Yaek daengz banringz, youq Gvangjsih Loz- cwngz Mulaujcuz Swciyen Lungzan Cin Lungzfung Cunh Mbanjginhgih, daih bouxhek gwn gvaq duix youzcaz ndeu le, dahbawx Myauzcuz Siuh Suhlonz hainduj youq bakcauq nyaengq cawj ringz. 27 bi gonq, Siuh Suhlonz daj Yungzsuij Myauzcuz Swciyen haq daengz Mbanjginhgih, caeuq bouxgvan Bouxgun caez gvaq ndwenngoenz.

Youq aen mbanj iqetet neix, miz Cuengh、Gun、Mulauj、Myauz、Yauz、Dung、Gingh daengj 7 aen minzcuz, ndawde gyaeujvunz Bouxgun ciemq 30%, minzcuz wnq ciemq 70%. Gyoengq vunzmbanj gangj Vahcuengh、Vahmulauj、Vahdung daengj 11 loh vahdeihfueng, 70 lai ranz 300 lai boux vunzmbanj daihdaih doxhuz.

Mbanjginhgih haujlai ranz cungj dwg lai aen minzcuz gapbaenz, ranz Hoz Mingzsingh couhdwg ranz ndeu. “Gou caeuq daxmeh dwg Bouxcuengh, daxboh dwg Bouxgun, dahbawx dwg Mulaujcuz.” Hoz Mingzsingh naeuz.

Daengx bi seiq geiq, gwnz congzhaeux ranz Hoz cungj miz gij feihdauh geij aen minzcuz, ceiz、faengx Bouxcuengh, gijgwn gyoet Mulaujcuz. Gyoengqde daengx ranz 3 aen minzcuz dox aeueiq minzcuz sibgvenq, ndwenngoenz gvaq ndaej vuenyungz dangqmaz.

Aenvih lizsij yienzaen, diegcoj haujlai vunz Mbanjginhgih youq Fuzgen, Vahminjnanz caeuq Vahgveiliuj bonj dieg baenz gij vah cujyau gyoengq vunzmbanj gangjgoj. Lai bi doxdaeuj, aenvih lai aen minzcuz doxaeu doxhaq daengj, mbangj vunz- mbanj doengzseiz rox gangj Vahmaxgai、Vahcuengh、Vahmulauj、Vahmyauz、Vahdung daengj vahdeih- fueng.

“Bae ranz bouxwnq guh hong, ciengzseiz aeu gangj lai loh vahdeihfueng.” Daeuzmbanj Mbanj- ginhgih Linz Siyoz naeuz, caezgya caemh youq gvaq ndwenngoenz nanz le, rox gangj sam seiq loh vahdeihfueng mbouj hoj.

Mwh ngamq daeujdaengz Mbanjginhgih, Siuh Suhlonz aenvih gangjvah mbouj doxdoengz cix ndoj youq ranz mbouj nyienh okdou gvaq: “Haujlai vunz gangjvah gou cungj dingq mbouj rox, gyoengqde gangj Vahminjnanz caeuq Vahgveiliuj, hoeng gou gangj vahdeihfueng Myauzcuz ranz meh.”

“Ndaw mbanj miz haujlai dahbawx diegrog, gyoengqde dingzlai dinfwngz lingzleih, hix cungj ndaej langhbaij gij daegsaek minzcuz bonjfaenh.” Hoz Mingzsingh naeuz, vunz naeksim bae ranz Siuh Suhlonz youz le yawjraen, youzcaz de guh haenx ndei gwn raixcaix, mingzdaeuz Siuh Suhlonz yaepyet couh youq Mbanjginhgih cienz hai lo. Mboengq mbouj nyaengq hong reih hong naz, vunzmbanj ciengzseiz bae ranz Siuh Suhlonz, gwn duix youzcaz Ranzmyauz ndeu, gangjgangj goj. Gangjvah mbouj doengz, youq baihnaj youzcaz, menhmenh mbouj miz lo.

Youq Mbanjginhgih, binaengz liggaeuq ndwencieng cibngux dwg ciet bingzan lumj gvaqcieng ityiengh hoenghhwd. Aen ciet neix dwg ginggvaq ciuhgonq gak minzcuz ndaw mbanj doxyaeng laebbaenz. “Gyoengq bouxlaux naeuz, raeuz gak cuz gawqyienz doxcomz youq gizneix, couh lumj ranz vunz ndeu ityiengh, haenx couh dingh aen seiz ndeu gvaq ciet, muengh gyoengq beixnuengx daj gak dieg daeuj haenx bingzan.” Hoz Mingzsingh naeuz.

Youq ngoenzneix, beixnuengx baengzyoux vunz Mbanjginhgih cungj daeuj, caezgya doxcomz gwn laeuj angqhoh, gyoengq vunzmbanj lij daenj hwnj ndangdaenj minzcuz bonjfaenh, guh youzcaz、guh ceiz, cingj bouxwnq daengz ndaw ranz cimz, angqyangz dangqmaz.

Ndaw mbanj miz diuz gvigawj mbouj yungh naeuz ndeu： Mboujlwnh ranz lawz miz begsaeh hoengzsaeh, daengx mbanj moix ranz cungj aeu miz vunz bae bang. “Boux youq rog guh hong baez- naengz hix ganj dauqma bang.” Linz Siyoz naeuz.

“Youq caemh mbanj, couhdwg ranz vunz ndeu!” Hoz Mingzsingh naeuz, ndaw mbanj gig noix raen ranz lawz aenvih saehsaepsoiq miz ngaek- ngeu gvaq, de ndaej geiq, mizseiz miz vunz doxndaq saek coenz, hoeng baenq ndang gvaqdaeuj, song vunz youh caez naengh gwn laeuj gangjgoj lo.

(Nungz Gvanbinh Cinz Gvangjvaz doz faenz daj Sinhvazvangj aeu daeuj)