Gvangjsih Sawcuengh Yozyau youq bi 2021 ndwen 5 ngoenz 28 hai aen hozdung “Rox Aencingz Aendangj, Riengz Aendangj Yamq Byaij——Aen Hoih Canghraiz Saw- cuengh Gvangjsih Minzcuz Bau Ciemdingh Haeuj Hagdangz Gangj Raiz Saw”, iucingj dou geij boux canghraiz ciemdingh bae hagdangz caeuq gyoengq hagseng lwnh baenz- lawz aeu Sawcuengh caeuq Sawgun song cungj saw neix daeuj raiz faenzcieng.

Bi 2021 ndwen 5 ngoenz 20, gou ciep ndaej aen siusik neix seiz, gig sim’angq hix gwnheiq. Sim’angq dwg ndaej bae Gvangjsih Sawcuengh Yoz- yau yawjyawj, engq maqmuengh ndaej youq gizde dang boux hagseng ndeu, dingq lauxsae hwnj dangz Sawcuengh, neix dwg gou aen siengjgyaez ndeu. Gwnheiq dwg, aeu gangj baenzlawz raiz saw, haenghdingh aeu gangjvah. Hoeng, youq dangqnaj gyoengq laux- sae caeuq hagseng maenh’ak, gou bouxvunz bingzciengz caemhcaiq dungx mbouj miz caiz ndeu, rox gangj maz vah ni? Lauheiq gaenjcieng daengz coenz maz cungj gangj mbouj ok bak bw. Mbouj bae suenq lo, mienxndaej saetnaj lailai. Hoeng, aen gihvei neix baenzneix ndei, ndaej daezsang swhgeij bw. Caiqnaeuz, hagdangz baenzneix ndatcingz iucingj, danghnaeuz mbouj bae, roxnyinh doiq mbouj gvaq.

Yienghneix gou couh ngeix bae ngeix dauq, bwh le mbaw faenzcieng gangjvah ndeu——

Gak boux lauxsae、gak boux doengzhag daihgya ndei! Ngoenzneix gou ndaej daengz gizneix caeuq daih- gya raennaj, roxnyinh miznaj dangq- maz, docih ranzhag iucingj.

Bonjlaiz hagdangz heuh dou caeuq daihgya lwnhlwnh gij ging- niemh raiz faenzcieng Sawcuengh, hoeng, gou roxnyinh gij faenzcieng Sawcuengh gou raiz lij oiq lai, gij gingniemh neix gou lwnh mbouj baenz lo, ce hawj boux canghraiz wnq daeuj lwnh ba. Gou caeuq daihgya lwnhlwnh gou baenzlawz roxnaj Sawcuengh.

Gou daengz cungnienz cij roxnaj Sawcuengh, couhdwg bi 2011, gou cij roxnaj Sawcuengh, hag Sawcuengh, caemhcaiq dwg gag hag, youq gwnz vangj hag. Bi 2011 gaxgonq, gou mbouj rox gwnzbiengz raeuz miz Sawcuengh cungj saw neix, caemhcaiq dwg gij saw minzcuz gveihfan、ginggvaq Gozvuyen bihcunj youq dieg Bouxcuengh doihengz sawjyungh dem. Caeuq Sawcuengh roxnaj, caen dwg faengzfwz, lwnh daeuj vah couh lai lo.

Gaxgonq mwh roengzban ndaej- hoengq seiz, gou gyaez yawj bauq ngonz saw, gyaez yawj banj fu’ganh bauqceij, gij gojgaeq iq ndawde ciuyinx gou. Gij gojgaeq iq neix yienznaeuz iq, yienznaeuz bingz- ciengz, hoeng, gag miz gij feihdauh gyoengqde, neix hawj gou yawj ndaej maezmwdmwd, gwq gyaez bae yawj. Yawj bauqceij lai le, gou gag nyinhnaeuz gij gojgaeq iq neix gou hix raiz ndaej baenz. Ndigah gou couh hixnaengz gag raiz, laeglemx raiz, raiz le laeglemx douzgauj bae hawj bause. Vihmaz naeuz laeglemx ni, gou lau vunz rox le, riu gou boux dungxcaiz feuz ndeu, mbouj rox aenq ndang caiz buh, lij guhloq baenz boux canghraiz dem.

Liuh mbouj daengz, gij faenz- cieng iq gou caen ndaej fatbiuj lo, caemhcaiq dwg bienbien ndaej dwngh okdaeuj dem, gou yied raiz yied hwnjyinx.

Yienghneix gou gingciengz bae youzdensoj dangdieg lingx ngaenz- raizgauj. Baedauq lai le, couh caeuq bouxsoengqsaenq Siujluz sugnaj lo. Miz ngoenz ndeu, Siujluz naeuz gou:“Cejlingz, mwngz gyaez raiz faenz- cieng, raizraiz faenzcieng Sawcuengh vei.” Gou cam:“Siujluz, maz dwg Sawcuengh?” De naeuz:“Sawcuengh couhdwg saw raeuz, rox vahdoj doeg okdaeuj.” Gou geizheih lo, youh cam:“Vahdoj raeuz ndaej miz saw raiz okdaeuj ha?” De dap naeuz:“Miz nw!” Gou youh cam:“Cungj saw neix baenzlawz yiengh?” De naeuz:“Gou hix mbouj rox, mboujgvaq Yifung Cin yienh raeuz miz bouxraiz ndeu, de rox raiz Sawcuengh, gij mbaw ngaenz- raizgauj de hix dwg gou soengq, gij ngaenzraizgauj de haemq lai bw!”

Coenz vah Siujluz mbouj haeuj- sim ndeu yinx gou bae ra Sawcuengh. Gou hwnj vangj bae ra, caen ra ndaej raen Sawcuengh dahraix. Baez daih’it raen Sawcuengh gou doeksaet yat lo——Aeya, neix couhdwg Sawcuengh ya! Vahmeh gou caen miz saw dahraix! Caemhcaiq gij saw neix caen rox aeu vahmeh doeg okdaeuj dem! Gou doq mizyinx lo, deq mbouj gip couh youq gwnz vangj hag Sawcuengh hwnj- daeuj.

Gou yungh haujlai nanz seizgan, roengz haujlai goengfou cij geiq maenh singmeh yinhmeh. Singmeh yinhmeh doeg sug le, gaenriengz gou couh bae yawj saw, daihbuek yawj. Liuh mbouj daengz yied doeg yied hwnjyinx, gij coenz gij cih gij sing hawj gou roxnyinh raeujrubrub.

Hag Sawcuengh gaenq ndaej bi, gou couh sawq yungh Sawcuengh daeuj raiz faenzcieng. Aiq dwg yungh vahmeh daeuj raiz ba, gou roxnyinh swnh sim swnh fwngz. Bien faenzcieng Sawcuengh daih’it gou youq goekbi 2012 fat youq《Gvangjsih Minzcuz Bau》(banj Sawcuengh).

Geiqndaej mwhhaenx, gij faenz- cieng gou douz bae mbouj geij nanz, gou couh ciep ndaej denva bouxbien Veiz Yennaz lauxsae dwk daeuj. De naeuz:“Dahnuengx, gij faenzcieng mwngz gou sou ndaej lo, caemhcaiq yawj gvaq lo, gij coenzloeng gig lai, mboujgvaq mwngz dwg bouxraiz moq, neix mbouj youqgaenj, gou dawz gij coenzloeng cienzbouh gaij ndei lo, baezlaeng mwngz aeu haeujsim di nw, laebdaeb roengzrengz raiz, laebdaeb byaij baenaj ha, lai douz faenzcieng hawj dou nw.”

Song sam coenz vah bouxbien youh nai gou, youh hawj gou gujli. Gou youq ndawsim gag haenh bouxbien neix caen mizsim, caemhcaiq yawj- naek gungganq bouxraiz moq. Gij faenzcieng gou coenzloeng lailai, de mbouj “gaj dai” gij faenzcieng gou bae, lij bang gou gaij ndei, neix hawj gou daengx ndang miz rengz、saenqsim cibcuk. Gou ndaej bungzraen boux- bien baenzneix ndei, roxnyinh sim- angq dangqmaz.

Mbaw bauqceij dwngh faenzcieng gou haenx, geiq daengz fwngz gou le, gou dawz faenzcieng hainduj gou raiz caeuq faenzcieng doeklaeng dwngh youq gwnz bauqceij daeuj doiqciuq, yawjyawj coenzloeng dauqdaej loeng youq gizlawz, geiq coenzloeng caeuq coenzdeng youq bonj bouh iq ndeu. Gvaqlaeng, lij nanz mbouj nanz dawz daeuj yawj, mienxndaej ngoenzlaeng caiq raiz loeng baez moq. Yienghneix ndwen dem ndwen, bi dem bi, hix rom ndaej haemq lai cihsiz lo.

Daj baez de hwnj, gou cij rox swhgeij hag Sawcuengh cij hag ndaej di“naengbwn”ndeu ndwi, caengz haeuj ndaej gij ndok bae, cig daengz seizneix gou lij caengz haeuj ndaej ndok bae ne. Hag Sawcuengh gou haidin ceiz lai, nanz ndaej baenzcaiz. Ndigah gou caen hozhaenz gyoengq doengzhag sou, hozhaenz sou ndaej youq hagdangz hag Sawcuengh, ndaej cienzmienh bae hag. Ndigah sou aeu yunghrengz bae hag de, hag laeg hag daeuq bae.

Lauheiq miz saek boux naeuz hag Sawcuengh mbouj miz yungh. Byawz naeuz mbouj miz yungh ne? Gizneix lij dawz gij ginglig gou daeuj lwnh. Gou dwg gunghlugiz boux cizgungh bingz- ciengz ndeu, aenvih gou rox Saw- cuengh, bi 2014, minzyijban ndaw yienh daeuj ra gou, yaek diuh gou gvaqbae. Hoeng, gou doxdag gvaq le, nyienh youq danhvei gaeuq. Saw- cuengh ndaej hawj gou miz gihvei vuenh hong. Bi 2019, gou duiyouh lo, gonqlaeng miz song aen danhvei daeuj cingj gou bae guhhong. Aen ndeu dwg minzcwnggiz ndaw yienh, cingj gou bae guh gij hong diegcoh bujcaz. Diegcoh bujcaz couhdwg dawz gij cohmbanj、cohhaw、cohdanhvei daengj daengxyienh aeu Sawcuengh daeuj mai, mai song saw. Lingh aen danhvei dwg Baeuqroxdoh Yenzgiuvei ndaw yienh, cingj gou bae raiz Sawcuengh caizliu. Yawjyawj, rox Sawcuengh ra hong baenzneix yungzheih, byawz lij naeuz hag Sawcuengh mbouj miz yungh ni?

Caiqnaeuz Sawcuengh dwg gij sawmeh minzcuz raeuz, dwg gij vwnzva minzcuz raeuz. Gawqyienz dwg vwnzva minzcuz raeuz, couh wnggai bae baujhoh de, swnjciep de, hungzyangz de, fazcanj de. Rox Vahgun caeuq Vahcuengh song cungj vah neix, mwngz couh ndaej haeuj song aen seiqgyaiq vwnzva gyaeundei bae youz, ndaej yawjraen gij funggingj mbouj doxdoengz. Gou ciengzseiz heuh gyoengqvunz henzndang gou caemh bae hag Sawcuengh. Gou aeu Sawcuengh daeuj raiz faenzcieng, hawj bouxdoeg soengq di gaiqgwn vwnzva, hix vih swnjciep gij vwnzva minzcuz raeuz ok di rengz he, vihneix gou roxnyinh najrongh fouzbeij, gou yaek laebdaeb raiz roengzbae.

Gyoengq doengzhag, gij vwnzva minzcuz raeuz mbouj ndaej goenq bw, engq mbouj ndaej saetbae. Gij hong neix couh aeu sou bae buekguh, maqmuengh sou guh ndaej ndei.

Ngoenzneix gou couh luenh gangj geij coenz neix lo, gangj loeng rox- naeuz gangj mbouj ndei, muengh daihgya gaej gvaiq gaej yiemz. Doeklaeng, Gou hoh Gvangjsih Sawcuengh Yozyau yied banh yied ndei! Gyo’mbaiq daihgya!