Yungzsuij Myauzcuz Swciyen daj son’gyauq lizsij aendangj dox- daeuj, aeu lai cungj fuengfap moq bang gyoengq dangjyenz liuzdung hag lizsij aendangj.

Aen yienh neix laebbaenz doengh aen cujciz dangjyenz liuzdung. Gak aen gihcwngz dangjcujciz haeuj mbanj haeuj ranz、dwk denva daengj, gaenx- maenx bae mo cingcuj gij cingzgvang dangjyenz youq baihrog doegsaw、guhhong haenx. Daengx yienh seizneix gungh miz 1500 lai boux dangjyenz liuzdung, gaenq gvihaeuj gak mbanj dangjcihbu liuzdung bae lo. Dangj- cihbu dinghgeiz caeuq gyoengqde gyauhliuz, camcam gij siengjfap caeuq ndwenngoenz gyoengqde, bauj- maenh dangjyenz gibseiz hag lizsij aendangj.

Yienh de lij guh bingzdaiz hawj gyoengq dangjyenz sonhag lizsij aendangj. Daengx yienh gak gihcwngz dangjcujciz hai QQ、veihsin ginz dangjyenz liuzdung, dinghgeiz fat gij dajsuenq moix ndwen、gij sibinz caeuq mbawdoz hozdung daengj, gyoengq dangjyenz caemh youq ndawginz lwnh goj aendangj, gangjgangj gyoengqde dwg baenzlawz siengj. Yienh de caiq dazyinx gyoengq dangjyenz youq “Hagsib Guekak”、 Gvangjsih Ganbu Vangjloz Yozyen、“Yungzsuij Fatbouh” daengj bingzdaiz gwnzde hagsib.

Yienh de caemhcaiq gyamaenh gij makbaenz sonhag lizsij aendangj. Dangjcujciz dingh 《Gij Lizsij Cungh- goz Gungcanjdangj》 daengj 4 bonj saw hawj gyoengqvunz hagsib, dingh- geiz anhbaiz “cozyez”: Moix ndwen cungj aeu hawj dangjcujciz veibau swhsiengj cingzgvang. Caemhcaiq mbouj dingh seiz guh hozdung ciengjdap gij cihsiz lizsij aendangj daengj.

Yungzsuij couhdwg yienghneix bae coicaenh gij dangjyenz liuzdung “liz ranz mbouj liz hag”“guhhong mbouj nguh hag”, hawj dangjyenz liuzdung youq baihrog hag lizsij aendangj mbouj lotdoih.

(Vuz Cincuh Cinz Cunghdwz Vuz Cenzcinh / 吴进初 陈忠德 吴全真)