Rox? Rox maz? De gaenbonj couh mbouj rox doeklaeng song bi—— Mbouj, mbouj daengz bi ndeu sim Siu Cuh couh bienq lo, gingqyienz dam ngaenz, haq hawj Ah Gwnh, suenq maz cingz lumj haij laeg mbouj rox bienq? Gangj maz song sim doxnem mbouj rox faen?

Lungz Byauh ninz youq gwnz congz ngeix bae ngeix dauq, yaep ndeu haemz Siu Cuh haeuj ndok, yaep ndeu youh gyaez Siu Cuh haeuj sim, hix mbouj rox dwg hanh roxnaeuz raemxda, hawj aen swiz gaeuq caet saekhoengz haenx bienq ndaej niunwknwk caemhcaiq dumzdwddwd.

“Lungz Byauh, hwnqdaeuj gwn di doxgaiq ba!” Daxmeh de youq henz congz heuh.

“Gou mbouj siengj gwn.”

“Mwngz ninz ngoenz ndeu lo, mbouj gwn doxgaiq baenzlawz ndaej?”

“Gou cij siengj ninz, meh, geij ngoenz neix gou byaij roen dauqma baeg lai lo.”

“Ai!”

Daxmeh bibi gyaeuj, danqheiq byaij ok rug lo, byawz beij daxmeh lij rox daeglwg, de baenzlawz mbouj rox gij simsaeh daeglwg? Seizneix ranz Cinz Dayenz bouxhek rim ranz, cenj laeuj doxcienq, vih lan daihcib ndaej rim ndwen baij laeuj goenghoh, nauhyied dangqmaz! Danghnaeuz mbouj dwg aenvih dajsou mbouj ndei, ranz de itdingh youq laj gofaexnganx rog douhung dap aen daizheiq, eu ndaej sam hwnz sam ngoenz, aiq seizneix gaenq bongx gyong roq laz, sing fwen rim rwz hwnj mbwn bae lo ne!

Ngeix bae ngeix dauq, Lungz Byauh cungj vut mbouj ndaej gij cingzeiq doiq Siu Cuh, ciuh vunz neix de aeu mbouj ndaej Siu Cuh guh yah, roxnyinh uengjfeiq daengz gwnzbiengz baez he lo, hoeng seizneix gaenq baenzneix lo, de youh miz maz rengz bae doxdingj ne?

Mbwn menhmenh laep lo, gwnz dingjranz yienh’ok aen conghcueng bohliz iq he, dwg aenvih ndaw rug laepngaungau cij yienh okdaeuj.

Sawqmwh, aen conghcueng daez- singj de lo, de nyaenx gij saeh simnyap bae, caemdingh roengzdaeuj, ninz ndaek guh fangzhwnz lo.

(caengz sat)