Ndwen 8 ngoenz 20 banhaemh, langhbaij cozbinj yisuz daizheiq maenhndei Guengjsae angqhoh Cungguek Gungcanjdangj laebbaenz 100 hopbi “ciengxlwenx riengz dangj byaij” nem gaiq daih cib’it Guengjsae langhbaij heiq hozdung heiqmoeg camyienj——Heiqcuengh daihneix 《Suhgi Daih’it》 youz Swcigih Dangjveij Senhconzbu、Swcigih Vwnzva Caeuq Lijyouz Dingh cawjbanh haenx youq Namzningz yienj.

Heiqcuengh 《Suhgi Daih’it》 youz Aen Heiqyienh Guengjsae cauhguh yienjok. Bouh heiq neix yungh Swcigih Dangjveij senjbaij ganbu maenhndei daengz mbanj gungzhoj guh suhgi daih’it guh giek, lwnhgangj gij gojgaeq hawj vunz gamjdoengh meh bozsw Liuz Yingz roengz daengz lajmbanj, roengzrengz gaijgwz、ginggvaq haemzhoj，doeklaeng daiq vunzlai byaij ok diuz roen canjnieb banggungz ndaej laebdaeb hwngfat ndeu, langhbaij gij cingsaenz buekguh、cingsaenz guh ok gungcanjdangjyenz seizdaih moq caeuq gij cingzcik ndei Guengjsae vutgungz gunggeng.

Vunz yiengh ndei、gojgaeq sengdoengh、miz daegsaek Mbanjcuengh, bouh heiq neix daj daujyenj、bienheiq、raizbuj daengz bouxyienj, cungj dwg bouxguhhong vwnzyi bonjdieg Guengjsae, baujmaenh miz daegsaek Heiqcuengh doengzseiz, gyahaeuj gij yenzsu, seizhwng yienjok cingzgamj naekna hawj engqlai vunz roxnaj gij simnaemj suhgi daih’it, hawj vunzlai gamjdoengh.

(Cinz Vwnz)