Cawzcou cib nyied, bouxsij gag hai ci bae Dwzbauj Yen Cwngzgvanh Cin Nazvwnh Cunh lijyouz. Banringz, daj ndaw yienhsingz Dwzbauj hai ci okbae, riengz henz hamq Dahgensuij gyaeundei hai baenaj. Aen ci hai mbouj daengz byongh diemjcung couh bae daengz Nazvwnh Cunh, aen mbanj daegsaek siujsoq minzcuz lai raeuh ndeu, mbaw veh reihnaz gyaeundei “faex heu heux aenmbanj, bya loeg ing hamqciengz” ndeu couh yiengh- neix mbebaij youq dangqnaj mwngz.

Nazvwnh Cunh liz yienhsingz Dwzbauj miz 8 goengleix, dwg aen mbanj hojndoq laeng gij hong guh “Cibsam Haj” daengx mbanj doihaeuj ndawde aen ndeu, dwg aen mbanj cungdenj aeu lijyouz lajmbanj bang- gungz gih raeuz. Nazvwnh Cunh Mbanjnazvwnh lizsij gyaenanz, bya dah miz heiq lingz, gungganq ok vunz maenh’ak, Heiqcuengh、fwen daengj vwnzva minzcuz goekdaej naekna, gij vwnzdij hozdung vunzlai cix lai. Mbanjnazvwnh raeblaeng miz bya, henzgyawj miz raemx, bya heu raemx saw, vanzging gyaeundei, habngamj vunz youq. Dahgensuij lumj diuz sainyawh nei ndonj gvaq ndaw mbanj. Ndigah, gizde habngamj guh swngh- dai lijyouz .

Bouxsuhgi lijyouz conhyez hoz- cozse dangjcihbu cunh de naeuz, geij bi neix doxdaeuj, Nazvwnh Cunh baengh gijndei mbwn hawj caeuq funghgingj byaraemx, caez guh duet- gungz gunggeng caeuq hwnqguh laj- mbanj gyaeundei, gaenxmaenx daj- cauh gij lijyouz swnghdai lajmbanj. Cwngfuj dazyinx、giyez ginghyingz、nungzminz caeuqfaenh bienqbaenz gujdungh, byaijok diuz roen baenzmiz “lijyouz + banggungz” moq ndeu.

Lijyouz、ciengx rwi、ciengx nonsei caeuq ndaem batgak daengj dwg gij canjyez daemxcengj Nazvwnh Cunh. Daj laebbaenz Nazvwnh Lijyouz Conhyez Hozcozse doxdaeuj, cihbu veijyenz daiqdaeuz, gujli bouxguhnaz aeu reihnaz、guhhong daengj caeuq- faenh, bae ndaem va caeuq baen aeu cienzcanh hozcozse. Bi 2018、2019, mbanj de lienzdaemh song bi miznaj ceng ndaej aen mingzdaeuz mbanj hungzgiz “swnghdai habyouq”; bi 2019 ndaej senj haeuj “cib aen mbanj ceiq gyaeundei Gvangjsih” caeuq “buek daihsam aen mbanj miz daegsaek siujsoq minzcuz Cungguek”.

Gaij Yienghsiengq Guh’ok Daegsaek

20 sigij 70 nienzdaih gaxgonq, gij ranz Nazvwnh Cunh Mbanjnazvwnh cungj dwg ranz doem ciengz henj vax ndaem, gig miz daegsaek Bouxcuengh. 20 sigij 80 nienzdaih doxdaeuj, ndaw mbanj menhmenh miz vunz aeu cien caeuq ganghginh suijniz hwnq ranzlaeuz moq, ranzdoem menhmenh mbouj raen lo, daengz gajlaeng Mbanjnazvwnh gag lw 2 gan ranzdoem ce ndaej ndei dem lo. Mbanjnazvwnh ciuq gij yiengh ranzdoem gaijcauh le daengx mbanj 94 gan ranz, aeu sa、suijniz dem gij yienzliuh daegbied haenx doxgyaux bae ok faqciengz doem henj, aeu faexcaen gyoebcang gyagoeng baenz naj lingq sam gok guhbaenz dingj ranz, liux le caiq an vax ndaem hwnjbae, neix couh lumj gij ranz doem ciengz henj vax ndaem doenghbaez. Seizneix, 94 gan ranz mbanj de gaenq ca mbouj geijlai gaijcauh ndei lo, ranzranz cungj dwg ciengz henj vax ndaem. Aen mbanj miz gij daegsaek Bouxcuengh lai raeuh ndeu couh naengh youq dangqnaj vunzlai, cijaeu mwngz youq ndaw mbanj, couh muengh ndaej raen bya raemx, sim niemh ranzmbanj.

Guh Lijyouz Hwngfat Canj- nieb

Vunzmbanj Nazvwnh Cunh cinghseuq lauxsaed, vwnzva minzsug naekna, doiq fwen、“ndwen ngeih co- ngeih” duzlungz ngiengx gyaeuj、“sam nyied sam”…… Gij hozdung daem ceiz、ciengj duzbit、bau aendom daengj, hawj gij ndwenngoenz vunzlai bienq ndaej lai saek lai yiengh. Vunzmbanj itcig cungj maij ndaem haeuxnaz, lij guh gij hong dwkbya、dajciengx doenghduz ndaw raemx dem, gij doxgaiq aeu nywj、gaeu san de Mbanjnazvwnh caemh loq miz- mingz.

Bi 2016 ndwen 4, Lij Cinbenh boux daiqdaeuz bienq fouq Nazvwnz Cunh oknaj, boux daibyauj dangjyenz、boux daibyauj yinzda ndaw mbanj doxcaez cujciz 98 hoh vunz laebbaenz Gvangjsih Bwzswz Si aen hozcozse ciennieb guh lijyouz daih’it. Neix hawj ranzhojndoq itheij haifat gij swhyenz lijyouz, daiqlingx ranzhoj- ndoq hwngfat aeu ngonz va guh lijyouz demsou duetgungz. Nazvwnh Cunh giethab gij swnghdai “raemx saw bya heu” ndei, cijdauj hozcozse haivat gij swhyenz “haeuxnaz—gova—dangz- rwi”. Seizcin yaek gvaq seizhah yaek daengz, couh ndaem gohaeux mbouj doengz saek bae “veh” doz, dajcauh nazhaeux miz yisuz de; seizdoeng cix aeu naz hoengq ndaem va, dajcauh lai cungj haijva guh lijyouz, hawj duzrwi caemh ndaej daeq va. Caiq fatdoengh vunzlai gaenxmaenx gai gij doxgaiq caeuq lijyouz mizgven de, haigvangq roenloh, hawj vunz demsou. Bi 2019, gujli vunz Mbanjneiben、Mbanj- luzlinz、Mbanjluzlang riuzcienj le 82 moux reihnaz, yinxhaeuj lauxbanj diegrog bau ndaem makbwzyanghgoj. Seizneix, Nazvwnh Cunh miz nonsei、lijyouz、makbwzyanghgoj、haeuxnaz dem ciengx rwi haj aen canjyez hung neix, hawj nungzyez caeuq lijyouz yungzhab hwngfat, bi 2019 gij ginghci cizdij daengx cunh gungh souhaeuj 10.09 fanh maenz.

Aeu Hanghmoeg Guh- hoengh Lajmbanj

Nazvwnh Cunh cingj Gvangjcouh Cwngzsi Gveihva Sezgi Yen bang sezgi aen cungjdaej gveihva lijyouz laj- mbanj Nazvwnh, caenhrengz haiguh swnghdai baujyuz、guh ndei sezsih、gaijcauh yiengh mbanj、hwngfat lijyouz、dauqhwng conzdungj daengj 5 loih hung 60 aen hanghmoeg.

Seizneix diuz loh haeuj mbanj、gehhongh gak mbanj cungj dwg roen suijniz liux, gij sezsih baiz raemx baiz oepsoep mbanjmbanj cungj miz caez, gak mbanj giz vunz comzyouq lai de henzloh cungj miz gij lohdaeng aeu daiyangznwngz fatdienh haenx. Youh miz aen cunghhoz fuzvu cunghsinh cunhgiz goengnaengz lai de, caiq laeb miz gij biusik、biubaiz gveihfan, lumjbaenz diuzroen、coh mbanj、bajbaiz dou、dieg baeyouz daengj.

Daengz seizneix, gij yiengh- siengq 7 aen mbanj daengx cunh gaenq gaijcauh ndei; aen hanghmoeg ceihleix gij caihaih diciz gaenq guhbaenz caemhcaiq hainduj yungh lo. Cawzok gij neix, Nazvwnh Cunh lij haiguh gaijcauh Nungzgyahloz “Caet Aen Ndaundeiq Buenx Rongh- ndwen”、 gvangjcangz minzcuz guh- caemz、aeu gij ranzfaex ndaej senjnod haenx guh dieghekyouq daengj hanghmoeg. Laebdaeb guh hangh- moeg, gaij ndei guh caez gij sezsih giekdaej lijyouz lajmbanj Nazvwnh, daezsang gij mingzdaeuz、yingjyangj caeuq cingzdoh haenhndei lijyouz.

Guenj Ranzmbanj Coicaenh Doxhuz

Nazvwnh Cunh aeu dangjgen dazyinx ceihleix lajmbanj, damqra ok aen dijhi: Dangjcihbu dazyinx, gag ceihleix、aeu faplwd ceihleix、aeu daudwz ceihleix、aeu dungxcaiz ceihleix yungzhab hwngfat, cauxbaenz aen daihbuenz ceihleix lajmbanj lai fueng caez okrengz ndeu, hawj Nazvwnh Cunh vunz ndaw ranz doxhuz、ranz doxgyawj doxndei、ganbu caeuq vunzlai huzndei caemhyouq, vunzlai gag roxnyinh engq rimhoz、engq vuenyungz、engq ancienz. Cawzok gij neix, aen cunh de lij guenjleix faenrom “aen cauhsi simndei”, dazyinx vunzlai guh saeh- ndei, hawj gij ranzhojndoq engq gaenx bae caeuqfaenh ceihleix laj- mbanj. Haiguh doenghgij hozdung lumj bingzok ranzhojndoq ceiq gyaeundei、bouxguhdaeuz baenzmiz ceiq gyaeundei、yahbuz ceiq gyaeundei、 mehbawx ceiq gyaeundei、 boux miz dwz miz caiz ceiq gyaeundei caeuq boux gungcanj- dangjyenz maenhndei, ra “vunz Nazvwnh ceiq gyaeundei”, aeu gij rengz vunzndei henzndang guhyiengh, dazyinx vunzlai, coicaenh Nazvwnh vwnzmingz hwngfat huzndei.