Sai:

Daj raen daengz nuengx gim,

Ndawsim gou caen angq,

Gag siengj dawz gim bangj,

Mbouj gamj gangj mwngz nyi.

Mbwk:

Daj raen daengz mwngz ngaenz,

Fangzhwnz go daeuj coh,

Raen fajnaj cingcuj,

Daeuj gangjgoj angqyangz.

Sai:

Loqraen nuengx diuqfoux,

Iet fwngz daeuj iu gou,

Naeuz mbouj rox gaej you,

Daengzseiz raeuz caemh angq.

Mbwk:

Ngoenzngoenz bae guhhong,

Baez ndaej hoengq couh ngeix,

Ndaej mbouj ndaej caeuq beix,

Caezcaemh ngeix ndwenngoenz.

Sai:

Haetnaengz bae dwk gaeq,

Youh gag geiq mwngz ngaenz,

Ngaeuz mwngz ngoenzngoenz

raen,

Ndawsim haenh dangqmaz.

Mbwk:

Haemhnaengz cim caenh fanz,

Lwgda caen mbouj ca,

Nuengx gim lumj dujva,

Gou mbaet ma lawzyiengh?

Sai:

Baihrog va miz lai,

Dujduj hai lengjlet,

Mwngz gaej luenh bae cet,

Ngaenz detlet mbouj gyaez.

Mbwk:

Gim gyaez gou hix gyaez,

Daeuj caez gvaq ciuhvunz,

Ninz gwnz oen hix nyienh,

Sim mbouj bienq dahraix.

Sai:

Ngaenz gyaez gou hix gyaez,

Ndaej doengzcaez haenqguh,

Couhsuenq nduj dwgrengz,

Mauhgungz deng raeuz vut.

Hab:

Ngaenz gim caemh doxmaij,

Doengzcaez byaij diuz roen,

Yamqyamq byaij ndaej onj,

Aen suenranz engq gyaeu.