Ndwen 7 ngoenz 15, Swcigih Minzcunghveij youq Gvangjsih Minzcuz Dayoz Sienghswhhuz Yaugih hai aen hoih hezdiuz hong gaujvu Sawcuengh Vahcuengh suijbingz gaujsi. Swcigih Minzcunghveij Dangjcuj cwngzyenz、fucujyin Veih Yungjhungz, Gvangjsih Minzcuz Dayoz Dangjveij fusuhgi Cinz Mingzbinh camgya haihoih, Swcigih Minzcunghveij ngeihgaep sinzsiyenz Cinz Hanvaz cujciz aen hoih.

Aen hoih dingq le Swcigih Minzcunghveij Minzcuz Yijyenz Vwnzsw Cu bouxfucwz lwnh gij hong mizgven geizgonq caepcawq gauj Sawcuengh Vahcuengh bi 2021、daegbied dwg vunz doenggvaq vangjloz hidungj bauqgauj gyalai caeuq bauqgauj co、cung、gau sam aen daengjgaep soqvunz faenbouh cingzgvang, dingq le Gvangjsih Minzcuz Dayoz Gisuz Gyauyuz Yozyen bouxfucwz lwnh gij cingzgvang mizgven gaujdiemj gaujciengz faenbouh、gaujciengz sezsih boiqbwh daengj, aen hoih lij saemjlwnh doenggvaq le 《Saw Hezyi Guenjleix Moegbiu Gaujvu Hagdangz Dinghdiemj Sawcuengh Vahcuengh Suijbingz Gaujsi Bi 2021》.

Ciuq cam rox, bi 2021 Sawcuengh Vahcuengh suijbingz gaujsi ndwen 7 ngoenz 25 youq Gvangjsih Minzcuz Dayoz Swhyenzhuz Yaugih gauj. Bineix vunz bauqgauj Sawcuengh Vahcuengh suijbingz gaujsi cauh lizsij sang moq, daengz bi 2021 ndwen 7 ngoenz 14, gungh miz 686 boux doenggvaq vangjloz bauqgauj, ndawde cogaep 173 boux, cunggaep 391 boux, gaugaep 122 boux.

(Cangh Haijyingh)