8 nyied 27 hauh daengz 28 hauh, Aen Hoih Hong Minzcuz Cunghyangh youq Baekging hai, Cunghgung Cunghyangh cungjsuhgi、Gozgyah cujsiz、Cunghyangh Ginhveij cujsiz Siz Ginbingz youq gwnz hoih gangj vah youqgaenj. Beixnuengx gak minzcuz gak dieg Gvangjsih foenfoen ngonz- yawj le gij sinhvwnz mizgven haenx, caemhcaiq hagsib gij cingsaenz youqgaenj vah Siz Ginbingz.

8 nyied 28 hauh gyanghaemh, vunzmbanj Vanzgyangh Mauznanzcuz Swciyen Swh’wnh Cin Mbanjcinz- sangh doxcomz youq henz densi yawj gij sinhvwnz neix, gij vah youqgaenj Siz cungjsuhgi yinxndaej vunzlai fanjyiengj hoenghhwd. Mbanjcinz- sangh miz 731 hoh 3227 vunz, miz Bouxcuengh、Bouxgun、Mauznanzcuz、Myauzcuz、Yauzcuz、Suijcuz、Bouxyaej daengj 7 aen minzcuz. 20 bi doxdaeuj, baengh gij cwngcwz minzcuz aendangj caeuq guekgya, vunzlai Mauznanzcuz、Yauzcuz、Myauzcuz gaenq mbouj youq dieg doekgungz baeznaengz youq lo. Gyoengqde baengh senj dieg bang- gungz haifat, guh doengh gij canjnieb dajndaem gooij、 gohaeux、 gomak、dajciengx nonsei daengj, caeuq gak cuz ginzcung doxcaez duetgungz baenzmiz lo. Bi 2019, mbanj de miznaj aeu ndaej aen mingzdaeuz “aen mbanj yienghbanj guh minzcuz doxgiet baenaj daengx guek”. Veiz Bingjluz dwg Dangjcungjcihbu suhgi mbanj de, de dingq le gij vah Siz cungjsuhgi, gag roxnyinh diuz rap gwnzmbaq naek raeuh, baezlaeng aeu yungh cingz yungh sim guhndei hong minzcuz, aeu saedguh vih saedyienh aen loqsiengj Cungguek okrengz okhanh.

Ngoenz de, beixnuengx Myauzcuz laeng Yungzsuij Myauzcuz Swciyen Mbanjmyauz Mungvuh caemh comz yawj gij sinhvwnz gvendaengz hong minzcuz haenx. Bi 2018 seizcin, Mbanjmyauz Ginjdung miz 13 hoh ranzgungzhoj 38 boux beixnuengx Myauzcuz daiq yah daiq lwg senj daengz Mbanjmyauz Mungvuh. Aen mbanj neix gyawj yienhsingz, miz Myauzcuz、Yauzcuz、Dungcuz、Boux- gun daengj lai aen minzcuz dingh- youq. Mbouj geijlai nanz, gyoengqde couh yungzhaeuj “aen ranz hung”neix bae lo. Gyangngoenz gyoengqde youq gizbaeyouz guhhong, gyang- haemh cix hwnj daiz guh“canghheiq”. Banh Singhhaij couh dwg ndawde boux ndeu. De yawj sinhvwnz le, riu dwk naeuz：“Raeuz daj dieg doek- gungz senj daeuj daengz yienhsingz, gvaq hwnj le saedceij ndei, neix aeu gyo’mbaiq gij cwngcwz minzcuz aendangj caeuq guekgya!”

8 nyied 29 hauh, Bwzswz Si Minzcunghveij hai hoih hagsib gvancez gij cingsaenz vah youqgaenj Siz cungjsuhgi laeng Aen Hoih Hong Minzcuz Cunghyangh. Aen hoih iugouz sojmiz ganbu cizgungh aeu dawz gij cingsaenz neix caeuq gij cingsaenz “Caet It” dem gij vah youqgaenj cazyawj Gvangjsih gangj de doxgap hwnjdaeuj, daj bak bi lizsij aendangj ndawde gaemdawz aen sawjmingh hong minzcuz seizneix, aeu dawz cukmaenh gij eiqsik caezcaemh Cunghvaz Minzcuz guh sienqmeh. Aeu aen youhsi Bwzswz miz vunzlai siujsoq minzcuz comzyouq de, cienz- mienh guhlaeg dingjnanz cauhguh minzcuz doxgiet baenaj, engq caenhsim baujhoh、ciepcienz caeuq fatyiengz minzcuz vwnzva, maedsaed doicaenh guhyiengh cauhlaeb hwngfat henzguek hawj lwgminz bienqfouq, aeu laebdaeb fatyiengz gij cingsaenz Bwzswz Gijyi caeuq duetgungz gung- geng, coicaenh gij lijsiengj、saenq- niemh、cingzgamj、vwnzva gak minz- cuz caezcaemh doxgiet. Aeu haenq- rengz dajcauh aen daihbuenz “Bwzswz aeu sam rangh seiq sienq haj dieggiek cukmaenh gij eiqsik caezcaemh Cunghvaz Minzcuz”, roengzrengz doidoengh hong minzcuz Bwzswz Si youq seizdaih moq hwngfat cizlieng sang.

Ngoenz de, Lozyez Yen caemh hai hoih hag gij cingsaenz vah Siz cungjsuhgi. Aen hoih iugouz gak yangh(cin)、gak danhvei aeu nyinh- caen hag gij cingsaenz neix, maedsaed dem’ak “seiq aen eiqsik”、genhding“seiq aen gagsaenq”、guh daengz “song aen henhoh”, gag rox dawz swhsiengj caeuq hengzdoengh caez- caemh daengz gij cingsaenz vah youqgaenj Siz cungjsuhgi bae, giethab hong minzcuz saedsaeh Lozyez, dawz gak minzcuz doxgiet youq giz ndeu, doxcaez cauh’ok ngoenzcog gyaeundei Cunghvaz Minzcuz.

(Mungz Hungzciuz /蒙宏谯 Lungz Linzci/龙林智 Vuj Cunghgoz / 伍忠国 Loz Yiz / 罗 渝)