Ndwen 7 ngoenz 29 Gozsinhbanh lwnh vunzlai rox, Gaiq Daih 18 Cungguek—Dunghmungz Bozlanjvei caeuq Cungguek—Dunghmungz Sanghvu Caeuq Douzswh Funghvei yaek youq ndwen 9 ngoenz 10 daengz ngoenz 13 youq Gvangjsih Nanzningz banh, daengzseiz yaek ndalaeb aen canjgih cienmonz hawj gij giyez guek cwngzyenz（RCEP） yaengdingh gvanhaeh bouxdoih ginghci cienzmienh mbangj gizdieg, caemhcaiq banh RCEP ciendaez sonlienh hozdung.

Gaiq bozlanjvei caeuq funghvei neix cawjdaez dwg “caezyiengj diuzroen moq seizgei moq gwnz dieg gwnz haij caemhguh aen minghyinh caezcaemh Cungguek—Dunghmungz”, yaek yungh gwnz sienq laj sienq giethab vunqsik banh. Guek cawjdaez laebdaeb dwg Laujvoh.

Sanghvubu bucangj culij Yin Hungzbinh naeuz, gaiq dunghbozvei neix cingqdwg gak fueng gaenxmaenx doidoengh RCEP mizyauq hengzguh, vihneix, bozlanjvei yaek banh RCEP ciendaez sonlienh hawj giyez rauh iq camgya, banh RCEP ginghmou hozcoz gunghsangh gauhfungh lundanz, caemhcaiq yaek laeb aen canjgih RCEP daengj.

Ciuq Gvangjsih Bouxcuengh Swcigih fucujsiz Liuz Hungzvuj gaisau, bozlanjvei mboujdan cingj giyez mbangj guek cwngzyenz RCEP, lij cingj giyez guekgya engqlai henz roen “rangh ndeu roen ndeu” camgya canjlanj camgya haihoih, roengzrengz doidoengh dunghbozvei daj fugsaeh “10+1” coh fugsaeh RCEP caeuq “rangh ndeu roen ndeu” gya’gvangq.

Seizneix, “rangh ndeu roen ndeu” gozci canjgih najdieg canjlanj gyoebsuenq daih’iek 9000 bingz- fanghmij, doengzbeij gyalai 28.6%, Bahgihswh- danj、Bohlanz、Hanzgoz、Yizbwnj、Audaliya、Sinhsihlanz、Ngozlozswh、Fazgoz、Sihbanhyaz daengj 20 lai aen guekgya cujciz giyez camgya canjlanj.

Ciuq cam rox, daj dunghbozvei、douzswh funghvei banh doxdaeuj, gungh miz 97 boux bouxlingjdauj guekgya ndawguek rogguek、3400 lai boux bucangj gaep bouxhek camgya, 92.6 fanh boux canghseng’eiq ndawguek rogguek camgya canjlanj camgya haihoih, gungh banh 282 aen lundanz hoih caengzsang.

(Yiz Gyahsinh Vuz Hau)