Daengngoenz menhmenh doek roengz raeb goengq bya laeng ranz bae lo, ndithaemh ciuq doh gyang- hongh, Lauxcwngz naengh youq gwnz daengqninz, henz ndang gwnz aen daengq daemq cuengq miz geij bonj saw caeuq bauqceij nanupnup. Lajdin Lauxcwngz boemz ninz duz ma’ndaem he, duzma seiz mbouj seiz ngiengx- gyaeuj iet linx muenghyawj Laux- cwngz, Lauxcwngz hix iet fwngz bae lumhlumh aen gyaeuj de.

Daj gunghsanghgiz duiyouh maranz, Lauxcwngz ngoenznaengz cawz le yawj saw yawj bauqceij, hix gyaez bae youzbyaij saek yaep, caeuq vunzlai gangjgangj goj, roxnaeuz dwk geizciengh saek seiz.

Gyoengqvunz naeuz:“Cwngz giz- cangj, mwngz raen gvaq seiqmienh, moix ngoenz ndaej caeuq mwngz gangjgoj, rox haujlai saeh lajmbwn, mizyinx lai.”

Lauxcwngz riu naeuz:“Gou mbouj youq gunghsanghgiz guhhong lo, sou baenzneix heuh, gou dauq mbouj gvenq, lijdwg heuh Lauxcwngz ndei di.”

Boux ndeu gag youq seiz, Laux- cwngz song da cungj gyaez muengh coh diuz lohbya suijniz iet coh mbanjranz, de lumjbaenz youh ma daengz gaxgonq.

Seiqlengq bya sang hopngomx, dawz aen mbanj humx youq cungq- gyang. Diuz lohgemh ngutngeuj gaebgeb he doeng coh baihrog bae, giz mboep giz doed, duzcwz duzyiengz byaij mbouj onj, vunz byaij hix ga sang ga daemq, mbouj siujsim couh laemx daengjhoemj, heujnaj gaet daengz gwnz rin bae. Lwgnyez bae doegsaw, bouxlaux mbouj cuengqsim, lwgsau hix mbouj nyienh haq daeuj gizneix.

Lauxcwngz caeuq Fangh Gyah- yungj song boux daj iq daengz hung caez bae hagdangz doegsaw, caez haeuj aendonz le, doeklaeng hix caez haeuj aendangj. Muengh diuz loh gumzgamx nanz byaij neix, gyoengqde bek aek doiq vunzmbanj naeuz:“Raeuz beixnuengx caez diuz sim ndeu, mbouj saenq guh mbouj baenz diuz loh neix!”

Lauxcwngz caeuq Fangh Gyah- yungj guh loh gienh saeh neix, baihgwnz rox le, hix bued ngaenz caeuq suijniz daeuj bang. Miz cwngfuj cengjhwet, Lauxcwngz caeuq Fangh Gyahyungj lumj duzguk dem fwed nei, roxnyinh engq miz rengz, songde vid hwnj genbuh, daiqlingx daengx mbanj mbwk sai laux nyaeq bae coih loh.

Song mbiengj lohbya cungj dwg rin hung caeuq dat sang, gofaex mwncup ndaetfwd, gogaeu gohaz doxsan doxgeuj, aeu raemj faex caeuq cawz go’em gohaz bae gonq, caiq hai bauq cij ndaej.

Guh sat gij hongcab neix, hainduj guh hai bauq gienh saeh naek youh yungyiemj lo. Moix baez youq gwnz rin hung roxnaeuz gwnz dat sang siuq conghbauq ndei le, Fangh Gyahyungj couh gaem aen lahbah heuh gyoengq- vunz deuz gyae bae, de swhgeij bae diemj bauq. Lauxcwngz ceng bae diemj bauq, Fangh Gyahyungj naeuz de sug hangz neix, bouxlawz bae guh de cungj mbouj cuengqsim.

“Gwjgum” sing he, sing bauq daenh ndaej vunz rwz yaek nuk bae, baenz ndaek baenz ndaek rin hung dek hai, daj gwnz dat sang ringxlulu roengzdaeuj, Fangh Gyahyungj gwnz naj riu ndaej lumj boux lwgnyez nei.

Boux daiqdaeuz gangj daengz guh daengz, gyoengqvunz haenqrengz bae guh loh, mbouj geij nanz, diuz loh couh yaek guh baenz lo.

Ngoenzhaenx, Fangh Gyahyungj siuq conghbauq ndaej le, cang ndei cayoz diemj bauq. Baez diemj ndaej, de couh ganjvaiq buetdeuz, bae giz dieg ndoj bauq haenx caeuq Laux- cwngz caez boemzhoemj roengzdaeuj.

Gvaq haujlai nanz, dingq mbouj nyi sing bauq yiengj, Fangh Gyah- yungj naeuz bae yawj dwg maz saeh. Lauxcwngz mbouj cuengqsim, hix gaenlaeng bae yawj. Byawz rox, Fangh Gyahyungj caeuq Lauxcwngz ngamq byaij gaenh conghbauq, bauq yiengj lo. Fangh Gyahyungj baez bengdawz Lauxcwngz, yunghrengz nyoengx laemx roengz gwnznamh bae, aeu aen ndang cihgeij bae hoh Lauxcwngz.

Ndaek rin hung he dimz deng aen gyaeuj Fangh Gyahyungj, lwed laeyaeng’yaeng, nyumx hoengz buh- vaq, de song da laep dwk, mbouj doengh saekdi ninz youq gizde. Lauxcwngz cij deng di sieng he, de gotdawz Fangh Gyahyungj, sing hung heuh coh de, de hix caiq mbouj han vah lo……

Loh guh baenz lo, youh gvangq youh soh, song aen giceh hix ndaej doxveq. Gyoengqvunz angqyangz, hoeng ndawsim hix naekgywg. Laux- cwngz bae moh Fangh Gyahyungj naeuz:“Lauxfangh, loh guh baenz lo, mwngz youq baihlaj cuengqsim, gou rox ciuqgoq ndei gyoengqvunz ranz mwngz.”

“Lauxcwngz, gwn caeuz lo, mbouj gwn gou dawz bae gueng mou!” Lauxcwngz cingq naemj dwk, mehyah heuh Lauxcwngz gwn caeuz lo. Lauxcwngz roxnyinh miz di geizheih, haemhneix mehyah gangj vah miz di mbouj doxdoengz.

Ngaiz byaek hwnj daiz, mehyah ngaemgyaeuj gwn ngaiz mbouj gangj saek coenz, Lauxcwngz gangj vah, de hix mbouj dap, faj naj haen dwk. Daeglwg、dahbawx caeuq song laeq lan youq ndaw singz, nanz mbouj nanz cij maranz saek baez. Song bouxgeq mbouj miz vah gangj, ndawranz caemrikrik lumj mbouj miz vunz youq nei.

“Lauxcwngz, gangj okdaeuj hix mbouj lau vunz riu, caeuq mwngz guh hongranz baenzciuh, roxnyinh song- raeuz doxca gig gyae, raeuz doxliz suenq lo.” Mehyah fwt naeuz.

“Mwngz mbouj dwg gangj vahloq ba? Songraeuz guh gvanbaz daengz banneix gaenq ndaej geijcib bi, byoemndaem bienq raizva, hwet hix gungj lo, lij naemj bae doxliz, vunz mbouj riu heuj doek bae ha. Caiq naeuz, raeuz song boux ndeindinndin, vihmaz miz aen naemjfap neix.” Lauxcwngz muengh coh mehyah naeuz.

“Ngoenzlwenz gou caeuq geij mehyah ndaw mbanj bae haw, gyoengqde naeuz, mwngz bae haw ciengzciengz caeuq mehmbwk coz daiq dahlwg ndeu gangjgoj naemq dangqmaz, songde dwg byawz?” Mehyah najfonx cam.

“Ngoenzneix gou baet ranz daj aen gvihfaex gaeuq, saeuj ndaej gij doxgaiq neix, mwngz gag yawjyawj dwg maz!” Mehyah cuengq vanj dawh roengzdaeuj, baenq ndang haeuj ndaw rug bae, gaem dab ceij nanupnup he, gveng daengz baihnaj Lauxcwngz bae.

“Gvaiq ndaej baenzciuh mbouj raen ce ndaej saek faen cienz, cungj geiq bae ciengx bouxwnq lo!” Meyah haenqda coh Lauxcwngz.

Lauxcwngz nyengh lo, itseiz mbouj rox gangj maz ndei. Raen Lauxcwngz mbouj han, mehyah youh doiq Lauxcwngz naeuz:“Mwngz ngoenzneix doiq gou gangj seuq bae, mwngz dawz cienz bae ciengx bouxlawz lo? Mwngz cawz le dawz cienz geiq hawj boux vunz neix, lij geiq hawj cibgeij boux vunz aen mingzcoh mbouj doengz dem, mwngz dang di hak iq he, ciengx ndaej baenzlai vunz ha, ak bw!”

“Mwngz dingq gou gangj gonq.” Lauxcwngz seizneix cij singjsag gvaqdaeuj, ngaemgyaeuj yawj dab ceij nanupnup neix, youh ngiengxgyaeuj yawj mehyah, naeuz, “mwngz lij ndaejgeiq gaxgonq gou caeuq mwngz gangj gvaq Fangh Gyahyungj boux vunz neix caeuq gij saeh haenx lwi? Danghnaeuz mbouj miz Lauxfangh, couh mbouj miz diuz loh mbanjrungh raeuz haenx, danghnaeuz mbouj miz Lauxfangh, gou hix mbouj ndaej lix daengz seizneix, diuz mingh gou dwg Lauxfangh aeu diuz mingh de vuenh ndaej.”

Song boux caemrwg yaep ndeu, Lauxcwngz youh naeuz:“Daj Laux- fangh mbouj youq le, yah de sinhoj ciengx dahlwg dog, dahlwg de heuhguh Dahcou. Ndawranz gungzhoj, Dahcou mbouj doeg geijlai saw couh maranz guhhong lo, mbouj geij nanz couh haq vunz. Dahcou haq ndaej geij bi, bouxgvan couh baenzbingh dai bae lo, ce miz dahlwg ndeu. Dahcou mbouj caiq naemj haq vunz, gag ciengx dahlwg majhung.” Gangj daengz neix, mehyah ngiengxgyaeuj muengh coh Lauxcwngz, mbouj guhsing.

Yenzlaiz geij bi gonq, dahlwg Dahcou gauj ndaej daihhag, Dahcou gag boux ndeu ra ngaenz soengq dahlwg doegsaw sinhoj lai. Lauxcwngz naemj: Dahlwg Lauxfangh couhdwg dahlwg gou, dahlan de couhdwg dahlan gou. Caiqlix, gou dwg boux dangjyenz ndeu, aeu seizseiz dawz vunzlai cuengq haeuj ndawsim, boux- lawz miz gunnanz couh bae bang boux de.

Doeklaeng Lauxcwngz lij daengz giz dieggungz ndaw bya bae, hawj cienz hawj gij lwgnyez ndaw ranz hojndoq bae doegsaw dem. Gyoengq- de mbangj dwg lwggyax, mbangj dwg lwgnyez louzsouj, gyonj daeuj miz cib lai boux.

Lauxcwngz naeuz mehyah:“Mwngz yawjyawj gij fei geiq cienz neix, dwg haujlai bi rom roengzdaeuj lo.” Gangj sat, Lauxcwngz cug mbaw fei mbehai yawj mbat ndeu, caiq gyoeb hwnjdaeuj cuengq haeuj ndaw fwngz mehyah bae.

Mehyah Lauxcwngz naj cik lo, naeuz:“Lauxcwngz, doiq mbouj gvaq, gou gvaiq loeng mwngz lo, mwngz gaxgonq baenzlawz mbouj caeuq gou gangj gij saeh neix ne?” Mehyah gaemndaet dab fei haenx, muengh coh Lauxcwngz.

“Lau mwngz dungxgaeb, yawj mbouj ndaej gyae ne.” Lauxcwngz naeuz.

“Mbouj dwg ranz vunz ndeu, mbouj caemh haeuj aen dou, gou gvaiq loeng mwngz, mwngz dauq naemj loeng gou lo.” Mehyah riugoekgoek naeuz.