Aen hahdingz deng faex raemh dwk, yaep raen yaep mbouj raen, faqciengz gaek rim Sawnanz, neix hawj ganranz bienq ndaej engq vwnzyi lo. Haujlai hoh bakdou cungj dingz miz ci iq……Gicej baez byaijhaeuj Mbanjvuhdouz couh yawjraen gij gingjsiengq neix.

Dunghhingh Si Gyanghbingz Cin Mbanjvuhdouz dwg sam aen dauj (Vuhdouz、Sanhsinh、Gunghsizveij) gizdieg Ginghcuz guek raeuz comzyouq haenx ndawde aen ndeu. De caeuq Yeznanz caenh gek aen haij ndeu, daengx mbanj miz 2225 vunz, ndawde vunz Ginghcuz ciemq 98%. Yonj Aihingh dwg bouxcihsuh Mbanjvuhdouz, de gaisau naeuz, daihgaiq 16 sigi codaeuz (ciuq coenz vah ndaw《Go Lizsij Ginghcuz》“Hungzsun sam bi, goengcoj banh daengz Fuzging”, couhdwg goengh- yenz bi 1511), goengcoj Ginghcuz couh bae sam aen dauj Ginghcuz dinghyouq, baengh dwkbya gvaq ndwenngoenz, bienqbaenz guek raeuz aen siujsoq minzcuz gag baengh dwkbya gvaq ndwenngoenz ndeu. 20 sigi roek caet cib nienzdaih, Dunghhingh humx raiq guh naz, sam aen dauj couh lienz guh rangh ndeu. Seizneix Ginghcuz gaenq bienqbaenz gij siujsoq minzcuz ceiq fouqmiz daengx guek ndawde aen ndeu.

“Gingh” Dauj Hwngfat

Bienqfouq Miz Roenloh

Cungguek moq laebbaenz, dangj caeuq cwngfuj bangcoh sam aen dauj Ginghcuz doekgungx haenx humx raiq guh naz, gij cwngci、ginghci、saedceij dieg neix bienqvaq gig hungloet. Aen cingj gaeuqgeq ndaw Cangzsoudingz couh yawjraen gij ndwenngoenz vunz Mbanjvuhdouz daj hojndoq doengh- baez bienq baenz vuenyungz ngoenz- neix. “Mwh dou lij iq, ranzranz hohhoh cungj aeu byaij baenz geij goengleix daengz gizneix rap raemx ma yungh. Dangj caeuq cwngfuj gvansim bangcoh dou, bi 2001 ndawmbanj couh ciep le raemx- suijcangj ma gwn.” Hoz Lingz boux fucihsuh Dangjcihbu ndawmbanj yienghneix lwnh.

Bi 1998, Hoz Lingz ndaej senj guh yinzda daibyauj daengx guek, bi 2005 doxdaeuj de lienzdaemh sam bi ndaej senj guh cunhcujyin, bi 2017 cix ndaej senj guh bouxdaibyauj bae camgya Cibgouj Daih Aendangj. Mwh lij caengz dang cunhcujyin seiz, de gag vat daemz ciengx gungq, hai cangj gyagoeng haijcez, bonjfaenh sien fouqmiz gaxgonq. Ndaej senj guh bouxdaibyauj yinzda le, Hoz Lingz siengj ndaej engq gyae lo. Mbanj- vuhdouz gyawj haij, de caeuq gij ganbu “song veij” ndawmbanj couh aeu reihnaz vunzlai yinx vunz daeuj douzcienz guh seng’eiq, ndawmbanj baez di baez di hai le 40 lai aen cangj, gyagoeng gij huq ndawhaij, haivat le 3800 lai moux guh daemz ciengx gungq, aen habbau vunzmbanj menhmenh moj hwnjdaeuj lo. Daengz bi 2016, Mbanjvuhdouz moix vunz bingzyaenz souhaeuj 13220 maenz, bienqbaenz Fangzcwngzgangj Si aen mbanj ceiq fouqmiz ndeu.

Geij bi neix doxdaeuj, aen mbanj neix youh aeu “nungzyez caeuq sanghyez giethab, ciengx、dwk、gyagoeng caez guh” hwngfat ginghci, hwnqguh “aen mbanj miz daegsaek” haenx, hawj vunzmbanj demsou. Mbanj de lij guh “aen gunghcwngz baenzmiz 3331”, couhdwg boux- guhhong daengx mbanj miz 30% bae dwkbya, 30% youq gwnzhaij daj- ciengx, 30% gyagoeng gij huq ndawhaij, 10% cix guh gaicawx henzguek. Mbanjvuhdouz roengzrengz gungganq doengh aen giyez guh- daeuz, laebbaenz aen gih guhyiengh (haedsim) suijcanjyez ndawhaij Ginghcuz. Ndawmbanj miz 130 hoh ciengx gungq, gungh ciengx le 3820 moux, bi ndeu canjok gungq 4683 fanh dun, bi ndeu canjciz 5620 fanh maenz. Mbanj de lij hwnq le 45 aen cangj bae genjdanh gyagoeng haijcez, miz 110 hoh vunz guh gij hong neix, moix bi gyagoeng haijcez 4200 lai dun, canjciz 3360 lai fanh maenz. Bi 2019 Mbanjvuhdouz lij aeu gij youhsi bonjdeih yinxhaeuj Yangz- gvangh Nwngzyenz Youjhan Gungh- swh, co le 3000 moux daemz ciengx gungq hawj gyoengqde, guh aen hanghmoeg gvanghfuz faz den, dawz dajciengx caeuq faz den doxgap hwnjdaeuj.

“Gingh” Vei Vwnzva

Aeu Lizsij Guh Ndok

“Seizde Ginhcouh you dajndaem, rumzbaek fwncin daengz Vuhdouz. Lwgmaenz nazsa ndei senhcin, raemx feuz ruz lai ciemq baihgwnz……” Gicej yawjraen miz song diuz saeurin caeuq baj sigbei ndeu daengj youq baihnaj aen hahdingz ndawmbanj, gwnzde gaek le gij sei bi 1962 ndwen 2 Denz Han daeuj Mbanjvuhdouz cazyawj sij haenx, mwhde Denz Han dwg boux fucujsiz Cunghgoz Vwnz- lenz、 bouxcujsiz Higi’gyah Hezvei. Gij sei gwnz saeurin dwg Sawnanz, gwnz sigbei cix dwg Sawgun caeuq Sawnanz song cungj saw. Sawnanz dwg cihsaw gaeuqgeq Ginghcuz, daiq miz gij lizsij caeuq vwnzva vunz Ginghcuz. Doengh faqciengz hag- dangz、ranzyouq cungj raen gij ngaeuz Sawnanz, gij vwnzva fwnhveiz ndawmbanj gig naekna.

Byaij youq gwnz roenmbanj, youh ndaej yawjraen faqciengz ganranz vunzmbanj veh miz gij dozveh laisaek gvendaengz gij gojgaeq cienzgangj conzdungj ndawbiengz Ginghcuz, aen gojgaeq neix gungh miz cib’it aen canghcez, byaij gvaq gehhongh, cix ndaej yawj caez gij gojgaeq neix lo. Ranz iq aen dep aen, baihhenz cix miz haujlai go faex geq geijcib bi roxnaeuz geijbak bi. Hoz Lingz lwnhnaeuz, neix dwg aenvih vunzmbanj itcig dingh- maenh aeu henhoh gofaex. “Dou daj lij iq couh rox, ndawmbanj mbouj hawj vunz luenh raemj faex, caeg raemj roxnaeuz gag raemj faex doq ngaiz fadngaenz, mwh youq baihrog cuengq denyingj seiz lij aeu youq baihnaj daengx mbanj vunz guh genjdauj. Aenvih fad dwk gig naek, lij vaih naj dem, ndigah mbouj miz geijlai vunz bae raemj faex. Gij sibsug gyaezhoh gofaex couh caeuq go faex geq doxcaez ce daengz seizneix. ”

Gij lizsij vwnzva Mbanjvuhdouz gig naekna. Ciet Hahcez cix dwg mbaw mingzben yinzvwnz gyaeundei ndeu. Ciet Hahcez Ginghcuz youq bi 2006 ndaej senjhaeuj buek daih’it feihyiz mingzloeg guek raeuz. Moix bi bet nyied coit Mbanjvuhdaeuz couh gvaq aen ciet neix. Seizde, daengx mbanj vunz ndang daenj buhvaq gyaeundei, guh lai cungj lai yiengh hozdung lumjbaenz coux bouxsaenz、caeq bouxsaenz、ciengq hah(eu fwen)、ndaek duzyienzgimz daengj, angq baenzhaemh, fwen foux mbouj dingz. Gij vwnzva Ciet Hahcez youq aen mbanj neix swnjcienz caeuq hwngfat ndaej gig ndei. Beiz Yungjlenz boux ndaej senjguh “hahmei” (boux mehmbwk youq Ciet Hahcez ciengq hah) neix naeuz, seizneix Ginghcuz ciengq hah cawzok haenh、 caeq bouxsaenz, lij ciengq gij yienghmoq swnghcanj caeuq saedceij seizneix daengj.

Mbanjvuhdouz miz 500 lai bi lizsij. Vih baujhoh caeuq haifat ndei gij swhyenz conzdungj ndawmbanj, bi 2015 cwngfuj dangdieg lij ok le《Aen Gveihva Baujhoh Caeuq Hwngfat Mbanjvuhdouz Dunghhingh Si Gyanghbingz Cin Aen Mbanj Conzdungj Neix》.

“Gingh” Sim Coh Dangj

Dazyinx Vunz Baenaj

Bi 2019, Gyanghbingz Cin hainduj dajcauh aen hanghmoeg cauhlaeb aen cin miz gij daegsaek aenhaij Ginghcuz, Mbanjvuhdouz guh gizdieg haedsim. Gij gihcwngz dangj- cujciz caeuq aen Lijswvei Yanghyenz Mbanjvuhdouz Moq guhyiengh daz- yinx, hwnqguh aen lajmbanj gyaeu- ndei habngamj youq、habngamj guhhong、habngamj lijyouz ndeu.

Vih hawj lajmbanj hwnghoengh gyaeundei, Mbanjvuhdouz laeb le gunghcoz siujcuj, bouxsuhgi Cunh Dangjcihbu dang cujcangj, doidoengh gij hong “sam cing sam cek” netsaed baenaj. Gij ganbu、dangjyenz、doenghboux miz dwzcaiz ndawmbanj guhyiengh gonq, gyoengqvunz ndaw- mbanj gagnyienh ok rengz gaenx- maenx bang hong.

Seizneix, baez doek fwn hung, diuzroen ndawmbanj cix mbouj ngaiz dumh lo, aen mbanj bienqndaej seuqcingh caezcingj. Vunzmbanj ngoenzngoenz cungj bae aen lanz- giuzcangz caeuq diuz roen heux ndoengfaex henz mbanj lienhndang.

“Neix aeu gyo’mbaiq gij cwng- cwz bangfuz minzcuz vunz noix dangj caeuq guekgya.” Yonj Aihingh naeuz, “doeklaeng, ndawmbanj yaek laeb- daeb doicaenh canjyez swnggaep, aeu yienghndei caeuq vwnzva Ginghcuz guh lijyouz. Miz dangj caeuq cwngfuj bangcoh, dou engq mizrengz bae cauhnieb baenzmiz lo, gij ndwen- ngoenz baezlaeng itdingh engq ndei lo.”