8 nyied 5 hauh, Hozciz Si Lozcwngz Mulaujcuz Swciyen Yinzminz Cwngfuj caeuq Liujcouh Si 6 aen giyez guhdaeuz lozswhfwnj ciemdingh hozcoz, caez cauhlaeb aen dieggoek guh gij yenzliu lozswhfwnj, doxleih caez ndaej. Lozcwngz youq laeng gizdieg Hozciz caeuq Liujcouh gapgyaiq, soengq huq bae Liujcouh gig bienh, dieg de cix habngamj ndaem gohaeux、gofaiz、duhseiq、byaekgat、raetmoegngaex caeuq ciengx sae. Seizneix aen yen neix miz aen dieggoek ndaem gofaiz、aen dieggoek banggungz guh canjnieb raetmoegngaex daengj. Gij canjnieb Liujcouh lozswhfwnj yaek aeu gijmaz yenzliu、baenzlawz suenqveh, Lozcwngz couh dazyinx vunzlai dajndaem gij yenzliu gyoengqde aeu haenx, hwnqguh gij dieggoek gyagoeng. Neix mboujdan hawj bouxguhnaz demsou, lij gyamaenh aen makbaenz duetgungz gunggeng, caiq guhhoengh lajmbanj.

（Veiz Yuzdai / 韦如代）