Seiq

Gangj daengz Goengdaeuzmbanj Mungz Hijdungh, gyoengq vunzmbanj bouxboux cungj miz vah gangj.

Daeggvan Vangz Yibinh ga’gvez, byaij roen mbouj fuengbienh, haujlai saeh cungj dwg Vangz Yibinh boux ndeu gag guh, hoeng de hwetboiq, guh mbouj ndaej hong naek, ndawranz gungzhoj dangqmaz. Baenzlawz bang ranz neix hawj gyoengqde miz souhaeuj ni, Mungz Hijdungh siengj bae siengj dauq, doeklaeng de ok ngaenz cawx song duz cwzmeh hawj Vangz Yibinh ciengx, naeuz daengz seiz gai cwzlwg ndaej ngaenz le caiq boiz ngaenzgoek.

Haemh ndeu byonghhwnz, duz cwzmeh Vangz Yibinh yaek roengz lwg lo, youq ndaw riengh gvih hwnj youh ninz roengz, ninz roengz youh ndwn hwnj. Yaep ndeu, song ndaek galaeng cwzlwg conh okdaeuj lo.

Vangz Yibinh rox, seng lwg dwg aen gyaeuj okdaeuj gonq cij deng, seizneix dwg ga okdaeuj gonq, mbouj dwg saehndei, gvaq le haujlai nanz, cwzlwg cungj caengz seng roengz- daeuj, Vangz Yibinh vueng lo, de naemj bae ra vunz daeuj bang, ngamq ok bakdou couh bungz Mungz Hijdungh. Mungz Hijdungh ngamq bae haihoih doxdauq, de mbouj gangj lai coenz, gaen Vangz Yibinh bae yawj. Mungz Hijdungh daeuj daengz henz cwzmeh, de lumhlumh aen conghnyouh duz cwzmeh yaep he, cwzlwg couh seng okdaeuj lo.

Seizhaenx Vangz Yibinh gag naemj: Vunzgeq naeuz “bouxhuk song fwngz goemq ced vaiz mbouj dawz”, raeuz caen dwg dahraix lo, duz cwz seng lwg mbouj daeuj raeuz cij rox gip ndwi, maz cungj mbouj rox guh. Caeklaiq miz goengdaeuzmbanj Mungz Hijdungh, mboujnex, lau duz cwzmeh hix dai bae bw!

Ndaw mbanj Vangz Yungjginh dwg ranz gungzhoj, de doegsaw noix, mbouj gamj okrog bae dajgoeng, samcib bi lo caengz aeu ndaej baz. Mungz Hijdungh raen de miz rengz, couh heuh de hwnj ndoi bae haifwz ndaem mak. Vangz Yungjginh mbouj rox baenzlawz guh, geij ngoenz mbouj gamj okdou.

Mungz Hijdungh naeuz:“Mwngz hwnj ndoi bae gvej nya gvej haz hai reih okdaeuj gonq, gou caiq son mwngz baenzlawz ndaem.”

Gvaqlaeng, Mungz Hijdungh heuh vunzmbanj bae bang Vangz Yungjginh vat gumz mak, de bae baihrog lienzhaeh aeu din mak, cingj vunz daeuj son Vangz Yungjginh baenzlawz ndaem mak、baenzlawz guenj mak. Seizneix ranz Vangz Yungjginh gaenq miz geijcib moux makdoengj, bibi miz souhaeuj, hix aeu ndaej baz lo.

Vangz Yungjginh naeuz:“Dangh- naeuz ngoenzgonq mbouj miz goeng- daeuzmbanj Mungz Hijdungh buet hwnj buet roengz bang gou, gou couh mbouj miz ngoenzneix lo.”

Geijcib bi neix daeuj, vunz ndaw mbanj ranzranz ndaej goengdaeuz- mbanj Mungz Hijdungh bang gvaq. De naeuz de dwg boux gungcanjdangjyenz ndeu, guh saeh aeu naemj daengz saeh boux wnq gonq, vih vunzmbanj guh saehsaed.

Haj

Baezneix goengdaeuzmbanj Mungz Hijdungh lij ndaej vunzmbanj senj de dang daeuzmbanj. Mehyah de hozndat lo, naeuz:“Guh guh guh, gou bae ranz duh gou, hawj mwngz guh.” De doq damzbyoedbyoed doq buet dauqbae lo.

Mungz Hijdungh doeklaeng hwnjdaiz bae gangjvah seiz, naeuz:“Daihgya lij senj gou dang daeuz- mbanj, couh aeu dingq gou gangj vah bw, gou caeux couh miz aen loqsiengj ndeu, aen loqsiengj neix aeu daihgya doengzsim roengzrengz guh cij ndaej. Ngoenzlaeng gou couh guh gienh saeh neix, muengh vunzmbanj cungj roengzsim gaen gou guh.”

Mungz Hijdungh naemj guh maz saeh, de mbouj gangj okdaeuj, nyex ndaej vunzlai lwnhbyaengbyaeng, nanznanz mbouj siengj dauq baema.

Laxlawz, baihgwnz gaenq miz saw roengzdaeuj, heuh gyoengqvunz Mbanjgozgungj laebguh lajmbanj moq seveicujyi. Couhdwg dawz gij ranz gaeuq lingh cang baenz moq bae, aen ranz lawz hab doemq couh doemq, aen ranz lawz hab daet couh daet, aen mbanj baihswix daengz baihgvaz, baihgwnz daengz baihlaj aeu miz roen doeng, aeu hawj ciiq ndaej youq ndaw mbanj hai bae hai dauq. Gizlawz hab ndaem va couh ndaem va, gizlawz hab ndaem faex hix ndaem faex, doihduz aeu beuj bae giz ndeu ciengx, ranz dajcawj、ranz diengzhaex aeu guh doxdoengz bae.

Mbanj hung vunz lai, naemj guh ndei gienh saeh neix, gangj dwg yungzheih guh couh nanz lo. Mungz Hijdungh yied naemj yied sieng uk. Baezneix ndei lo, daihgya youh senj de dang daeuzmbanj, bouxboux cungj naeuz dingq de gangj vah, seizneix vunzlai gaenq vah gangj okbak, mbouj lau guh mbouj roengzbae.

Ciepdaeuj, Mungz Hijdungh heuh vunz mbanj haihoih, gangj gienh saeh neix hawj vunzlai dingq, vunz ndaw mbanj hemq hwnjdaeuj lo.

Miz mbangj boux naeuz:“Baez- neix mbanj raeuz bienq ndaej engq gyaeundei lo.”

Mizmbangj naeuz:“Doemq deng ranz gou baenzlawz guh?”

Mungz Hijdungh dingq daengz gij vah neix, gag raen ndeiriu. De heuh gij vunz deng doemq ranz caeuq gij vunz deng daet ranz haenx youh gag hai baez hoih ndeu.

Mungz Hijdungh naeuz:“Deng daet ranz hix ndaej, deng doemq ranz hix ndaej, baihgwnz cungj miz ngaenzbouj hawj sou, baihgwnz baij vunz daeuj gujsuenq, hab bouj geijlai couh bouj geijlai, sou mbouj ceng mbouj nauh couh baenz.”

Dingq daengz deng cek ranz caeuq deng daet ranz lij miz ngaenzbouj, daihgya cungj mbouj guhsing lo.

Haihong lo, cigouhgih、cidoinamh hwnjhwnj roengzroengz, ciragnamh、cidaehrin baebae dauqdauq, ndaw mbanj nauhyied humhum.

Aen ranz Aucan sam caengz, bi’gvaq ngamq guh baenz, ranz hwnj youq gyang mbanj. Ciuq aen doz laebguh lajmbanj moq seveicujyi daeuj dingh, aen ranz neix deng daet bae donh he, baenzlawz guh ni? Mungz Hijdungh youh roxnyinh sieng uk.

Mungz Hijdungh daengz ranz bae caeuq Aucan doxyaeng. Aucan naeuz:“Ranz ngamq guh baenz, youq ndawranz ninz ndang lij caengz raeuj dem, seizneix couh deng daet bae lo, gou sim’in.”

Ranz baihlaeng Aucan dwg aen suenbyaek Mungz Hijdungh. Mungz Hijdungh naeuz:“Guh baenz aen ranz mbouj yungzheih, aen sim mwngz gou rox, seizneix raeuz aeu yawj bae gyae di, guh ndei lajmbanj moq, seizneix ndeiyawj, daihlaeng miz’ik. Yiengh- neix ba, ranz mwngz deng daet bae geijlai, gou veh suenbyaek gou bouj dieg hawj mwngz. Daengz seizhaenx baihgwn bouj ngaenz doemq ranz hawj mwngz le, mwngz lingh hwnj hix miz dieg.”

Seizneix dwg gencueg euj mbouj gvaq goekga, youh ndaej Mungz Hijdungh baenzneix gangj, Aucan doengzeiq daet ranz lo.

Saeh ndaw mbanj ndaej gej ndei lo, ndawranz youh ok saeh lo. Mehyah Mungz Hijdungh nauh doxliz, de naeuz Mungz Hijdungh miz ngaenz miz cienz couh ciq hawj vunz, miz goet miz rengz couh bae bang vunz, seizneix miz di suenbyaek ndeu hix aeu bae soengq hawj vunz. Yienghneix roengzbae, aen ranz neix maz cungj mbouj miz lo, doxliz le de gag gwn gag youq, raemx cingj mbouj famh raemx dah, caih Mungz Hijdungh guh vang guh raeh.

Mungz Hijdungh rox, geijcib bi neix, de doiq mbouj gvaq mehyah, doiq mbouj gvaq aen ranz neix, engq doiq mbouj gvaq song daeglwg. De dwg boux daeuzmbanj ndeu, miz haujlai saeh mbouj yienghneix guh mbouj ndaej, bang ndaej vunzmbanj youh bang mbouj ndaej ndawranz. Seizneix mehyah nauh doxliz, de mbouj miz vah gangj lo, mehyah naeuz doxliz couh doxliz lo.

Mungz Hijdungh caeuq mehyah bae minzcwnggiz banh doxliz ngoenzde, song daeglwg youq baihrog guhhong, ganj dauq lo. Gyonegqde boux he rag daxboh, boux he rag daxmeh, guhdoih dauq daengz ranz. Daegdaih naeuz:“Doxliz doxliz, yaek ndaej roekcib bi lo, lij nauh doxliz, sou mbouj raen vutnaj ha!”

Daegngeih naeuz daxmeh:“Daxboh yienghneix guh hix dwg vih vunzmbanj ndei, vih daengx mbanj ndei, mbanj raeuz ndei, ranz raeuz couh ndei, raeuz sied di miz maz?”

Caen dwg gukboh mbouj seng lwg lazbangh, goenq faexyienq mbouj maj go faexvangh ha! Mungz Hijdungh roxnyinh song daeglwg majhung lo, hix rox naemj saehcingz lo, de ndawsim caegcaeg angq.

（sat）