Haetromh seizhah, gou ngamq ndiu gvaqdaeuj, baez byaengqda, song da moengzloengz, couh dingqnyi gij sing fwn seizhah “sasasa……” ndek- ndak gwnz gingq conghcueng, baez sijsaeq yawj, gij fwn lumj lwgnyez guhlaeuh nei, baez bungq daengz naj gingq youh fwt comz baenz diuzdiuz dah iq, riengjret lae roengz daizdangq bae, lumj cinglingz nei gig dwggyaez.

Raq fwn seizhah neix daj haemhlwenz couh doek, seizneix menhmenh bienq iq lo. De gaenq nyinh laj namh ndaej dumzdwddwd, vanzlij unqswnh lumj dahsau nei, laebdaeb dingz youq gwnz mbwn baenzlai nanz lij sij mbouj ndaej lizbae dem.

Gou gig gyaez gij fwn iq seizhah, de lumj boux dahsau nei, dwggyaez, unqswnh caemhcaiq gyaeundei, aen- vih de mboujdan nyinh fanhfaed lajbiengz, hawj vunz daiq daeuj liengzyauj, vanzlij dongjswiq ndawsim gou, hawj gij simfanz fouzfengh gou ndaej vut daengz gizgyae bae.

Mbouj geij nanz, gij fwn yied doek yied iq, seizneix dingjlingz ciep dawz denva, miz geij boux baengzyoux gyaez ingj siengq ngamq daj gizgyae daeuj daengz. Gyoengqde daeuj ranz- mbanj gou, yaek bae youz Siz- vandasanh Swnhlinz Gunghyenz, siengj ingj cuj siengq funggingj seizhah he. Gou angqvauvau, gag siengj: Raq fwn seizhah ngamq doek gvaq, seizneix bae gizde youz, wngdang miz gingjsaek caeuq bingz- seiz mbouj doxdoengz bw!

Siengj daengz gizneix, gou couh sikhaek okbae ciep gyoengq baengz- youx de, dou geij boux couh hai ci bae cimhra gij gingjsaek daegbied lo.

Dou geij aen ci doxriengz buet youq gwnz lohyouzbek mogndaem youh seuqsak. Diuz loh neix miz giz bingzrwdrwd, miz giz cix ngut- ngeungeu, gij ranzmbanj mizseiz daj ndaw bya ndaw ndoeng mumjgyumq ndonj ok baihnaj dou. Dou maez youq ndaw rumz singjsien caeuq gij gingj gyaeundei ndawde, itloh haengjheiq cung haeuj ndaw rungj Sizvandasanh Swnhlinz Gunghyenz bae, ndawsim cungj dwg maqmuengh.

Ci hai daengz byongh roen giz uteuj he, gyaegyae couh ndaej raen gij nditrongh cingq laeglemx hawj gyoengq bya biengj gaiq baengz- goebgyaeuj hausaksak hwnjdaeuj, gyoengq bya menhmenh loh ok gij yiengh dahsau najnyaenq——Va! Gyoengq bya heuswdswd、seuqsatsat, raq rumz he ci gvaqdaeuj, hoengheiq youh nyinh youh singjsien couh lumj cinglingz guhlaeuh nei ndonj haeuj ndaw ndaeng. Gij homsien doenghgo hix daj seiqlengq yaenx haeuj ndaeng dou, hawj dou ndawsim humznyub- nyub, angqvauvau…… Aen vamingz gunghyenz neix heuhguh “Singz- yangjgi”, caen deng dahraix, gvaiq mbouj ndaej ciuyinx ndaej baenzlai vunz diegrog daeuj daengz gizneix dangdien capyingz supsou yangjgi lo.

Henz loh bya sang goengq dab goengq, fwjmok menhmenh swng hwnjdaeuj, geujheux youq ndaw lueg ndaw bya, yaep ndeu youh fwt swng fwt comz, lumj gyoengq dahsien ndang daenj vunj couz, fwngz dawz baengzsei hausaksak youq laj ndaw ndit hajsaek ciengq go diuqfoux, youh dep youh liz, yaek raen mbouj raen, mokmumu caemhcaiq biufefe, hawj vunz lumj haeuj diegsien bae nei. Gyoengq baengzyoux nyaenx mbouj ndaej dingz ci roengzdaeuj, gingz hwnj aen sienggih ingj mbouj dingz, lau baez yaep da couh lauqgvaq gij gingj yaepyet lai bienq neix bae.

Lij caengz yawj gaeuq gij gingj gyaeundei henz loh gyoengq bya, mbouj rox mbouj nyinh couh daeuj daengz bakdou Sizvandasanh Swnhlinz Gunghyenz lo.

Baez haeuj bakdou, fwt miz benq saek heucing he saenqrwenz gou lo—— Gij haenx dwg benq faexraeu singjsien gauhyaj ndeu. Gyaegyae muengh bae, baenz go baenz go faexraeu hungloetloet sangswdswd daj boznywj daengj youq gwnz dieg, bongh hwnj gwnz mbwn. Ganjfaex saekdaep, ngafaex mbe gvangq seiqlengq, yaemhyangq mbouj doxdoengz. Baenz go baenz go faexraeu neix couh lumj baenz aen baenz aen liengj heu hungmbwk nei, gij mbawraeu youq ndaw rumz laj ndit haetromh fub- fedfed、ronghswgswg, gig miz cing- saenz, gyoengqde caeuq gyoengq bya sang ndoengfaex mwncupcup dox- baengh doxhuz, caemhcaiq youh gak miz daegsaek.

“Couhdwg gizneix lo, gaxgonq ingj le faexraeu seizcou, seizneix dwg haetromh, fwnraq ngamq gvaq, dwg seiz ceiqndei, gou aeu cagaenj ingj cuj siengq faexraeu seizhah ndeu, caiq bae camgya gij doxdax ingj cij ndaej!” Boux baengzyoux he angqyangz gangj.

Seizneix gou cij geiq hwnj bi- gvaq de ingj cuj mbawsiengq faexraeu seizcou gyaeundei he, youq ndaw baengzyouxgien riuz ndaej youh vaiq youh gvangq, byawz raen le cungj haenh. Couhdwg gij mbawsiengq neix yinx ndaej gyoengq cangh’ingj laeblaeb daeuj daengz gizneix ingj siengq, bonjlaiz seizcou dwg seizdamh Sizvandasanh Swnhlinz Gunghyenz, baenzneix hix nauhyied hwnjdaeuj lo, gij yiengh neix gaxgonq cungj mbouj miz gvaq.

Seizneix, gou cij fwt roxnyinh: Gaxgonq, swhgeij baez daengz Siz- vandasanh Swnhlinz Gunghyenz, cungj laepda cung haeuj baihndaw bae, laihnaeuz gij gingj gyaeundei bietdingh youq baihndaw……

Danghnaeuz mbouj dwg caeuq gyoengq baengzyoux caez daeuj, gou cungj mbouj rox gizneix hix dwg giz gingjsaek gyaeundei ndeu dem, cadi youh lauqgvaq lo. Sijsaeq siengjsiengj, seiqvunz raeuz miz geijlai baez aenvih “gou laihnaeuz” lauqgvaq le gij gingjsaek gyaeundei ni?

Gou doq ngeix doq ngiengxgyaeuj cimyawj gij faexraeu dangqnaj neix.

Mwh gou naengh youq gaiq rin laj goraeu hung yietbaeg seiz, dauqngeix gizneix couhdwg dieg baengzyoux bi’gvaq seizcou ingj siengq haenx lo. Gou dawz soujgih okdaeuj ra gij siengq gaxgonq de ingj, yaek aeu daeuj guh doxbeij baez he, yawjyawj bi he gvaqbae lo, gizneix miz maz mbouj doxdoengz.

Ndaw siengq mwhde dwg seizcou, hix dwg haetromh, mbwn seuq mbwn sang, gij mbawraeu deng mwi nyumx ndaej ndinggeq, rumzcou baez ci gvaqdaeuj, gij mbawraeu couh lumj raemxlangh nding nei fubfed mbouj dingz. Lij miz mbaw siengq he daj dieg daemq ingj doxhwnj, gij mbawraeu youq laj nditndongq henj- rwgrwg, lwenqda dangqmaz, yawj mbawsiengq lumjbaenz couh ndaej raen goraeu ning nei……

Gvaiq mbouj ndaej Dangzciuz canghsei Du Muz sij sei haenh——“Mbawraeu nding gvaq va ndwen- ngeih”. Canghsei dwg danq mbawraeu seizcou oq beij va seizcin, caemhcaiq mbouj lumj gofaex gizyawz ndoq- ndangndang. Seizneix gou ndaej raen mbawraeu seizhah mwncupcup, hoenghhwdhwd, mbouj beij gofaex wnq ngoenh bw! Gou nyinhnaeuz faexraeu youq seizhah lumj bouxbing, ndwn youq bakdou gunghyenz, aeu ndang cangq de dawz hen, youq seizcou cix bienqbaenz boux dahsau ndeu, daenj geu buhvaq hoengzfodfod, yunghrengz diuqfoux gwn laeuj haenq daeuj dingj nit.

Gou nyaenx mbouj ndaej iet fwngz dawz nye faexraeu iq he, siengj aeu daeuj cimyawj. Siengj mbouj daengz dauq ngaiz gij raemxfwn ndik rim gyaeuj rim ndang bae, daengx ndang cungj caepcatcat caez.

Gij Mbawraeu lumj fajfwngz, gij megloh seuqcingx raixcaix, vangraeh doxgap, mbawmbaw heusausau, oiq- nomj youh nanet.

Gou gip geij mbaw raeu gwnz namh, aeu fwngz nu geij baez, gij hom mbawraeu daegbied sikhaek ndonj haeuj ndaw ndaeng daeuj, mbouj mup hix gag hom. Gij saek、gij yiengh、gij hom de iemq haeuj ndawsim bae, hawj vunz nanzlumz.

Laepda mup mbawraeu, sijsaeq dingq gij rumz ndaw bya ci ndaej ndoengfaex yiengjsasa haenx, gou couh lumj yawjraen doenghgij faex- raeu lumj dahsien nei cungj riengz rumz diuqfoux.

Aenvih ngamq doek fwn gvaq, gij raemxrij bienq ndaej youh hung youh gip, lumj cienbing fanhmax cunghoho rouxringx coh laj bya bae, hawj bya hung dem le haujlai senggei.

Gou daj laj faexraeu ngiengx- gyaeuj yawj gwnzmbwn, cij raen gwnz mbwn gaenq fwj hai mok sanq, loh ok mbwn lamz mbwn gvengq, geij benq fwjhau fouzmbengmbeng mbin dwk, gij nditndongq engq rongh engq lwenqda lo.

Seizneix gij bya、gij raemx、gij ndit、gij fwj、gij faex…… Cungj gig huzswnh, hawj vunz siengjgyae simmaez. Gyoengq baengzyoux cungj yungz haeuj gij gingjsaek daegbied neix bae caez.

“Gaca, gaca……” Mbouj rox seizlawz, baengzyoux gaenq caegcaeg ingj gij gingjsaek maezvunz neix roengzdaeuj lo. Gyoengqdou hix cungj youq mbawsiengq de ingj ndawde—— Mwh dou yawj funggingj seiz, hix baenz aen funggingj lo.

Seizhah doek fwn gvaq, gingjsaek Sizvandasanh Swnhlinz Gunghyenz lumj dozveh nei, gizneix dwg gaiq dieg hawj ndawsim seuqsak ndeu, baez daeuj couh sij mbouj ndaej lizbae.