Ndwen 7 ngoenz 23, Gaiq Daih 16 Cungguek—Dunghmungz Vwnzva Lundanz youz Cungguek Vwnzva Caeuq Lijyouz Bu、Gvangjsih Bouxcuengh Swcigih Yinzminz Cwngfuj cawjbanh haenx youq Nanzningz banh.

Gaiq lundanz neix cawjdaez dwg “vwnzva canjnieb hwngfat youh ndei youh vaiq caeuq gozci gapguh”, muzdiz dwg doxgyau doigvangq gij gingniemh saedguh hwngfat vwnzva canjnieb Cungguek caeuq Dunghmungz gak guek， yaenglwnh gij byaijyiengq caeuq diuzroen vwnzva canjnieb hwngfat youh ndei youh vaiq seizgeiz moq， bangdoi Cungguek caeuq Dunghmungz gak guek vwnzva canjnieb doengzcaez mwnhoengh， bangrengz cauhlaeb aen minghyinh caezcaemh Cungguek—Dunghmungz engq gaenjndaet.

Ciuq cam rox， Gvangjsih gijndei vwnzva swhyenz yienhda，miz vwnzva byadah、 vwnzva minzcuz、 vwnzva lizsij、 vwnzva souhlaux lai caeuq vwnzva gijgwn Lingjnanz daegbied gagmiz， lijmiz feihvuzciz vwnzva yizcanj fungfouq lai yiengh dem，seizneix miz “sam nyied sam Bouxcuengh”、 yisuz aen dingzdingj Bouxcuengh、 fwen Liuz Sanhcej daengj guekgya gaep feihvuzciz vwnzva yizcanj hanghmoeg 70 hangh. Gvangjsih gig yawjnaek hwngfat vwnzva canjnieb， okdaiz baenzroix cwngcwz vwnzgen haeujcoengh gaijgwz hwngfat vwnzva canjnieb， cienmonz bienguh gij gviveh gaijgwz hwngfat vwnzva “cibseiq haj” caeuq gij gviveh “cibseiq haj” hwngfat vwnzva canjnieb， vih hwngfat vwnzva canjnieb caeuq doxgyau gapguh gunghawj cengjdingj， roengzrengz aeu gijndei vwnzva swhyenz cienjvaq baenz gijndei hwngfat vwnzva canjnieb， doidoengh Gvangjsih vwnzva canjnieb saedyienh an’onj cangqheiq hwngfat.

Cungguek—Dunghmungz vwnzva lundanz daengz neix gaenq banh baenz 15 gaiq. Gaiq lundanz neix dwg aen hozdung youq laj hingzseiq cangzdaiva fuengz binghraq banh baenz, doenggvaq comzgyonj gijndei hozdung、 gwnz sienq laj sienq giethab daengj fuengsik， vih doidoengh Cungguek caeuq Dunghmungz guekgya youq seizgeiz binghraq gvaqlaeng vwnzva canjnieb hwngfat youh ndei youh vaiq caeuq gozci gapguh fatok le cozyung hung.

(Mwz Yizfanz Cangh Dingzdanh)