“Ciuhgonq doengh bouxgvai, lae geijlai lwedhanh, youq Yezdungh Veigvanj, guh cauhfanj hwnjbing. Raeuz daeuj daengz veigvanj, dangq haeuj mwh doenghbaez, sim riengz bouxak bae, gyaez biengz gyaez guekcoj. Byaij haeuj singz mizmingz, yamq din dieg saenzswngq, daengx ndang lwed nyoengx hwnj, swnj gwzming cingsaenz.”

Cawzhah mbwn hwngq, mwnq- mwnq oem’am, gou caeuq geij boux baengzyoux gyaez sij faenzcieng haenx daeuj daengz singz Baksaek yawj aen dieggaeuq ginhbu Hungzcizginh. “Byaij daeuj daengz Baksaek, ndaw- sim naekdumdum, saehgonq gaej hawj lumz, ndaej coi vunz baenaj.” Gizneix dwg benq dieg hoengznding ndeu, rox ok bouxak, goujcib lai bi gonq fatseng aen saehgienh hwnjbing dwk fanjdung ginhfaz saenq mbwn saenq deih haenx, couh ok le buek doihbing lwg bouxhoj Hungzcizginh. Nga doihbing neix, doeklaeng ndaej caeuq daengx guek gak nga bing hungzginh doengzcaez haenqrengz bae dwk ginhfaz、hoenx Yizbwnj、moeb Goz- minzdangj Fanjdungbai, doiq laeb- baenz Cungguek moq miz goenglauz hungloet.

Dou ndwn youq gyang gai gaij- fanggaih ngiengx naj yawj Yezdungh Veigvanj, raen aen ranz veigvanj yiengh miz daegdiemj cienzdoengj baihnamz neix gig gaeuqgeq, baih- swix bakdou venj gaiq baizbenj hung gaek coij saw ndingfwg bitcik duh Dwng Siujbingz——“Dieggaeuq Ginhbu Cunghgoz Gunghnungz Hungzginh Ginh Daihcaet”.

Yezdungh Veigvanj bakdou hai coh baihdoeng, daj bakdou miz sam daih dienhdangz baiz haeujbae, aen dienhdangz cungqgyang guh miz cuj siengqlab Dwng Siujbingz、Cangh Yinzyiz、Veiz Bazginz daengj doengh bouxdaeuz hwnjbing aen cingzgingj haenx, cuj siengq guh ndaej lumjlili, dangq bouxvunz cingqcaen nei. Song henz dienhdangz doxdoiq lij mbe miz song coij geij hog ranz, hoghog miz bam, gwnz bam dwg diegninz doengh bouxdaeuz, lij ciuq gij yiengh yienz- laiz baij miz mbonq、denz caeuq daiz eij dem. Daengx aen veigvanj lumj aen ranzmizcienz, hwnj ndaej gyaqciq raixcaix, dienhdangz caeuq rugyouq、dieghong baij ndaej gig ndei, gwnz deih aeu cien caeuq rindiuz camh baenz, dingjranz geij faq ciengz dozveh lengjluplup haenx lij baujlouz ndaej ndeindupndup.

Dou cimyawj gij doenghyiengh doenghbaez bouxdaeuz Hungzcizginh yungh gvaq neix, cij raen yiengh- yiengh gaeuqgat, mbouj yienhda saekdi, baij youq gizde fwzliklik. Hoeng gou cix lumj yawjraen gijde lij miz hoenz ningdoengh. Fan denz de, daeb ndaej miz gok miz yiengh, dangq seizseiz bwh ndei yaek aemq okbae; aen daengmax de, gaiq gingq lij uet ngaeuzngomj；aen daiz aen eij de, lij seuqsetset, dangq haxbaenh gyoengq bouxdaeuz youq neix doxyaeng ngamq hwnq hangx okbae nei…… Gou lumj roxnyinh daengz, gij doenghyiengh neix mbouj gyoet, caemhcaiq lij miz didi gij ndangraeuj doengh bouxdaeuz Hungzcizginh.

Gou ndaejnyi bouxlaux gangj gvaq, aen Yezdungh Veigvanj neix, dwg mwh Cingciuz Genzlungz bi’nduj doengh boux vunz guh seng’eiq Guengjdoeng haenx comz ngaenz daeuj guh baenz, ciuhgonq gij vunz Guengjdoeng daeuj daengz Baksaek, cungj haengj daeuj aen gizneix gvaq haemh、 comzyouq roxnaeuz lwnh seng’eiq. Bonjlaiz, aen veigvanj bingzbingz ciengzciengz ndeu, hoeng aenvih doeklaeng miz Hungzcizginh dawz daeuj guh ginhbu, hawj de ndaej mingzdaeuz doh daengz seiqgyaiq.

Gwnz ciengz aen dienhdangz, miz banx saw genjgai Baksaek Hwnjbing. Saw genjgai raiz naeuz, Hungzcizginh bang bing neix, cungj dwg gij lwg suijsoq minzcuz Guengjsae, bi 1929 comzyouq Baksaek hwnjbing, laeb- baenz “Cunghgoz Gunghnungz Hungzginh Ginh Daihcaet”, ginhbu capyouq Yezdungh Veigvanj. Ginh- cangj Cangh Yinzyiz、cwng’veij Dwng Siujbingz daengj bouxdaeuz dazyinx gyoengq bouxbing haenq hoenx geij baez ciengq, singseiq saenqdoengh gwnzbiengz. Bi daihngeih, doihbing vihliux ndoj gvaq vunzdig humxdwk, cienj haeuj ranghdieg Guengjsae Gveicouh gapgyaiq gwq hoenx gwq bae. Caiq doeklaeng, cawjlig doihbing hwnj baihbaek gap haeuj Cunghyangh Hungzginh……

Yawj le gij genjgai neix, gou caen gingqfug doengh bouxbing Hungz- cizginh ciuhgonq. Gyoengqde miz- mbangj vunz dwg seiqseiq daihdaih guhnaz guhreih Mbanjcuengh raeuz ha! Youq aen nienzdaih haenx, raeuz gizneix bya ndoq reih fwz, gyaudoeng mbouj bienh, ginghci lotlaeng, vunzlai mbouj rox saw mbouj rox gangj Vahgun, gyoengqde dauq- daej baenzlawz ndaej rox daengz gij lijlun gwzming, caux ok cungj cing- saenz fanj apbik gouz swyouz, mbouj lau vutmingh, laemxsim daeuj camgya hungzginh ne? Gou cungj ngeix mbouj doeng.

Seizneix gou yawj daengz aen siengqlab Veiz Bazginz cangqmaengh youh baenzmbauq haenx, sim gou baez anj, rox lo! Dwg goeng neix dazson, Mbanjcuengh raeuz cij ndaej miz baenz cien baenz fanh vunz “ndiusingj”, doxcanj hwnjdaeuj fanj- doiq hakdoj bouxrwix bokgwn. Veiz Bazginz dwg lwg maenhndei Boux- cuengh raeuz. De ndaej youq Gveicouh Gyangjvujdangz hagsib gvaq, haeuj Genzginh guh canhmouz gvaq, Haj Seiq Yindung le bae Gvangjcouh Nungzminz Yindung Gyangjsizsoj hagsib, doeklaeng dauq- ma Dunghlanz fatdoengh vunzlai guh gwzming. Mbouj yungh ngeiz, fat- doengh ndaej nyaenx lai vunzguhnaz hwnjdaeuj fanj apbik moeb hakrwix, couhdwg gij goengrengz de, de caen maenh’ak ha! De yingjyangj hungloet, ndaej caeuq Mauz Cwzdungh、Bungz Bai caezcaemh heuhguh sam boux “lingjsiu nungzminz yinyung” ceiq ak guek raeuz. Geiq ndaej mbouj rox youq gizlawz raen hot fwen ndeu haenh de gvaq——“Mbanjmbanj baek geiznding, Veiz Bazginz caen ak, dawz cungq dwk bing’hak, mbwn lak cungj mbouj lau”.

Cienzgangj Veiz Bazginz mbouj- dan dwg boux guh gwzming maenh- ak ndeu, lij dwg boux canghfwen mizmingz ndeu. Neix gou saenq lo, Veiz Bazginz vunz gvai, de rox dawz gij gwzmingz lijlun daeuj bien baenz fwen, yungh singfwen bae lwnh hawj gyoengq beixnuengx vunzlai Mbanj- cuengh nyi. Doenghboux hwnjdaeuj gaenriengz Veiz Bazginz gonq haenx, hix rox ei de bien fwen bae senh- conz, sonyinx bouxgaenlaeng, yiengh- neix it daz cib, cib son bak, hawj ciencien fanhfanh vunzguhnaz comz daeuj guh gwzming. Seizneix, ndaw biengz lij riuzcienz miz di fwen gaeuq doenghbaez, mwngz dingq——

Ginhfaz daeuj aeu bing,

Cingq bae dangj cungq bauq,

Cib bae gouj mbouj dauq,

Gyoengq lwgmbauq gaej bamz.

Daengq lwnh gyoengq beix-

nuengx,

Biengz luenh hak hangz vunz,

Raeuz yaek vuenh aen mbwn,

Cij miz gwn miz daenj.

Gaej ngawz hawj vunz hangz,

Gaej bamz hawj vunz haep,

Diemj feiz youq gyang laep,

Nyungz nyaek rox sanq deuz.

Bouxhoj caez hwnjdaeuj,

Doxcaeuq dingj bouxmiz,

Moeb dicuj gaihgiz,

Raeuz cij miz nazreih.

……

Couhdwg cungj fwen ndei rox youh ndei dingq neix, vunzraeuz bouxboux gyaez guh vunzvunz maij dingq neix, hawj gij lijlun gwzming Cungguek Gungcanjdangj ndaej youq ranghdieg Mbanjcuengh vaiqriengj cienzboq, iemq haeuj uk haeuj ngviz gyoengq- vunz bae, coi gyoengqvunz laemxsim haenqrengz bae buekhoenx! Aen hingzseiq gwzming ndaej lumj feiz coemh ndoeng nei dawz hoengh- hubhub hwnjdaeuj!

Hungzcizginh laebbaenz le, youq gizneix moeb dwk fanjdung ginhfaz, singseiq hungdaih, nauh ndaej dien fan deih boek, gvaqlaeng, gyoengq bouxdaeuz doxyaeng, gietdingh hawj Veiz Bazginz daiqlingx dingz vunz ndeu louz youq dieggoek henz Dah- yougyangh dingj caeuq vunzdig lingzvued doxdwk, cawjlig doihbing yamq ok bonjdieg, senjdin hwnj baihbaek, youq rangh Guengjsae、Gveicouh、Guengjdoeng、Huznanz、Gyanghsih bien’gyaiq hoenx bae hoenx dauq, senj bae fanh lai leix gyae, bi 1931 bae daengz Cunghyangh Suhgih, ndaej bien haeuj Hungz Sam Ginhdonz. Buek bing neix doeklaeng hoenx daengz gizlawz hingz daengz gizlawz, baenz aen budui maenh’ak dangj raeuz. Hoeng, Veiz Bazginz gag daiq dingz bing ndeu louz youq bonjdieg laebdaeb caeuq vunzdig dwkhoenx, bi 1932 ndwen 10 ngoenz 19 boihseiz deng lajfwngz boux fanjgoet gaj dai.

Aen Yezdungh Veigvanj Baksaek neix, gyoengq bouxdaeuz Hungzciz- ginh youq gvaq, de ndaej guh cingq- saed gwzmingz saeknding ginggvaq geijlai gannanz haemzhoj. Dou ngoenzneix cimhra gij rizdin Hungz- cizginh, rox aeueiq doenghboux guh senhconz gwzming banlaux, rox bae gingq doengh bouxdaeuz hwnjbing banlaux, soengzbaiq gyoengq boux- bing Hungzcizginh banlaux, yaek ciepswnj gij cingsaenz gwzming gyoengqde, caeuq daengx guek lwg- minz doxcaez laebdaeb roengzrengz bae buekguh, hawj Cunghvaz Minzcuz raeuz ndaej fukhwng hwnjdaeuj, ronghlwenq youq gwnz biengz!