Vih vatcimh、swnjcienz caeuq baujhoh vwnzva vahgangj cienzdoengj Bouxcuengh, mboengqneix, aen hoih haiguh hanghmoeg 《Cwkyo Vwnzva Vahgangj Minzcuz Vunznoix Gvangjsih·Vahcuengh Vujmingz》 youq Nanzningz Si Vujmingz Gih hai, neix dwg naeuz aen hanghmoeg cwkyo Vahcuengh Vujmingz 3 aen sawqdiemj danhvei cwkyo vwnzva vahgangj minzcuz vunznoix Gvangjsih ndawde aen ndeu cingqsik haiguh.

Hong cwkyo vwnzva vahgangj Bouxcuengh Vujmingz Gih, yaek doenggvaq dungjcouz feihvuzciz vwnzva yizcanj、roengz mbanj diuhcaz、vwnzva swnghdai boujhoh daengj hingzsik, daj ranzcanx Bouxcuengh、hongdawz ngoenzyungh、ndangdaenj、gijgwn、dinfwngz guhhong、hozdung ngoenznaengz、aeubawx baehaq guhsang、ngoenz- ciet、eu fwen daengj lai fuengmienh langhbaij vwnzva Bouxcuengh, aeu gij doxgaiq caeuq gyoengqde doxgven haenx yungh doz faenz sibinz daengj ciengxlwenx geiqloeg roengzdaeuj, neix dwg engq haeujlaeg engq cienzmienh bae ciengjgouq diucaz caeuq baujhoh vwnzva Bouxcuengh. Gwnz hoih, aen cuj lauxhangz swcigih gejnaeuz guh swzdiuz neiyungz diucaz cwkyo vwnzva vahgangj Bouxcuengh, doiq guh ndei hong diucaz daezok yigen, bouxvunz camgya hai hoih ciuq baenzlawz guh ndei swzdiuz souloeg doxgyau gangjgoj.

Ciuq cam rox, seizneix Vujmingz haenqrengz daj “sam aen laebndei” boiqhab Gvangjsih Minzcuz Yijvwnz Yenzgiu Cunghsinh guh ndei hong diucaz swzdiuz cwkyo vwnzva： Laebndei cujciz lingjdauj; laebndei aen doih vunz diucaz； laebndei aen gihci guhhong.

(Vujmingz Gih Minzcunghgiz)