Mbanjmyauz Miz Sau Ndei

Mbanjdabauz dwg Yungzanh Yen Cangzanh Cin Anhningz Cunh 7 aen mbanj ndawde aen mbanj Myauzcuz dog. Ndawmbanj miz 122 hoh 415 vunz, cungj dwg vunz Myauzcuz liux. Gij ranz ndawmbanj cungj dwg ranzfaex lai, hwnq youq bangx bya henz raemx.

Liengz Yaujvah daih vunz ndei bouxvunz cix yiedcingz, ranz de youq laeng Mbanjdabauz. “Laeuz Vah Mingz” dwg ganranz Liengz Yaujvah caeuq Fung Siujmingz gag guh haenx, couh hwnq youq gwnz byongh bya. Giz de raen ndit ndei, bya sangnengneng、faex heusausau, Dahsiveiz riuz dwk dinghcubcub.

Doiq gvanbaz neix yien fwngz hoenx gungzhoj, youq Mbanjmyauz ciengqok hot fwen vuenyungz, gij goj neix deng vunz haenh raixcaix.

Liengz Yaujvah dwg dahsau Myauzcuz daj Mbanjdadon Yungzsuij Myauzcuz Swciyen Anhcuiz Yangh haq daengz gizneix. De daj lij iq couh rox eu fwen diuq foux. Gij Myauzcuz conzdungj fwen foux lumjbaenz doxdax boq venz、caij godangz、ciengq dohyeh、fwen daengjroen、fwen gingqlaeuj daengj de cungj hag caez liux. Baez daengz cietmangzhauh、 sam nyied cosam、loeg nyied coloeg daengj, Liengz Yaujvah caeuq dahbiz、dahgemj（Vahmyauz: Dahsau、daegmbauq）ndawmbanj cungj eu fwen diuq foux bae coux ciet.

Dahsau Myauzcuz cungj maij gyaeu, Liengz Yaujvah 7 bi couh hag gij dinfwngz siuq va lo, bouxvunz de sim gvai fwngz soem, 14 bi couh rox daemj baengz. De aeu sienq lai saek youq gij baengzgyaeuj siuq gova、go’nywj、duzbya、duznon、duznyaen、duzroeg daengj doz; aeu bwnnyungz caeb guh baenz nyop baenz nyop iq, caiq con gyap haeuxlidlu、caw iq hwnjbae; doeklaeng cij youq genbuh、baihlaeng、dinbuh、 diuzsai daengj siuq roxnaeuz venj doenghgij dox- gaiq neix hwnjbae. De ngamq 16 bi couh ndaej daenj gij buh duzroeg de gag siuq lo, gij doz diuz buh de boiq ndaej gig ndei, lai saek camca, lij miz bwnnyungz hau dajcang dem.

Liengz Yaujvah dwg bouxciep- cienz gij dinfwngz siuq va Myauzcuz. De gag ndaem faiq daemj baengz. Gij buhvaq、aenbau、aendaeh、gouhhaiz baeznaengz yungh haenx, de cungj baez cim baez cim naeksim siuq doxgaiq hwnjbae. De dawz ndwen- ngoenz siuq hwnj gwnz buhvaq bae, gvaqok le gij daegsaek Myauzcuz.

Nyienh Ciepcienz Vwnzva

Bibi liggaeuq ndwencieng cogouj, sing venz couh youq Mbanjdabauz yiengj hwnjdaeuj. Seizde Liengz Yaujvah couh bang dahlwg de daenj diuz buh duzroeg Liengz Yaujvah gag nyib haenx, bang de daep ndei gaiqcanggyaeuj ngaenz. Ndaej le, lwg de couh caeuq dahsau wnq humx diuzsaeu gvangjcangz sim’angq diuq foux.

Ngoenzde couhdwg cietmangz- hauh, de dwg aen ciet bi ndeu ceiq hunghoengh Mbanjdabauz. Gyoengq- vunz ceiq maij “mangzhauh” gouz fuk. Gyoengq bouxcoz cang guh “mangzhauh” (vunzgyax), deq vunz mbouj haeujsim, couh mad mij haeuj fajnaj bouxhek bae, neix dwg hawj bouxhek soengq fuk, dingqnaeuz yienghneix guh gij seizheiq bouxhek baenz bi cungj ndei.

Cienzgangj, youq dieg de “mangzhauh” dwg boux saenz mizfuk ndeu. Foux mangzhauh caeuq foux caijdinvenz dwg daj gij biujyienj doenghbaez cojgoeng Myauzcuz vih caenh duznyaen caeuq bouxcaeg bienqdaeuj. Cojgoeng Myauzcuz youq ndawndoeng doekfwz youq, seiqhenz mbouj miz gijmaz vunz, ciengzseiz miz duznyaen daeuj gwn doenghgo, youh miz caeg daeuj caeg、ciengj doxgaiq. Vunz Myauzcuz siengj le haujlai banhfap cungj guh mbouj hingz. Doeklaeng, couh aeu naeng faex geq ma guh mauhngeg, aeu go’em guh liuq, youq ndwencieng cogouj ngoenz- de, gyoengq bouxcoz couh daep mauhngeg、daenj liuq, mad mij haeuj fajnaj fajfwngz bae, cangguh “boux- mangzhauh”, diuq fouxmangzhauh. Duznyaen caeuq bouxcaeg laihnaeuz dwg bouxsaenz daeuj ndawbiengz couh hwk dwk buetdeuz sadsad. Baezlaeng, caenh miz duznyaen bouxcaeg daeuj, vunzmbanj couh guh yienghneix bae haep gyoengqde lo.

Vunzmbanj lij aeu faexcuk guh aenvenz, boq venz caenh bouxcaeg duznyaen deuz bae, caiq naeuz yienghneix caemh ndaej bangx deuz gij bingh nanh. Fouxmangzhauh caeuq fouxcaijdinvenz dwg gij foux Myauzcuz gag miz haenx, daj ciuhgeq cienz daengz seizneix, doeklaeng couh bienqbaenz aen ciet conzdungj Mbanjmyauz, daiq miz gij eiqsei hawj bi moq hohfuk, dwg gij rinvaqsiz lix vwnzva cienzdoengj dieg de.

Gotumj Ndwenngoenz Moq

“Gou daj lij iq youq gizneix majhung, gig maij gij doxgaiq ndawmbanj.” Liengz Yaujvah naeuz, de daj Mbanjgizhingh haq daengz Mbanjdabauz, cawzok Fung Siujmingz caensim gouz aeuyah, lij aenvih songde cungj miz sim bae ciepcienz vwnzva Myauzcuz, cungj siengj duet- gungz baenzmiz.

Bi 1998 seizcin, Liengz Yaujvah couh haq hawj Fung Siujmingz. Baez- laeng guh gijmaz saeh cungj miz vunz caeuq rap lo.

Doeklaeng songde seng le seiq boux lwgngez. Saedceij gvaq ndaej bingzciengz youh hojndoq. Gvanbaz lij “vut lwg” okrog dajgoeng gvaq, buekmingh ra cienz ciengx gya. Hoeng aenvih gvanbaz cungj mbouj rox saw, rom mbouj ndaej gijmaz ngaenz, ndigah ndawranz lij gvaq ndaej gig gungzhoj.

Bi 2015, guek raeuz cienzmienh haiguh gij hong banggungz, Mbanj- dabauz aeu aendangj gensez dazyinx、bouxak daiqdaeuz、cizdij hwngfat daengj guh ndei gij hong neix.

Mbanjdabauz ndoengfaex daengj- byoengbyoeng、dah rij cix lai, gingjsaek gyaeundei, bi 2017 daengz 2019, guekgya caeuq cwngfuj dieg de douz le haujlai ngaenz vat bya guh roen, hawj ndawmbanj coih le diuz roen raez 10 geij goengleix ndeu doeng daengz yienhsingz, hwnq le funghyijgyauz、laeuzbanhgoeng、minz- cuz gvangjcangz daengj. Gij canjnieb lijyouz ndawmbanj couh hainduj hwngfat hoenghhwd.

Ndaem faexsamoeg caeuq guh vwnzva lijyouz hawj vunzlai dieg de demsou duetgungz, lumjbaenz gvaq cietmangzhauh. Mbanjdabauz gvaq ciet itbuen guh: Cang mangzhauh gouz fuk、diuq fouxcaijdinvenz、gwn ngaizbakranz daengj hozdung, caiq baij daiz gai gij huq miz daegsaek dieg de, daengz liggaeuq loeg nyied coloeg lij gvaq cietdwkbya, bi ndeu cungj miz 3 fanh lai boux hekyouz daeuj guhcaemz.

“Cwngfuj douz le 100 fanh maenz hawj raeuz coih ranzgaeuq ranzvaih, hawj vunzmbanj miz ranzndei youq. ” Liengz Yaujvah gikdoengh dwk naeuz. Ranz de gaxgonq iqetet、gaeuqgatgat, cegceg cakcak youh laeuh raemx dem, moix boux vunz cungj faen mbouj daengz 12 bingzfueng. Seizneix cwngfuj hawj ngaenz vunz coih ranz, ranz de hwnq le aen ranzgyan hung 280 bingzfueng ndeu. De youh hai le nungzgyahloz, ndaej gwn gij “haeux- lijyouz”, dajneix couh baenzmiz coh siujgangh lo.

Liengz Yaujvah hawj aen ranz de ancoh guh “Laeuz Vah Mingz”, maqmuengh ndwenngoenz gvaq ndaej gyaeundei lumj dujva. Raen vunz- mbanj guh lijyouz guh ndaej gwn, de caemh youq it laeuz hai aen diemq gai gijgwn, ngeih laeuz cix gaij guh ranzyouq hawj hekyouz youq. “Bi’gvaq gag dajcawj gai gijgwn couh canh le 3 fanh lai maenz ngaenz, baez nyaengq hwnjdaeuj, aenngoenz caenh youq henzcauq cienqluetluet, hoeng saedceij yied daeuj yied miz muengh lo.” De sim’angq dwk gangj.

Gyawj geij bi neix, Yungzanh Yen nyinhcaen guhsaed gij vah Siz Ginbingz cungjsuhgi, aeu gij youhsi “raemxsaw byaheu couhdwg byagim bya’ngaenz” haivat gij swhyenz faex- samoeg caeuq minzcuz vwnzva Mbanjdabauz, guh lai cungj cietheiq hozdung, ndawde cawjdaeuz guh cietmangzhauh、sam nyied cosam、cietdwkbya daengj ciet, ciepcienz caeuq hwngfat vwnzva raeuz, dawz aen canjnieb lijyouz guh’ok daegsaek daeuj, vih hwngfat ginghci dieg de dwk fwnz coengh rengz.