeuz, baezlaeng de yaek engq miz cwngci cwzyinganj caeuq lizsij sawjminghganj guhndei hong minzcuz, baengh Aen Fuzvu Daihding Segih、Aen Cungsim Dangj Vih Vunzlai Fuzvu、Aenranz Minzcuz、Aen Dieggiek Sonlienh Vahcuengh Vahgun daengj fuzvu cindi, aeu “minzcuz cingzlaeg dangjgeiz hoengz” “caen- sim、yiedsim、simndei” hawj gak minzcuz vunzlai segih “haisim、swnhsim、cuengqsim”, mboujduenh gyamaenh caeuq hwngfat gak minzcuz bingzdaengj doxgiet doxbang huzndei, gyaak gij eiqsik caezcaemh Cunghvaz Minzcuz gak minzcuz ginzcung.

Dangz Gvanghvaz dwg boux- veicangj Aen Vwnzva Yozvei Boux- cuengh Aenbiengz Lungzlinz Yen. De daj bi 1991 iudaeuz guh Gaiq Daih’it “Aen Hawfwen Bouxcuengh Sam Nyied Sam”, daengz seizneix gaenq ndaej 30 lai bi lo. Bi 1997, aenvih guh suijgu yaek senj vunz daengz yienhsingz, de caemh youq ndawde, doeklaeng de couh dawz gij fwen Bouxcuengh daiq daengz yienh- singz, bi 2012 de laebbaenz le Aen Vwnzva Yozvei Bouxcuengh Aen- biengz Lungzlinz, baez di baez di dawz gij minzcuz vwnzva daiq haeuj cunghsiujyoz bae, caiq bauq ndaej le 12 aen swcigih gaep feihyiz hangh- moeg, gij fwen Lungzlinz cix ciengq daengz Baekging、Yanghgangj……De itsim caenh siengj ciepcienz caeuq cienzboq gij vwnzva minzcuz, neix daiqdoengh le gij beixnuengx Myauzcuz、Mulaujcuz、Yizcuz、Boux- gun Lungzlinz laebbaenz aen Yozvei minzcuz swhgeij. “Seizneix haj aen minzcuz dieg dou miz hozdung roxnaeuz ciet hung cungj doxheuh, gak minzcuz ‘gizgiz cungj sebhaeuj’, gyalaeg yungzhab. Dou siengsaenq, miz Dangjcunghyangh lingjdauj, baez- laeng dou yenzgiu、ciepcienz、hwngfat、cienzboq minzcuz vwnzva gwnzbiengz itdingh engq baenzsaeh.”

“Gou bi neix ndaej 50 bi, song ngoenz neix caemh dingqnyi Aen Hoih Hong Minzcuz Cunghyangh hai lo, miz baengzyoux cienjfat le gij vah bouxlingjdauj cunghyangh hawj gou, gou dwg boux mehmbwk Myauzcuz lajmbanj, couh gangjgangj geijcib bi doxdaeuj, gij bienqvaq ndwenngoenz dou ba.” Vunzmbanj Yungzsuij Myauzcuz Swciyen Mbanjmyauz Yij- buz Liengz Yaujcez naeuz, de daj lij iq couh maij gij ndangdaenj Myauzcuz. Doenghbaez gyoengqde youq diegbya youq, ndwenngoenz gvaq ndaej gig hojndoq, ciuhciuh daihdaih cungj gag guh buhdaenj, de itsim caenh siengj gaijbienq cungj saedceij neix. Bi 1998, de bae daengz Nanzningz douzgau boux daxau ndeu, youq giz de dajgoeng ndaej 5 bi. Bi 2003, cwngfuj haifat lijyouz vwnzva bae banggungz, Mbanjmyauz Yijbuz——aen ranz- mbanj de yaek aeu bae guhbaenz giz diegbaeyouz, de doq ma ranz hai le aen diengzhong guh gij dinfwngz siuqva ndangdaenj Myauzcuz, daengz seizneix aen de gaenq bienqbaenz aen dieggiek fuhva cauhnieb ndeu, miz 40 hohcauhnieb gyahaeuj ndawde bae. Aen dieggiek neix bang le 30 lai boux cejnuengx Dungcuz duetdungz.

“Doenghbaez baenzlawz ndaej guhdaengz yienghneix, mboujmiz aendangj bang Mbanjmyauz Yijbuz bienqbaenz aen diegbaeyouz, couh mbouj miz gij saedceij dou ngoenz- neix.” Liengz Yaujcez naeuz, “daj aen diengzhong daengz aen dieggiek fuhva cauhnieb caiq hwngfat baenz aen dieggiek hawj gak aen yozyau sonlienh, baezlaeng dajsuenq hwnq aen bozvuzgvanj seivunz ndeu, gij ndwenngoenz caeuq saehnieb gou ngoenz ndei gvaq ngoenz, neix liz mbouj ndaej gij cwngcwz ndei aendangj. ”